Read MAASAI REVISED PROTESTANT 1 Samuel 24 Bible Online

1 Samuel 24 - MAASAI REVISED PROTESTANT bible

1 Samuel 24

¹Ore pee eshukunye Saul eing'uaa esujata oo Lfilisti, nejokini, “Etii Daudi ong'ata e En-gedi.”

²Neya Saul iltung'ana inkalifuni uni oogeluno tiatua Israel pooki, nepuo aaing'oru Daudi o ltung'ana lenyena te dukuya indapidapo oo nkineji oo soito.

³Nelotu ninye imuatat oo nkerra e mbata e nkoitoi, ine apa netii enkapune, nelo Saul atua pee eyeng'iyeng'ie kewan. Ore apa Daudi o ltung'ana lenyena netonita teneiting'ie enkapune tiatua.

⁴Nejoki iltung'ana le Daudi ninye, “Nena enkolong naa ninye kitiaaka iyie Olaitoriani, ‘Ng'ura, kapik nanu olmang'atinta lino atua enkaina ino, naa intaas ninye anaa enidol aa sidai.’ ” Neinyototo Daudi neiseleejari alo adung'oo olcholoi lo lkila le Saul.

⁵Ore te siadi neitanyamal Daudi oltau lenye, te nkaraki natudung'oyie ninye olcholoi lo lkila le Saul.

⁶Nejoki ninye iltung'ana lenyena, “Keiba Olaitoriani te naitaas nanu ena olkitok lai, ilo otubukoko Olaitoriani eilata aput aitorioo enkaina ai agilunore ninye adolita ajo olotuputo Olaitoriani ninye.”

⁷Neaku eilejileja Daudi iltung'ana lenyena te kulo rorei, neitu eisho ninche metarasaki Saul. Nedumunye Saul neing'uaa enkapune, nelo te nkoitoi enye.

⁸Ore te siadi nedumunye sii ninye Daudi, neipang'u tiatua enkapune, neipotu Saul, “Olkitok lai, olaiguanani!” Ore ake pee enang Saul silig, neirrugo Daudi o metabaiki enkop te nkomom enye, neserem ninye.

⁹Nejoki Daudi Saul, “Kainyoo iyie pee ining irorei loo ltung'ana oojo, ‘Ng'ura, eing'oru Daudi enkitamioto ino?’

¹⁰Dol, ore ena olong etoduaa inkonyek inono aajo kitipika taata iyie Olaitoriani atua enkaina ai tiatua enkapune; naajoki nanu ilkulikae maataara iyie tua, kake aatapala nanu. Najo, ‘Maitorioo enkaina ai aar olkitok lai; amu olotubukokoki eilata aaput lo Laitoriani ninye!’

¹¹Toduaa, papaai lai, toduaa ajo etii olcholoi lo lkila lino enkaina ai; amu ore te sipata nchere atudung'oyie olcholoi lo lkila lino, neitu aar iyie tua, indim atayiolo nidol nchere metii entorroni e nkibelekenyata aashu enkitoria atua inkaik aainei. Keitu aas eng'oki tialo iyie, hoo nirresh enkishui ai pee intayu.

¹²Metaa Olaitoriani orish erishata ai o iyie, maaitalaa nanu Olaitoriani te iyie; kake mikiarare iyie enkaina ai.

¹³Anaa enajo endung'et e rashe e apa moitie, ‘Atua ilo torrono epukunye entorroni.’ Kake mikiarare iyie enkaina ai.

¹⁴Kaing'ae eipang'u olaiguanani le Israel asujaa? Kaing'ae isujita iyie? Koldia otua isujita iyie! Kolpidilai isujita!

¹⁵Metaa naa Olaitoriani orish nedung'oki enkiguana te rishata ai o iyie, neing'or ninye, naamitu nanu, naakordu nanu te nkaina ino.”

¹⁶Ore ake pee eidip Daudi airorie kulo rorei Saul, nejo Saul, “Koltoilo lino ele, enkerai ai Daudi?” Neyietu Saul aishir.

¹⁷Nejoki ninye Daudi, “Iyie olasipani alang nanu, amu kitalaaka nanu esidai aa entorroni nanu aatalaaka.

¹⁸Nimbalunye iyie ena olong ina nikintaasa nanu esidai, teina neitu kiar matua ina kata pee aapik nanu Olaitoriani atua inkaik inono.

¹⁹Amu amaa te netum oltung'ani olmang'atinta lenye, keisho ninye meshomo ninye eserian? Neaku mikitalaaki Olaitoriani te sidai teina nikintaasa iyie nanu ena olong.

²⁰Ore taata, ng'ura, kayiolo nanu ajo kesipa iaku iyie olaiguanani, neitubulari enkitoria e Israel te nkaina ino.

²¹Inosieki olmumai to Laitoriani nchere midung'oo iyie eishoi ai te siadi nanu, o nchere mindaikie iyie enkarna ai aitayu te nkaji e papaai lai.”

²²Nenya Daudi ele mumai te nkaraki Saul. Nelo Saul ang; kake eshomo Daudi o ltung'ana lenyena atua olnukata.