Read MAASAI REVISED PROTESTANT 1 Samuel 8 Bible Online

1 Samuel 8 - MAASAI REVISED PROTESTANT bible

1 Samuel 8

¹Ore ake pee emoruau Samuel neitaa ilayiok lenyena ilarishak te Israel.

²Ore enkarna e ilo ayioni lenye kikau naa Yoel, ore enkarna o liare, neji Abija; neiguana apa ninche te Beer-sheba.

³Ore eyia eitu apa eibung lelo ayiok lenyena inkoitoi enyena, kake eibelekenyate aasujaa dupoto; neng'amaa ninche intokitin e ropare neboin esipata.

⁴Neitoki ilpayiani pooki loo Siraeli aaiturrurro te nebo nepuonu enetii Samuel te Rama,

⁵nejoki ninye, “Ng'ura, ira iyie moruo, ore ilayiok linono nemepuo too nkoitoi inono; ore naa taata tegelaki iyiook olaiguanani pee eitore iyiook anaa nkuapi pooki.”

⁶Kake eitu eitiship ina bae Samuel ina kata pee ejo ninche, “Inchoo iyiook olaiguanani pee eitore iyiook.” Neomon Samuel Olaitoriani.

⁷Nejoki Olaitoriani Samuel, “Toning'o oltoilo loo ltung'ana te nena pooki nikijoki ninche iyie; amu eitu ninche kiany iyie, kake aatanyaita ninche nanu pee maitoki aaku olaiguanani lenye.

⁸Ore te risioroto oo nkiaasin pooki naaitaasa ninche nanu, ebaiki ina olong apa nayawua ailepunye aitung'uaa Misiri o metabaiki ena olong, aaing'uaa nanu, neisiai kulie aitin, metaa easita sii ina te iyie.

⁹Ore naa taata, toning'o oltoilo lenye; nabo ake, nkoo ninche tuunoki, nintodol ninche inkoitoi e ilo aiguanani ooyooki aitore ninche.”

¹⁰Neliki Samuel irorei pooki lo Laitoriani lelo tung'ana ooikilikuanu olaiguanani te ninye.

¹¹Nejo ninye, “Kuna eas ilo aiguanani oyooki aitore intae; keya ninye ilayiok linyi, negelaki ingarrin enyena neaku ilakedok loo mbartan enyena, neipirri ninche te dukuya ingarrin enyena;

¹²negelu te nkaraki kewan enye ilarikok loo nkalifuni o larikok loo maa onom, o kulikae pee etur enkurma enye o kulikae pee eikes enkurma enye, neitobir sii imasaa olarrabal o ntokitin oo ngarrin enyena.

¹³Neya ninye intoyie inyi aitaa nkaitobirak oo sonkoyoni, o nkayiarak o nkapejok oo mukateni.

¹⁴Neya ninye eneisul too nkurman inyi, o too sabibu o nkurman oo loirienito neisho ninche isinkan lenyena.

¹⁵Neya ninye ematua e tomon oo ntapa inyi o enoo sabibu neisho ninche ilkituaak lenyena o isinkan lenyena.

¹⁶Neya ninye isinkan linyi lewa o nkaisiaayiak inyi, o nkishu inyi naaisul, o sirkon linyi, nepik ninche esiaai enye.

¹⁷Neya ninye ematua e tomon oo nkerra inyi, niakuku intae irrindiki lenyena.

¹⁸Ore kenya ina olong niyietutu aaishir te nkaraki olaiguanani linyi, laa ninye itegelakita ate; kake meng'amaa kenya intae Olaitoriani teina olong.”

¹⁹Kake etanyaita iltung'ana einining ilo toilo le Samuel; nejo ninche, “A'a! Kake aikiyeu ake iyiook olaiguanani oitore iyiook,

²⁰pee kitum sii iyiook aatotiu anaa inkuapi pooki, netum sii olaiguanani lang aitoria iyiook, nerikoo ninye iyiook, nearisho ninye too larrabali lang.”

²¹Ore ake pee eidip Samuel atoning'o irorei pooki loo ltung'ana, nelimu ninche pooki too nkiyiaa o Laitoriani.

²²Nejoki Olaitoriani Samuel, “Toning'o oltoilo lenye, nigelaki ninche olaiguanani.” Neitoki Samuel ajoki iltung'ana le Israel, “Shomo pooki tung'ani enkanasa enye.”