Read MAASAI REVISED PROTESTANT 1 Samuel 7 Bible Online

1 Samuel 7 - MAASAI REVISED PROTESTANT bible

1 Samuel 7

¹Nepuonu iltung'ana le Kiriat-Yearim, neilepie ninche aaya ilo sanduku lo Laitoriani neyau ninye enkaji e Abinadab te nchumata oldoinyo; neitisiny ninche olayioni lenye Eliesa, pee etum enkitasheikinoto e ilo sanduku lo Laitoriani.

²Ore ebaiki ina olong apa nairragieki osanduku lo Laitoriani te Kiriat-Yearim, netulusoyie enkata naado, enkata oo larin tikitam, ore enkaji pooki e Israel neishiraki Olaitoriani.

³Nejoki Samuel enkaji pooki e Israel, “Tenaa ishukunyenye aapuonu enetii Olaitoriani to ltau linyi pooki, ewuangie naa nena aitin oo loreren o ina Ashtarot entung'uai ate, nintoriokiki oltau linyi Olaitoriani, nisiaayiayia ninye ake, naa keitajeu ninye intae aitung'uaa enkaina oo Lfilisti.”

⁴Neiwuang'ie Isiraeli inkitanyaanyukot oo nkaitin naaji baal o Astorot, neisiaai ninche Olaitoriani ake.

⁵Neitoki Samuel ajo, “Enturrurro Isiraeli pooki te Mispa, pee aomon nanu Olaitoriani te nkaraki intae.”

⁶Neiturrurro ninche te Mispa, neoku enkare neibukoo ina are te dukuya o Laitoriani ina olong, neen ate aaitupukoo teina olong. Nejo ninche kitaasa eng'oki to Laitoriani. Neiguanaki Samuel iltung'ana le Israel te Mispa.

⁷Ore ake pee ening Ilfilisti nchere eiturrurrote iltung'ana le Israel te Mispa, neilepu ilkituaak loo Lfilisti aapuo aarare Israel. Ore ake pee ening iltung'ana le Israel ina neureyu Ilfilisti oleng.

⁸Nejoki iltung'ana le Israel Samuel, “Migira ake eitu inchiraki Olaitoriani Enkai ang te nkaraki iyiook, pee etum ninye aitajeu iyiook aitung'uaa enkaina oo Lfilisti.”

⁹Neya Samuel olkuoo oleporeki nepolos anaa olasar opejori pooki to Laitoriani; neishiraki Samuel Olaitoriani te nkaraki Isiraeli, newaliki Olaitoriani ninye.

¹⁰Ore eitayu Samuel olasar opejori, nenyiku Ilfilisti pee earare Israel: kake etadara Olaitoriani to ltoilo sapuk adaraki Ilfilisti nenang'aki ninche atua olmilo; neilanyisho aaisik te dukuya Israel.

¹¹Neipang iltung'ana le Israel te Mispa nesujaa Ilfilisti, nemut ninche o metabaiki abori Bes-kar.

¹²Neitoki Samuel adumu osoit neirragie te rishata e Mispa o Yeshana, nejo enkarna enye Ebenesa; amu etejo ninye, “Ore otene etareto iyiook Olaitoriani.”

¹³Nemiri Ilfilisti neitu eigil aajing enkop oo Siraeli. Nearare enkaina o Laitoriani Ilfilisti too nkolong'i pooki e Samuel.

¹⁴Ore inkanas e Israel apa naawaita Ilfilisti neshukokini Israel, ebaiki Ekron o metabaiki Gat; nekordu Israeli enkop enye aaitung'ua enkaina oo Lfilisti. Netii apa eseriani erishata e Israel o Lamori.

¹⁵Neaku Samuel olarishani te Israel too nkolong'i pooki enkishui enye.

¹⁶Nelo ninye amanaa to lari o to lari alo Betel o Gilgal o Mispa; neiguanaki ninye Israel te kuna wuejitin pooki.

¹⁷Paa keshuko alo Rama, amu ine apa etii enkanasa enye, naa teine sii apa eiguanaki Isiraeli arish. Neshetaki ninye teine Olaitoriani olperere lo lasar.