Read Lamkang Битие 14 Bible Online

Битие 14 - Lamkang bible

Битие 14

¹Во она време сенарскот цар Амарфал, еласарскот цар Ариох, еламскиот цар Ходологомор и гоимскот цар Таргал,

²сите тие цареви завојуваа против содомскот цар Вал, против гоморскиот цар Варса, против адамскот цар Сенар, севоимскот цар Симовор и со царот на Валак, односно Сигор.

³Сите тие се собраа во долината Сидим, која е сега Солено Море.

⁴Дванаесет години му служеа на Ходологомор, а во тринаесеттата се побунија.

⁵Во четиринаесеттата дојде Ходологомор и царевите, кои беа со него, па ги поразија џиновите во Астарот и во Карнаим, Зузејците во Хам, Омејците во долината Каријатим,

⁶И Хорејците во гората нивна Сеир, дури до рамнината Ел Фаран, која се наоѓа покрај пустињата.

⁷А кога се вратија оттаму, дојдоа до изворот Мисфат, односно Кадис, и ја опустошија целата област Амаликитска, како и Аморејците, кои живееја во Асасах — Тамар.

⁸Тогаш излегоа царот содомски и царот гоморски, царот адски, царот севоимски и царот од Валака, односно Сигор, и појдоа во борба против нив во долината Сидим,

⁹против Ходологомор, царот еламски, и Тагар, царот гоимски, и Амарфал, царот сенарски, и Ариох, царот еласарски; четири цара против пет.

¹⁰Во долината Сидим имаше, пак, многу јами, од кои се вадеше смола. И побегнаа царот содомски и царот гоморски, и паднаа во нивни плен; а другите избегаа во планините.

¹¹И го зедоа целиот имот на Содом и Гомор и сета храна нивна, па си отидоа.

¹²Го зедоа и Лота, братанецот Аврамов, кој живееше во Содом, и богатството негово, и си отидоа.

¹³А еден од оние, што се беа избавиле, дојде и му се јави на Евреинот Аврам, кој тогаш живееше при дабот Мамре, Амореецот, брат Есколов и брат Абнанов, Аврамови сојузници.

¹⁴А кога Аврам чу дека му е заробен братанецот Лот, ги вооружа слугите свои, триста и осумнаесет, кои се родија во неговата куќа, и тргнаа во потера до Дан.

¹⁵Тука ги распореди своите и удри на нив ноќе, со слугите свои, и ги разби, и ги гонеше до Ховал, кој е лево од Дамаск.

¹⁶И го поврати целиот имот содомски; го врати и Лота, братанецот свој, со богатството негово, и жените и народот.

¹⁷А царот содомски му излезе во пресрет, кога се врати, откако го разби Ходологомор и царевите, што беа со него, во долината Савин, која е сега Долина на царевите.

¹⁸И Мелхиседек, царот салимски, изнесе леб и вино; а тој беше свештеник на Севишниот Бог,

¹⁹па го благослови Аврама, велејќи: »Благословен да е Аврам од Севишниот Бог, Создателот на небото и земјата!

²⁰Благословен да е и Севишниот Бог, Кој ги предаде непријателите твои во рацете твои!« И му даде Аврам десетти дел од сѐ.

²¹А царот, пак, содомски му рече на Аврама: »Дај ми ги мене луѓето, а имотот земи си го за себе!«

²²Но Аврам му рече на царот содомски: »Ја кревам раката своја кон Севишниот Господ Бог, Создател на небото и земјата,

²³дека ни конец, ниту, пак, ремен од обувки, нема да земам од сѐ она, што е твое, да не речеш — јас го збогатив Аврама — ,

²⁴освен, она што изедоа момците, и освен делот на луѓето, што одеа со мене: Ескол, Авнан, и Мамре; тие нека го земат својот дел.«