Read MAASAI REVISED PROTESTANT 1 Samuel 5 Bible Online

1 Samuel 5 - MAASAI REVISED PROTESTANT bible

1 Samuel 5

¹Ore ake pee eibung Ilfilisti ilo sanduku le Nkai, nenap ebaiki Ebenesa o metabaiki Ashdod.

²Neya Ilfilisti ilo sanduku le Nkai nepik atua enkaji e Dagon neitatashaki Dagon.

³Ore ake pee eyooki aainyototo iltung'ana le Ashdod, nedol etusulari Dagon te nkomom aosh enkop te dukuya ilo sanduku lo Laitoriani. Neya ninche Dagon neinyaaki ewueji enye.

⁴Kake ore ake pee einyototo aayooki ti ae olong, nedol etusulari Dagon te nkomom aosh enkop te dukuya ilo sanduku lo Laitoriani; ore endukuya e Dagon o nkaik enyena pokira are neirragita maate te mbata e kutukaji; osesen ake le Dagon etung'uayioki.

⁵Te nkaraki ena pee aa ore ilapolosak le Dagon o pooki oojing ina aji e Dagon nemeroro embata e kutukaji e Dagon te Ashdod o metabaiki ena olong.

⁶Keiroishi apa enkaina o Laitoriani te Shumata iltung'ana le Ashdod, neitame ninche, neisomit ninche too ldututa, Ashdod o ina kop namanita.

⁷Ore ake pee edol iltung'ana le Ashdod eneikununo mbaa, nejo ninche, “Meton osanduku le Nkai oo Siraeli te nebo iyiook; amu keiroishi enkaina enye te shumata iyiook o te shumata Dagon, enkai ang.”

⁸Neirriwaa ninche ilkiliku neiturrur te nebo ilkituaak pooki loo Lfilisti, nejo, “Kaa kintaas osanduku le Nkai oo Siraeli?” Newal ninche, ejo “Inchoo osanduku le Nkai oo Siraeli eyauni aaitamanu Gas.” Neyau ninche osanduku le Nkai oo Siraeli ine.

⁹Kake ore ake pee eyau aaitamanu, near enkaina o Laitoriani ina anasa ayau enkuretisho sapuk, neitame ninye lelo tung'ana le ina ang, ilooti o lbotoro, o metaa eibulaitie ildututa te ninche.

¹⁰Neirriwaa ninche ilo sanduku le Nkai Ekron. Kake ore ake pee elotu osanduku le Nkai Ekron, neyietu iltung'ana le Ekron aaishir ejo, “Eyautua ninche aaitaman iyiook osanduku le Nkai oo Siraeli pee ear iyiook matuata o iltung'ana lang.”

¹¹Neirriwaa ninche ilkiliku neiturrur te nebo ilkituaak loo Lfilisti, nejo, “Ewaita ele sanduku le Nkai oo Siraeli, enchoo eshuko alo ewueji enye makewan, pee memut ake iyiook o ltung'ana lang.” Amu etii apa enkuretisho e keeya atua ina ang pooki. Keiroishiu apa enkaina e Nkai teine oleng;

¹²ore iltung'ana leitu eye nejing ildututa, ore olkiyioi le ina ang neilep alo keper.