Read MAASAI REVISED PROTESTANT 1 Samuel 23 Bible Online

1 Samuel 23 - MAASAI REVISED PROTESTANT bible

1 Samuel 23

¹Nejoki ninche Daudi, “Ng'ura, earita Ilfilisti Keila nepurrito nenen neeitobirieki enkurma.”

²Neaku eikilikuanishore Daudi Olaitoriani, “Kalo nanu aar kulo Filisti?” Nejoki Olaitoriani Daudi, “Shomo taara pee intajeu Keila.”

³Kake etiaakita iltung'ana le Daudi ninye, “Ng'ura, eikiureisho iyiook tene te Yuda; kebaa naa naaji ti nikipuo Keila aarare injorin oo Lfilisti?”

⁴Neitoki ake Daudi aikilikuanishore Olaitoriani. Newaliki Olaitoriani ninye ajo, “Tudumunye, tadoi shomo Keila; amu kaishoru nanu Ilfilisti apik atua inkaik inono.”

⁵Nelo Daudi o ltung'ana lenyena Keila, nearare Ilfilisti, neyau nchoo enye, near iltung'ana kumok metuata tiatua ninche. Neaku etokordua Daudi lelo oomanya Keila.

⁶Ore apa pee eisik Abiata olayioni le Ahimelek alo enetii Daudi te Keila, nedou ninye alotu eeta enkila dorrop te nkaina enye.

⁷Netiaakaki apa Saul nchere eewuo Daudi Keila. Nejo Saul, “Eishorua Enkai ninye apik atua inkaik aainei amu eikenoyie ninye kewan ajing enkanasa naata inchomito oo sekenke.”

⁸Neipotu Saul iltung'ana pooki meetu olarrabal, metadoi aapuo Keila, pee eng'adu Daudi o ltung'ana lenyena.

⁹Neyiolou Daudi ajo eitobirita Saul entorroni te nkaraki ninye; nejoki ninye Abiata ilo apolosani, “Iyau ina kila dorrop ene.”

¹⁰Nejo Daudi, “Olaitoriani, Enkai e Israel, etoning'o osinka lino asipu nchere keing'oru Saul pee elotu Keila pee eidaikie enkang te nkaraki nanu.

¹¹Amaa, kaaishooyo nanu iltung'ana le Keila aapik atua enkaina enye? Kedou Saul alotu, anaa enatoning'o osinka lino? Olaitoriani, Enkai e Israel, aatasayia iyie, toliki osinka lino.” Nejo Olaitoriani, “Kedou ninye alotu.”

¹²Neitoki Daudi ajo, “Amaa, kaishooyo nanu iltung'ana le Keila iltung'ana laainei aapik atua enkaina e Saul?” Nejo Olaitoriani, “Eikinchooyo ninche.”

¹³Nedumunye Daudi o ltung'ana lenyena, oobaya iip ile neing'uaa Keila, nepuo ninche eneba anaa eneidim aashom. Ore ake pee elikini Saul nchere eisika Daudi nepal elototo.

¹⁴Neton Daudi tiatua ilnukat ti ong'ata, teina kop oo ldoinyo lo lpurkel le Sif. Neing'oru Saul ninye inkolong'i pooki, kake eitu epik ninye Enkai atua enkaina enye.

¹⁵Neiruto apa Daudi te nkaraki naipang'u Saul alo aing'oru enkishui enye. Netii apa Daudi ong'ata e Sif te Horesh.

¹⁶Nedumunye Yonatan, olayioni le Saul, nelo enetii Daudi te Horesh, neitagol enkaina enye te Nkai.

¹⁷Nejoki, “Miureisho amu ore enkaina e Saul, papaai lai, mikitum iyie; iaku iyie olaiguanani te Israel, naaku nanu oliare te iyie; keyiolo sii Saul papaai lai ena.”

¹⁸Nenya pokira oaare olmumai lo sotua te dukuya Olaitoriani; neton Daudi te Horesh, nelo Yonatan ang.

¹⁹Nepuo Ilsifi enetii Saul te Gibea, ejo, “Aimeisudori Daudi tiatua iyiook too lnukat te Horesh, ldoinyo le Hakila, le kopikop e Yesimon?

²⁰Tadou naa wou, olaiguanani, te risioroto e yieunoto o ltau lino pooki pee idou alotu; ore erishata ang naa pee kinchoru ninye aapik atua enkaina o laiguanani.”

²¹Nejo Saul, “Metamayiana intae Olaitoriani; amu inotito intae olng'ur te nanu.

²²Enchom, enyaaki entisipa oleng; entayiolo nidolidolo eneisudoriyie, naa kaing'ae otodua ninye teine; amu aatiaakaki nchere eikalamas ninye oleng.

²³Entodol naa, nijurrurru iwuejitin oshi neeisudoriyie, o neerreshishore, nishukunyenye enatii iatata olomoni osipa, pee alo nanu te nebo intae; naa te netii ninye ina kop, naing'oru nanu ninye tiatua inkalifuni pooki e Yuda.”

²⁴Nedumunye ninche, nepuo Sif aaituruk te Saul. Netii apa Daudi o ltung'ana lenyena ong'ata e Maon, tiatua Araba te nkalo e kopikop e Yesimon.

²⁵Nelo Saul o ltung'ana lenyena aaing'oru ninye. Nelikini Daudi; neaku etadoyie alo endapidapoi natii ong'ata e Moan. Ore ake pee ening Saul ina, nesujaa Daudi ti ong'ata e Moan.

²⁶Nelo Saul enchoto nabo o ldoinyo, nelo Daudi o ltung'ana lenyena te nkai shoto o ldoinyo, neisarisarita apa Daudi pee eilany Saul, ore etinyikutua Saul o ltung'ana lenyena aapunyaki Daudi o ltung'ana lenyena pee eibung ninche,

²⁷nelotu olkipaaret enetii Saul, ejo, “Isarisaru wou; amu etaara Ilfilisti enkop.”

²⁸Neaku etushuke Saul eitu eitoki asujaa Daudi, nelo aarare Ilfilisti; neaku etejoki apa ine wueji Endapidapoi e nkisikata.

²⁹Neilep Daudi alo teine, nebik too lnukat le En-gedi.