Read MAASAI REVISED PROTESTANT 1 Samuel 30 Bible Online

1 Samuel 30 - MAASAI REVISED PROTESTANT bible

1 Samuel 30

¹Ore apa ina kata pee elotu Daudi o ltung'ana lenyena Siklag te nkolong e uni, netaara Ilmaleki Negeb o Siklag. Eisulie ninche Siklag nepejoo te nkima.

²Neya inkituaak o pooki ootii atua, ilooti o lkituaak; eitu ear hoo ng'ae metua, kake etanapa ninche aaya, nepuo enkoitoi enye.

³Ore ake pee elotu Daudi o ltung'ana lenyena ina anasa, neinepu etapejoki te nkima, ore inkituaak enye o layiok lenye o ntoyie enye netaraayioki aaya.

⁴Ore Daudi o ltung'ana apa ootii te nebo ninye neyietu aaishir o metaba anaa neaku meeta engolon naishirie.

⁵Ore inkituaak pokira are e Daudi newaki sii ninche aaraya, Ahinoam e Yesreel o Abigail ina oliai apa e Nabal le Karmel.

⁶Nenyamalu Daudi oleng; amu kejo iltung'ana pee enang ninye too soito, te nkaraki etamioto iltung'ana pooki too ltauja, oltung'ani ake too layiok lenyena o ntoyie enyena. Kake eitagolo Daudi kewan tiatua Olaitoriani Enkai enye.

⁷Nejoki Daudi Abiatar olapolosani, olayioni le Ahimelek, “Iyakaki nanu enkila dorrop.” Neaku eyaka Abiatar ina kila dorrop Daudi.

⁸Neikilikuanishore Daudi Olaitoriani, “Amaa, kasujaa nanu ele wuampa Kamir nanu ninche?” Newaliki ninye ninye, “Tusujai, amu kesipa imir, nesipa imitu akordu.”

⁹Neaku eshomo Daudi o lelo tung'ana iip ile apa ootii te nebo ninye nepuonu ninche oreyiet te Besor, ina netonie lelo ooing'uari te siadi.

¹⁰Kake eshomo Daudi agiroo ine te sujaroto, ninye o ltung'ana iip ong'uan; netoni iltung'ana iip are te siadi, lelo apa oonaurate oleng leitu eidim aatalang oreyiet le Besor.

¹¹Netum ninche Olmisiri te nkop naisiasha, neyau ninye enetii Daudi; neisho ninche emukate nenya ninye, neisho enkare naok,

¹²neisho ninche ninye embelati e mukate oo lng'abolo o nkimarrat are oo sabibu. Ore ake pee enya ninye, nepiu oltau lenye; amu eitu apa ninye enya endaa aashu eok enkare too nkolong'i uni o nkewarietin uni.

¹³Nejoki Daudi ninye, “Aira iyie oleng'ae? Naa kaji iyie ing'uaa?” Nejo ninye, “Ara nanu olbarnoti le Misiri, osinka lo Lamaleki; naatung'uayie nanu olkitok te nkaraki natamuoyia too nkolong'i uni naatulusoitie.

¹⁴Kitaara apa iyiook Negeb oo Lkerite o ina nara ene Yuda o Negeb e Kaleb; nikipejoo Siklag te nkima.”

¹⁵Nejoki Daudi ninye, “Aikirik enetii ilo wuampa?” Nejo ninye, “Inosakaki nanu olmumai te Nkai, nchere mikiar matua, aashu kiya nanu apik atua inkaik o lkitok lai, naa kaarik enetii ele wuampa.”

¹⁶Ore ake pee eaku etoriko ninye aitadoyio, ng'ura, eidapashate ninche te nkop pooki, edaa neokisho neranyisho, te nkaraki nena tokitin kumok naataarutua te nkop oo Filistia o te nkop e Yuda.

¹⁷Near Daudi ninche aiteru teipa o metabaiki enteipa e nkae olong. Neitu eisik hoo obo lenye, meteleku ilbarnot iip ong'uan apa ookedito intamesin neisik.

¹⁸Nerrinyu Daudi nena pooki apa naataaraitie Ilmaleki; nekordu Daudi inkituaak enyena pokira are.

¹⁹Neitu eimin toki aa kiti o aa sapuk, ilayiok aashu intoyie, imasaa aashu ae toki apa nawaki; eyaua Daudi ashuku pooki.

²⁰Eibung'a sii apa Daudi nkerrai pooki o nchoo; nereu iltung'ana nena shoo te dukuya ninye, nejo, “Iyarunot e Daudi kuna.”

²¹Neitoki Daudi alotu enetii lelo tung'ana apa iip are oonaurate oleng neitu esuj Daudi, neing'uari apa ninche to erata le Besor; neipang ninche aapuo aanang'are Daudi nenang'are lelo tung'ana apa ootii te nebo ninye; ore pee elotu Daudi anyikaki iltung'ana neiroroki ninche.

²²Ore lelo pooki arruok o ltung'ana oora pesho apa ooshomo te nebo Daudi nejo, “Ore te nkaraki neitu ninche epuo te nebo iyiook, mikincho iyiook ninche toki e kuna yarunot nikitushukutuo, meteleku ake nchere keidim pooki ng'ae atoriko enkitok enye o nkera, nelo.”

²³Kake etejo Daudi, “Minkoko neijia, ilalashera laainei, teina naishoo iyiook Olaitoriani; etagolie ninye iyiook neishoru apik atua enkaina ang ilo wuampa apa oewuo aar iyiook.

²⁴Kaing'ae oinining intae tena bae? Amu ore anaa enatiu erubata e ilo olo olarrabal, neijia sii etiu erubata e ilo oton too lolan keng'ar ninche aaitoris.”

²⁵Ore ebaiki ina olong neito dukuya neitaa ina inkiguanat o nkitanapat te Israel o metabaiki ena olong.

²⁶Ore pee elotu Daudi Siklag, neiteng'el embata oo yarunot pee eisho ilchoreta lenyena, ilpayiani le Yuda; nejo, “Nena enkishooroto te intae naing'uaa nena naaruno too lmang'ati lo Laitoriani;”

²⁷ene lelo ootii Betel o lootii Ramot e Negeb te Yatir,

²⁸ootii Aroer o Sifmot o Eshtemoa,

²⁹otii Rakal atua inkanas oo Ljerahami, o nkanas oo Lkeni,

³⁰ootii Horma o Borashan o Atak,

³¹ootii Hebron, too wuejitin pooki neeshomo Daudi o ltung'ana lenyena.