Read MAASAI REVISED PROTESTANT 1 Samuel 25 Bible Online

1 Samuel 25 - MAASAI REVISED PROTESTANT bible

1 Samuel 25

¹Neye apa Samuel, neiturrurro Israel pooki aaishiraki ninye, nenukaa ninche ninye te nkaji enye te Rama. Nedumunye Daudi nedoyio alo ong'ata e Paran.

²Netii apa oltung'ani otii Maon, oata esiaai enye te Karmel. Aikarsis apa ilo tung'ani oleng; keeta apa ninye nkerra inkalifuni uni o nkineji enkalifu nabo. Nebarnu apa ninye ilpapit loo nkerra enyena te Karmel.

³Ore apa enkarna e ilo tung'ani naa Nabal, ore enkarna e nkitok enye naa Abigail. Naa ng'en apa ina kitok neikishiaan kake kemoda apa olee naa torrono olkuaak; naa ole ntalipa e Kaleb apa.

⁴Nening Daudi ti ong'ata nchere ebarnita Nabal nkerra enyena.

⁵Neaku eirriwayie Daudi ilbarnot tomon; nejoki Daudi lelo barnot, “Elepa enchom Karmel, nipuopuo enetii Nabal, nirorokiki ninye te nkarna ai.

⁶Naa nji enkuna te nirorokiki ninye: ‘Metaa enino eseriani, metaa eseriani ene nkaji ino, metaa eseriani ene lelo pooki liata iyie.

⁷Atoningo nanu nchere iata iyie ilabarnok; etii oshi ilchekuti linono te nebo iyiook, neitu iyiook kintaas ninche entorrono, neitu ninche elau toki, ina kata pooki etii Karmel.

⁸Inkilikuana ilbarnot linono, amu aikiliki ninche. Metaa nchoo ilbarnot laainei etum omom too nkonyek inono; amu kipuonu iyiook te nkolong o sirua. Kitoomono iyie, nchoo pooki toki niaata isinkan linono o olayioni lino Daudi.’ ”

⁹Ore ake pee epuonu ilbarnot le Daudi, nejoki ninche nena pooki Nabal te nkarna e Daudi; netoni aanyisho.

¹⁰Newaliki Nabal isinkan le Daudi nejo, “Kaing'ae Daudi? Kaing'ae olayioni le Yese? Etii oshi taata kuna olong'i isinkan kumok oopuo aaing'uaa ilkituaak lenye.

¹¹Kaitayu nanu endaa ai o enkare ai o enkiring'o ai nateyieng'uo te nkaraki ilabarnok laainei, aisho iltung'ana ooing'uaa ewueji nemayiolo nanu ajo kaji eing'uaa?”

¹²Neaku eibelekenyate lelo barnot le Daudi aapuo, neshuko neliki ninye ina.

¹³Nejoki Daudi iltung'ana lenyena, “Teena pooki ng'ae olalem lenye!” Ore pooki ng'ae te ninche neen olalem lenye; neen sii ninye Daudi olalem lenye; nepuo iltung'ana oobaya iip ong'uan aasujaa Daudi, netoni iltung'ana iip are aarrip ilolan.

¹⁴Kake etiaaka obo loo lbarnot Abigail, enkitok e Nabal, “Ng'ura, Eirriwua Daudi ilkiliku ooing'uaa ong'ata meetu aairoroki olkitok lang, kake etamoro ninche.

¹⁵Ore eyia, aisupati apa lelo tung'ana te iyiook, neitu iyiook kitum entorroni, neitu iyiook kilau toki apa kitii ong'ata, te nkata naba anaa enikishomo te nebo ninche;

¹⁶esuntai apa ninche te iyiook te nkewarie o te ndama, teina kata pooki apa nikitii iyiook te nebo ninche king'orita nkerra.

¹⁷Ore naa taata tayiolo ena nidamu eniaas; amu eitobirakita olkitok lang entorroni o enkaji enye pooki, naa kegogong ninye oleng meetae oltung'ani oidim airorie ninye.”

¹⁸Kaae neisarrisar Abigail, neya imukateni iip are, o lbenia oaare loo lonito le naisho oo sabibu o nkerra imiet naayieng'a, o ntemat imiet enkurma napejo o rridat iip loo sabibu, o mukateni iip are oo lng'abolo, neirragie ninche te nchumata oo sirkon.

¹⁹Nejoki ninye lelo barnot lenye, “Enchom enturuko te dukuya nanu; ng'ura, kalotu nanu asuju intae.” Kake eitu ninye eliki olpayian lenye Nabal.

²⁰Ore eloito ninye ekedito osikiria nedou alotu abori olmelil lo ldoinyo, ng'ura, nelotu Daudi, o ltung'ana lenyena aadou aanang'are ninye; nenang'are ninye ninche.

²¹Netejo apa Daudi, “Kesipa pesho apa nanu atorripo nena pooki naata ele tung'ani ti ong'ata neaku meetae entoki natalaki te nena pooki naara inenyena; naatushukoko ninye nanu entorroni te sidano.

²²Metaasa Enkai ena te Daudi, neitulusoo sii, te natung'uayie nanu tadekenya obo lee le lelo pooki oora ilenyena.”

²³Ore ake pee edol Abigail Daudi, neisarrisar ninye, nedou to sikiria, nebatata ninye te dukuya Daudi te nkomom enye, neirrugo abaiki enkop.

