Read MAASAI REVISED PROTESTANT 1 Samuel 28 Bible Online

1 Samuel 28 - MAASAI REVISED PROTESTANT bible

1 Samuel 28

¹Ore apa te nena olong'i neiturrur Ilfilisti injoreitin enye te nkaraki olarrabal, pee earare Israel. Nejoki Akish Daudi, “Tayiolo nchere ore iyie o ltung'ana linono naa impang'ipang'a aapuo te nebo nanu tiatua enjore.”

²Nejoki Daudi Akish, “Aisidai oleng, iyiolou iyie enaidim osinka lino ataasa.” Nejoki Akish Daudi, “Aisidai oleng, kaaitaa nanu iyie olarriponi lai te nkishui pooki.”

³ Ore tena rishata netua apa Samuel, neidipa Israel pooki aishiraki ninye nenukaa ninye te Rama, te nkanasa enye kewan. Netaarayie apa Saul lelo aisi le yiolounoto o lasakutok meshomo teina kop.

⁴Neiturrurro Ilfilisti nepuonu aaitayu olng'obor te Shunam; neiturrur Saul Israel pooki, neitayu ninche olng'obor te Gilboa.

⁵Ore ake pee edol Saul enjore oo Lfilisti, neureishoyu neikirikira oltau lenye oleng.

⁶Ore pee eikilikuanishore Saul Olaitoriani, neitu ewaliki Olaitoriani ninye, aa te nkidetidet aashu te Urim, aashu too loibonok.

⁷Neitoki Saul ajoki isinkan lenyena, “Eng'urakaki nanu enkitok nadolisho te naibon, pee atum nanu ashomo enetii ninye naikilikuanishore ninye.” Nejoki isinkan lenyena ninye, “Etii enkaisi nadolisho te naibon Endor.”

⁸Neibelekeny Saul kewan neishop kulikae kilani, nelo, ninye o ltung'ana oaare te nebo ninye; nepuonu ninche enetii ina kitok kewarie. Nejo ninye, “Mbonokoki nanu te nkiyang'et, nikilepakinye nanu oltung'ani obo laaipotoki enkarna enye.”

⁹Nejoki ina kitok ninye, “Kesipa iyiolo ina nataasa Saul, ina naitaasa ninye iloibonok oodolisho, o lasakutok aipang'ie tena kop. Kainyoo naa pee kirragakinye nanu orreshet te nkaraki enkishui ai pee iyau keeya ai?”

¹⁰Kake einosaka Saul ninye olmumai to Laitoriani nejo, “Anaa enaishu Olaitoriani, melotu enkitamioto shumata iyie tena bae.”

¹¹Neitoki ina kitok ajo, “Kaing'ae aayaki ailepakinye?” Nejo ninye, “Iyau ilepakinyeki nanu Samuel.”

¹²Ore ake pee edol ina kitok Samuel neyietu aishir to ltoilo sapuk; nejoki ina kitok Saul, “Kainyoo iyie pee kiteleja nanu? Ira iyie Saul.”

¹³Nejoki olaiguanani ninye, “Miureshoyu iyie; kainyoo iyie idolita?” Nejoki ina kitok Saul, “Adolita nanu enkitaayayukoto e nkai eilepu apuku te nkop.”

¹⁴Nejoki Saul ninye, “Kaji eikununo ninye?” Nejo ninye, “Olpayian moruo oilepu alotu; neirina ninye to lkila.” Neyiolou Saul inchere Samuel ilo, neirrugo ninye te nkomom enye o metabaiki enkop, neserem.

¹⁵Nejoki Samuel Saul, “Kainyoo pee kintanyamal ailepunye nanu?” Newal Saul ajo, “Atii nanu atua osina sapuk, amu aaitirrishakita nanu Ilfilisti aarare, naaibelekenye Enkai aing'uaa nemeekure aawaliki, aa too loibonok aashu te nkidetidet, neaku aaipoto iyie pee kiliki enaas.”

¹⁶Neitoki Samuel ajo, “Kainyoo naa pee kinkilikuan nanu, aa Olaitoriani likimbelekenye aing'uaa neaku ninye olmang'atinta lino?

¹⁷Kintaasa iyie Olaitoriani anaa apa enairoro te nanu; amu etopolosayie Olaitoriani enkitoria aitung'uaa enkaina ino, neisho ilo le latia ino Daudi.

¹⁸Te nkaraki neitu iyie ining oltoilo lo Laitoriani, neitu intabaya ina goro enye napi aarare Amalek, neaku kintaasa iyie Olaitoriani ena bae ena olong.

¹⁹Ore ake sii keishooyo sii Olaitoriani Israel te nebo iyie apik atua enkaina oo Lfilisti; ore taisere iyie o layiok linono niakuku te nebo o nanu; naa kelo aishoru Olaitoriani enjore e Israel apik atua enkaina oo Lfilisti.”

²⁰Nebatata Saul nabo kata te nkop aitorriori eiputa enkuretisho te nkaraki irorei le Samuel; nemeekure apa etii engolon atua ninye, amu eitu ninye enya ae toki endama pooki o enkewarie pooki.

²¹Nelotu ina kitok enetii Saul, ore ake pee edol ajo eiputukunyo, nejoki ninye, “Ng'ura, kitoning'o iyie esinka ino; aitayio nanu enkishui ai te nkaina ai natoning'o ina nikitiaaka iyie nanu.

²²Ore naa taata, toning'o sii iyie esinka ino; nchooki nanu mairragie embelati e mukate te dukuya iyie; pee inya, pee itum engolon te nilo te nkoitoi ino.”

²³Neany ninye nejo, “Manya nanu endaa.” Kake etasayia isinkan lenyena ninye te nebo ina kitok, nening irorei lenye. Neaku neinyototo ninye te nkop neton te rruat.

²⁴Neeta apa ina kitok olashe opir ti aji, neyieng ninye asioki, neitayu enkurma, neipurjupurj nepeju imukateni neitu eisuishieki,

²⁵nepik dukuya Saul o laisiaayiak lenyena; nenya. Nedumunye ninche nepuo ina kewarie.