Read MAASAI REVISED PROTESTANT 1 Samuel 6 Bible Online

1 Samuel 6 - MAASAI REVISED PROTESTANT bible

1 Samuel 6

¹Etii apa ilo sanduku lo Laitoriani enkop oo Filistia ilapaitin oopishana.

²Neipotu Ilfilisti ilapolosak o lamusumusok nejo, “Kaa kintaas ele sanduku lo Laitoriani? Entoliki iyiook entoki nikiyayie ewueji enye.”

³Nejo ninche, “Tiniyaya intae aashuk ilo sanduku le Nkai oo Siraeli, emiyaya ake erok, kake entayiolo ake pee ishorikiki ninye olasar le nkitarruorroto pee eishiunyeki intae, neyiolouni te intae aajo kainyoo pee meibelekenya enkaina enye tialo intae.”

⁴Nejo ninche, “Kainyoo ilo asar le nkitarruorroto likishukoki iyiook ninye?” Newalu ninche aajo, “Ildututa imiet le saabu o ndero imiet e saabu, anaa esiana oo lkituaak loo Lfilisti; amu etii apa shumata intae olmeitai otiu anaa ele o shumata ilkituaak linyi.

⁵Metaa meeta inchere pee mintayuyu nkitanyaanyukot oo ldututa linyi o inkitanyaanyukot oo ndero inyi naainyal enkop, ninchosho enkitoo Enkai oo Siraeli; amu ebaiki neiteneneng ninye aitung'uaa intae o nkaitin inyi o enkop inyi.

⁶Kainyoo pee intagoligolo intae iltauja linyi anaa apa enaitagolo Ilmisiri o Farao iltauja lenye? Amaa pee eidip ninye atekeshare ninche, keitu ninche eisho iltung'ana meshomo, nedumunye ninche aapuo?

⁷Ore naa taata ewaita nintobiribiri engarri ng'ejuk o nkishu naalepo are neitu aekata epiki inkeek oo murto imurto niyenikiki nena kishu engarri, kake ewaita ilasho lenye ang, aaitalamaa teine netii ninche.

⁸Niyaya ilo sanduku lo Laitoriani ninteleikiki ina garri, nepiki atua ilo sanduku enchoto enye nabo nena kitanyaanyukot e saabu, naa ninche ishukoki ninye anaa olasar le nkitarruorroto. Nireureu ninye, nipalipala meshomo openy.

⁹Ning'oring'oro; te neilep ninye aibung enkoitoi nalo enkop enye kewan, alo Bet-shemesh, naa ninye ilo oitaasa iyiook ena taboi; Kake te neme neijia, nikiyiolou iyiook inchere mme enkaina enye natoosho iyiook, ketotiuo ake duoo neijia te iyiook to lbuket.”

¹⁰Neiko neijia iltung'ana, neya inkishu are naalepo neeniki ninche ina garri, neikenoo ilasho lenye ti ang.

¹¹Nepik ninche ilo sanduku lo Laitoriani eng'arri, o ilo sanduku te nebo indero e saabu o inkitanyaanyukot oo ldututa lenye.

¹²Nepuo nena kishu aaitoriori enkalo e Bet-shemesh aaibung enkoitoi naporo neru epuoito; nemeibelekeny enkalo aapuo tatene aashu aapuo kedianye; ore ilkituaak loo Lfilisti nesujaa ninche o metabaiki olpolosie le Bet-shemesh.

¹³Ore ina kata neikesa iltung'ana le Bet-shemesh enkano to erata; ore ake pee eshumu inkonyek enye nedol osanduku lo Laitoriani neng'idayu pee edol ninye.

¹⁴Nelotu ina garri atua enkurma e Yoshua le Bet-shemesh Neitashe teine. Netii apa osoit sapuk ine, neiper apa ninche inkeek e ina garri neitayu nena kishu anaa olasar opejori to Laitoriani.

¹⁵Neitadou Ilawi ilo sanduku lo Laitoriani o ilo sanduku otashare, laa ninye etii atua nena kitanyaanyukot e saabu, neirragie ninche te nchumata o soit sapuk; ore iltung'ana le Bet-shemesh neitayu ilasarri oopejori nepolosaki ilasarri Olaitoriani ina olong.

¹⁶Ore ake pee edol lelo kituaak loo Lfilisti ina, neshuko ninche ina olong aapuo Ekron.

¹⁷Kulo ninche lelo dututa le saabu ootushukutuo Ilfilisti anaa olasar le nkitarruorroto to Laitoriani: obo le Ashdod, obo le Gasa, obo le Ashkelon, obo le Gas, obo le Ekron;

¹⁸ore sii nena dero e saabu, naa te risioroto oo nkang'itie oo Lfilisti e lelo kituaak pokira imiet, inkang'itie naasheta sunta o inkang'itie kutiti nemeeta sunta. Ore ilo soit sapuk, apa laa ninye eiteleikiaki ilo sanduku lo Laitoriani, naa shakenisho ebaiki ena olong tiatua enkurma e Yoshua olayioni le Bet-shemesh.

¹⁹Near Olaitoriani metuata embata oo ltung'ana le Bet-shemesh, te nkaraki naing'ura ninche atua ilo sanduku lo Laitoriani; near ninye metuata iltung'ana intomoni naapishana te ninche, neishir iltung'ana te nkaraki naitayio Olaitoriani emutata kitok tiatua iltung'ana.

²⁰Nejo iltung'ana le Bet-shemesh, “Kaing'ae oidim aitasho te dukuya Olaitoriani, ena Ai sinyati? Kaing'ae eyakini pee eilep alo aing'uaa iyiook?”

²¹Neirriwaki ninche ilkiliku lelo oomanya Kiriat-Yearim, ejo, “Etushukutuo Ilfilisti osanduku lo Laitoriani. Entadou wootu ewaita enitii.”