²⁴Nebatata ninye too nkejek enyena nejo, “Shumata nanu ake, olkitok lai, nchoo elotu entorroni; aatoomono nchoo esinka ino eiro too nkiyiaa inono, nining irorei le sinka ino.

²⁵Mincho olkitok lai eshilaa ele tung'ani le ntorroni, Nabal; amu ore anaa enatiu enkarna enye, neijia etiu ninye, Nabal enkarna enye, netii emodai te nebo ninye; kake ore nanu esinka ino eitu adol lelo barnot lo lkitok lai, laa ninche iyie irriwua,

²⁶ore naa taata, olkitok lai, anaa enaishu Olaitoriani, o anaa enaishu oltau lino, idolita ajo kimbooyie iyie Olaitoriani aitung'uaa enkibukoroto o sarge, o enkitalakunoto e lap te nkaina ino makewan, ore naa taata nchoo ilmang'ati linono o lelo ooing'oru aaitaas entorroni olkitok lai etiu anaa Nabal.

²⁷Ore taata ena kishooroto naa ninye eyaka esinka ino olkitok lai inchoo meishori lelo barnot oosuj olkitok lai.

²⁸Aatoomono tapalikiaki engolong'akinoto e sinka ino; amu kesipa keitaa Olaitoriani olkitok lai enkaji nauno, amu ilarrabali lo Laitoriani etii olkitok lai; nemetumi entorroni te iyie anaa ninchu.

²⁹Te nedumunye iltung'ana pee kisujaa iyie pee eing'oru enkishui ino, ore enkishui o lkitok lai naa keenari to rridata loo looishu te nking'urata o Laitoriani Enkai ino; ore enkishui oo lmang'ati linono nenang'aa ninye anaa osoit onang'ari te nkopito.

³⁰Ore ake pee eidip Olaitoriani aitaasa olkitok lai te risioroto e nena pooki sidain naairoro ninye tialo iyie, nikitegelua ninye taa olkitok te shumata Israel,

³¹metum olkitok lai enaitagor aashu enyamali o ltau, te nkibukoroto o sarge metii emporeet, aashu to lkitok lai eitalaku elap makewan. Ore ake pee kindip Olaitoriani aitaasa olkitok lai esidai, nidamu naa esinka ino.”

³²Nejoki Daudi Abigail, “Meisisi Olaitoriani, Enkai e Israel, laa ninye nikirriua iyie ena olong pee kinang'are nanu!

³³Metamayiani eng'eno ino, naa mikitamayiani iyie, aa iyie nikimbooyie nanu ena olong te nkibukoroto o sarge o te nkitalakunoto elap te nkaina ai makewan!

³⁴Amu ore te sipata anaa enaishu Olaitoriani Enkai e Israel, o laa ninye laaibooyie nanu eitu aaitame iyie, te neme eisarisarua iyie nikilotu anang'are nanu, kesipa ore tadekenya anaata eitu ninye elekakini Nabal hoo ninye olee obo.”

³⁵Neng'amu Daudi too nkaik eina kitok ina nayaka ninye nejoki ninye, “Ilepa shomo te seriani enkaji ino; ing'ura, atoning'o nanu oltoilo lino, naishorua nanu ina omonunoto ino.”

³⁶Nelotu Abigail enetii Nabal; naa, ng'ura eeta apa ninye osirua tiatua enkaji enye, anaa osirua lo laiguanani. Neng'ida apa oltau le Nabal tiatua ninye, amu etemere apa oleng; neaku eitu eliki ninye toki katukul o metaba anaa nekenyu awang'u.

³⁷Ore tadekenya eishunye emerai te Nabal, neliki ninye enkitok enye kuna baa, neye oltau lenye tiatua ninye, netiu ninye anaa osoit.

³⁸Ore too nkolong'i naabaya tomon te siadi neosh Olaitoriani Nabal; neye ninye.

³⁹Ore pee ening Daudi nchere etua Nabal, nejo ninye, “Metamayiani Olaitoriani o laa ninye oitalakua ina moroto apa natang'amua nanu te nkaina e Nabal, neibooyie ninye osinka lenye aitung'uaa entorroni; etushukoko Olaitoriani ina kiaas torrono enchumata endukuya enye makewan.” Neirriwaa Daudi iltung'ana pee esir Abigail aitaa ninye enkitok enye.

⁴⁰Ore ake pee epuonu isinkan le Daudi enetii Abigail te Karmel, nejoki ninche ninye, “Eirriua Daudi iyiook enitii pee kintaa iyie te ninye anaa enkitok enye.”

⁴¹Nedumunye ninye neirrugo te nkomom enye o metabaiki enkop, nejo, “Ng'ura, ore esinka ino naa enkaisaayiani naituku inkejek oo sinkan lo lkitok lai.”

⁴²Neisarrisar Abigail, nedumunye neked osikiria, neisiaai ninye inkaisiaayiak enyena imiet; nesujaa ninye lelo kiliku le Daudi, neaku enkitok enye.

⁴³Neitoki sii Daudi aya Ahinoam e Yesreel; neaku ninche pokira are inkituaak enyena.

⁴⁴Neishoo apa Saul Mikal, entito enye, ina kitok e Daudi, Palti olayioni le Laish, o laa olayioni le Galim apa ninye.