Read MAASAI REVISED PROTESTANT 1 Samuel 9 Bible Online

1 Samuel 9 - MAASAI REVISED PROTESTANT bible

1 Samuel 9

¹Etii apa oltung'ani le Benchamen oji enkarna enye Kish, olayioni le Abiel, olayioni le Seror, olayioni le Bekoras, olayioni le Afia, Olbenchameni, oltung'ani karsis oleng.

²Neeta apa olayioni oji enkarna enye Saul, ilo barnoti oikishiaan. Metii apa oltung'ani tiatua iltung'ana pooki le Israel olang ninye te nkishaa; ebaiki ironyi lenyena neilep neado apa ninye alang pooki tung'ani.

³Neimin apa isirkon le Kish, menye Saul. Nejoki Kish Saul olayioni lenye, “Toriko obo loo sinkan te nebo iyie, nidumunyenye, aapuo aing'oru isirkon.”

⁴Neim ninche enkop oo ldoinyo e Efraim neim enkop e Shalisha, kake eitu ninche etum. Neitoki ninche aaim enkop e Shaalim kake metii apa ine. Neitoki ninche aaim enkop e Benchamen, kake eitu etum ninche.

⁵Ore ake pee epuonu ninche enkop e Suf, nejoki Saulo ilo sinka lenye apa otii te nebo ninye, “Wou, maape aashuko mepal ake papaai lai enadamu isirkon neaku iyiook edamu.”

⁶Kake etiaaka, “Ng'ura, etii oltung'ani le Nkai ena ang, naa oltung'ani oyanyiti; ore ina pooki najo ninye nesipayu. Maape iyiook ine; ebaiki neliki ninye iyiook inaaipirta ena lototo nikitii.”

⁷Neitoki Saul ajoki ilo sinka lenye, “Kake amaa ti nikipuo, kainyoo iyiook kiyaki ilo tung'ani? Amu eishunye imukateni naatii atua ilbenia lang, nemetii enkishooroto nikiyaki ilo tung'ani le Nkai. Kainyoo kiata iyiook?”

⁸Neitoki ilo sinka awaliki Saul ajoki, “Ore tene, aata nanu ematua e ong'uan e shekel enkosholai; naa kaisho ilo tung'ani le Nkai, pee eliki iyiook enkoitoi ang.”

⁹Ore apa te Israel, te nelo oltung'ani aikilikuanisho tialo inaaipirta Enkai, nejo ninye, “Wootu maapeiti enetii oladuaani,” amu ore ilo taata oji oloiboni naa keji apa oladuaani.

¹⁰Nejoki Saul osinka lenye, “Enkiroroto sidai, wou maape.” Nepuo ninche ina ang apa natii ilo tung'ani le Nkai.

¹¹Ore eilepaki oldoinyo aapuo ina ang, nenang'are ninche iselenken aisiaayiak eipang'u aapuonu aaoku enkare, nejoki ninche, “Ketii oladuaani ene?”

¹²Newalu ninche, “Etii, ng'ura, etii ninye dukuya intae. Esarisara; eewuo ninye tena kata ang, amu eeta taata iltung'ana olasar te wueji e shumata.

¹³Ore ina kata ake ti nijing'ijing'i enkanasa nitumutumu intae ninye, eton eitu elo eilep alo ine wueji neika anya endaa; amu menya iltung'ana endaa o metaba anaa nelotu, aa keng'as ninye amayian olasar; ore te siadi nenya endaa lelo ooitoomonoki. Elepa taata enchom, amu ipuopuo aainepu ninye aasioki.”

¹⁴Neilep ninche aapuo ina anasa. Ore ejing'ita ninche ang, nedol ninche Samuel eipang'u alotu anang'are ninche eloito ailep alo ine wueji e shumata.

¹⁵Ore apa eton eitu elotu Saul, netaboloko Olaitoriani Samuel:

¹⁶“Ore taisere enyikita ena saa naairriwaki nanu iyie oltung'ani oing'uaa enkop e Benchamen, naa ibukoki iyie ninye eilata aput pee eaku olkitok oitore iltung'ana laainei Isiraeli. Neitajeu ninye iltung'ana laainei aitung'uaa enkaina oo Lfilisti; amu atoduaa nanu osina loo ltung'ana laainei, amu eewuo olkiyioi lenye enatii nanu.”

¹⁷Ore ake pee edol Samuel Saul, nejoki Olaitoriani ninye, “Nele oltung'ani laa ninye aatolikio iyie! Ninye ilo olo aitore iltung'ana laainei.”

¹⁸Netaaniki Saul Samuel te kishomi, nejo, “Tolikioki nanu enetii enkaji o laduani.”

¹⁹Newaliki Samuel Saul, “Kara nanu oladuaani; ilepa shomo te dukuya nanu ine wueji e shumata, amu ore taata inya iyie endaa te nebo nanu, ore tadekenya naayooki aisho iyie shomo naaliki iyie nena pooki naatii indamunot inono.

²⁰Ore te lelo sirkon linono ooimina inkolong'i uni naatulusoitie, mintoki adamu ninche, amu eidipaki aanoto. Naa kaing'ae ilo oyieuni tiatua Israel pooki? Aime iyie o enkaji e papaai lino pooki?”

²¹Newalu Saul, “Eimara nanu Olbenchameni, ilo osho kiti oleng too loshon le Israel? Aime kiti oleng, olmarei lang alang ilmareita pooki lo losho le Benchamen? Kainyoo naa pee kirorie iyie nanu tena oitoi?”

²²Nerik Samuel Saul o ilo sinka lenye neyau ninche atua aji neisho ninche ewueji te dukuya lelo pooki ooitoomonoki, nebaya apa lelo tung'ana tomoni uni.

²³Nejoki Samuel olayierani, “Iyau erubata duoo naaishoo, naa ninye aatiaaka iyie inteng'ela.”

²⁴Neyau olayierani emuro o enkiring'o naibung'are neirragie ninche te dukuya Saul; nejo Samuel, “Toduaa ajo ore ina duoo natushumaki neirragieki te dukuya iyie. Inosa amu iyie duoo etushumakaki o metabau esaa natudung'uoki, pee itum ainosa te nebo ilomon.”

²⁵Nedaa Saul te nebo Samuel ina olong. Ore ake pee edou ninche aaing'uaa ine wueji e shumata aapuonu ina anasa, eitobirakaki Saul endapash te nchumata enkaji neirrag ninye airura.

²⁶Ore enasirie neipot Samuel Saul te nchumata e nkaji ajoki, “Inyo, pee aatum airriwai iyie te nkoitoi ino.” Neinyototo Saul, ore ninye o Samuel neipang aapuo enkoitoi.

²⁷Ore epuoito ninche auluo ina ang, nejoki Samuel Saul, “Tiaaki ele sinka meituruko alo dukuya iyiook, ore eidipa aituruko, intasho iyie tene te nkiti rishata, pee atum aibalunye te iyie ororei le Nkai.”