Read MAASAI REVISED PROTESTANT 1 Samuel 29 Bible Online

1 Samuel 29 - MAASAI REVISED PROTESTANT bible

1 Samuel 29

¹Neiturrurro apa Ilfilisti injoreitin enye pooki te Afek; ore Israeli neitayutuo apa ninche ilng'oborri te mbata e nkong'u e nkare natii atua Yesreel.

²Ore ilkituaak loo Lfilisti nepuo too maa iip o too nkalifuni, ore Daudi o ltung'ana lenyena nepuo ninche te siadi te nebo Akish,

³nejo ilkituaak le njore loo Lfilisti, “Kainyoo easita kulo Hebrania tene?” Nejoki Akish lelo kituaak le njore loo Lfilisti, “Aime Daudi ele, osinka le Saul, olaiguanani le Israel, otaa ninye te nebo nanu too nkolong'i o too larin, naa ore anaa neing'uaa ninye alotu enatii nanu eitu atum entorroni tiatua ninye o metabaiki ena olong.”

⁴Kake etagorokinote ilkituaak le njore oo lfilisti ninye; nejoki ninye ilkituaak le njore oo lfilisti, “Tushuko ele tung'ani, pee etum atorrinyoyu ashomo ewueji apa nitiaaka ninye; medoyio ninye alo te nebo iyiook olarrabal, meaku ake to larrabal olmang'atinta te iyiook. Amu kaji eiko ele tung'ani te neitayu osotua o lkitok lenye. Aime too lukuny e kulo tung'ana tene?

⁵Aime ele Daudi, ilo oshi oranyakino maate too sinkolioitin ejo: ‘Etaara Saul inkalifuni enyena, near Daudi inkalifuni tomon enyena!’ ”

⁶Neipotu Akish Daudi nejoki ninye, “Ore anaa enaishu Olaitoriani, isiligayu oshi iyie, ore te nanu kadol aa sidai te nilo apuku nijing te nebo nanu to larrabal, amu eitu nanu atum entoki torrono tiatua iyie ebaiki enkolong apa elotunoto ino niewuo enatii o metabaiki ena olong. Ore ake eyia mikinyorraa ilkituaak.

⁷Neaku tushukoyu shomo taata, naa shomo te seriani, pee mintagor ake ilkituaak loo Filistia.”

⁸Nejoki Daudi Akish, “Kake kaa nanu ataasa? Kainyoo iyie inoto to sinka lino ebaiki enkolong apa natijing'a enkisiaayiare ino o taata, nchere malo nanu aarare ilmang'ati lo kitok lai olaiguanani?”

⁹Newaliki Akish Daudi ajoki, “Kayiolo ajo miata eleyiata too nkonyek aainei anaa olmalaika le Nkai; ore ake eyia, etejo ilkituaak le njore loo lfilisti, ‘Meilep ninye alo te nebo iyiook olarrabal.’

¹⁰Ore naa tayooki tudumunye enkakenya te nebo o sinkan lo lkitok lino apa ooetuo te nebo iyie, nipuopuo anaa ake pee eiteru enkakeya awang'aki intae.”

¹¹Neaku eshomo Daudi o ltung'ana lenyena aayook tadekenya, aashuko aapuo enkop oo lfilisti. Kake eshomo Ilfilisti Yesreel.