Read Lamkang Битие 11 Bible Online

Битие 11 - Lamkang bible

Битие 11

¹По целата земја имаше еден јазик и еден говор.

²А кога отидоа од исток, најдоа рамнина во земјата Сенарска, та се населија таму.

³И си рекоа муѓе себе: »Ајде да правиме тули и на оган да ги печеме!« И имаа тули наместо камен и смола земјана наместо вар.

⁴Потоа рекоа: »Сега да соѕидаме град и кула, висока до небото; и да се здобиеме со име, пред да се растуриме по лицето на целата земја!«

⁵Тогаш Господ се спушти да го види градот и кулата, што ги ѕидаа синовите човечки.

⁶И рече Господ: »Ете, еден народ се и сите имаат еден јазик, но еве што почнале да прават; и нема да се откажат да го направат тоа, што го наумиле.

⁷Ајде да слеземе и да им го збркаме јазикот нивни за да не се разбираат еден со друг што зборуваат!«

⁸И така Господ ги растури оттаму по целата земја, и престанаа да го ѕидаат градот и кулата.

⁹Затоа тој се нарече Вавилон, зашто таму го збрка Господ јазикот на целата земја и оттаму ги растури Господ по целата земја.

¹⁰Ова е родословот Симов: Сим имаше сто години кога го роди Арфаксада, две години по потопот.

¹¹И откако го роди Арфаксада, поживе Сим петстотини години, раѓајќи синови и ќерки, и умре.

¹²А Арфаксад поживе сто триесет и пет години и го роди Сала.

¹³По раѓањето, пак, на Сала, Арфаксад поживе четиристотини и три години, раѓајќи синови и ќерки, и умре.

¹⁴Сала поживе сто триесет години и го роди Евера.

¹⁵А, откако го роди Евера, Сала поживе четиристотини и триесет години, раѓајќи синови и ќерки.

¹⁶Евер поживе сто триесет и четири години, и го роди Фалека.

¹⁷По раѓањето на Фалека, Евер поживе четиристотини и седумдесет години, раѓајќи синови и ќерки, и умре.

¹⁸А Фалек поживе сто и триесет години и го роди Рагава.

¹⁹А, откако го роди Рагава, Фалек поживе двесте и девет години, раѓајќи синови и ќерки, и умре.

²⁰Рагав поживе сто и триесет и две години и го роди Серуха;

²¹а откако го роди Серуха, Рагав поживе двесте и седум години, раѓајќи синови и ќерки, и умре.

²²Серух поживе сто и триесет години и го роди Нахора;

²³По раѓањето на Нахора, Серух поживе двесте години, раѓајќи синови и ќерки, и умре.

²⁴Нахор, пак, поживе седумдесет и девет години и го роди Тара;

²⁵но штом го роди Тара, Нахор поживе сто и деветнаесет години, раѓајќи синови и ќерки, и умре.

²⁶Тара поживе седумдесет години и го роди Аврама, Нахора и Арана.

²⁷А еве го родословот на Тара: Тара го роди Аврама, Нахора и Арана; а Аран го роди Лота.

²⁸И Аран умре пред таткото свој Тара во родната земја, во Ур Халдејски.

²⁹А Аврам и Нахор се оженија; името на жената Аврамова беше Сара, а на жената Нахорова името ѝ беше Мелха, ќерка на Арана, татко на Мелха и Есха.

³⁰Сара беше неплодна и немаше пород.

³¹И го зеде Тара синот свој, Аврама, и внукот од синот свој, Лот, син Аранов, и Сара, снаата своја, жената на неговиот син Аврам; па излегоа заедно од Ур Халдејски за да појдат во земјата Хананска; и дојдоа до Харан, каде што се и населија.

³²И поживе Тара сѐ на сѐ двесте и пет години; и умре Тара во Харан.