Read Lamkang Битие 17 Bible Online

Битие 17 - Lamkang bible

Битие 17

¹А кога Аврам имаше деведесет и девет години му се јави Господ на Аврама и му рече: »Јас сум Бог твој, оди пред Мене и биди непорочен!

²И ќе направам завет меѓу Мене и тебе, и многу, многу ќе те размножам.«

³Аврам падна ничкум. А Бог продолжи да му говори и му рече:

⁴»А ова е заветот Мој со тебе: ќе станеш татко на многу народи.

⁵Затоа повеќе нема да се викаш Аврам, туку името ќе ти биде Авраам, оти ќе те направам татко на многу народи;

⁶и многу, многу ќе те умножам, и ќе издигнам од тебе многу народи, и цареви ќе излезат од тебе.

⁷И ќе поставам завет Мој меѓу Мене и тебе и меѓу твоите потомци по тебе во нивните родови; ќе направам заветот да биде вечен, ќе ти бидам Бог тебе и на потомците твои по тебе.

⁸И ќе ти ја дадам тебе и на потомството твое по тебе земјата, во која си придојден, целата земја Хананска во вечно владеење; и ќе им бидам нивни Бог.«

⁹И му рече Бог на Авраама: »Ти, пак, запази го заветот Мој, ти и потомството твое по тебе во нивните родови!

¹⁰А ова е заветот Мој меѓу Мене и вас и потомците твои во нивните родови, што ќе го пазите: секое машко од вас нека биде обрезано.

¹¹А ќе обрезувате крајче од телото свое; тоа ќе биде знак на заветот меѓу Мене и вас.

¹²Секое машко дете кога ќе наполни осум дена по раѓањето, низ целото ваше потомство, да биде обрезано: и роб, роден во вашиот дом, и оној што ќе биде купен од странец, а не е од семето твое, со обрезание ќе се обреже робот од твојот дом и купениот.

¹³Да, и робот, роден во домот твој, и купениот мора да биде обрезан, и така Мојот завет над вашето тело ќе остане вечен.

¹⁴А необрезаното машко, на кое не ќе му се обреже крајче од телото негово во осмиот ден, да се истреби од родот свој: таквиот го нарушил заветот Мој.«

¹⁵И му рече уште Бог на Авраама: »А Сара, жената твоја, не ја викај повеќе Сара, туку името нека ѝ биде Сáра.

¹⁶И Јас, ќе ја благословам, и ќе ти дадам син од неа; ќе ја благословам, и народи ќе потекнуваат од неа, и цареви на народи ќе излезат од неа.«

¹⁷Тогаш падна Авраам ничкум и се насмеа, велејќи во себе: »Како може на човек од сто години да му се роди син? Зарем Сáра во деведесетте години ќе роди?«

¹⁸И Авраам Му рече на Бога: »О, барем Исмаил да биде жив пред лицето Твое!«

¹⁹А Бог му рече на Авраама: »Навистина, Сáра, жената твоја, ќе ти роди син и ќе го наречеш со името Исак; и ќе направам заветот Мој со него да биде завет вечен, и да му бидам Бог на потомството негово по него.

²⁰А и за Исмаила те послушав; еве, го благословувам, и ќе го направам плоден, и многу ќе го умножам, многу; и ќе роди дванесет кнезови, и од него ќе произлезе голем народ.

²¹А заветот Мој со Исака ќе го направам кога ќе ти го роди Сáра, догодина во ова време.«

²²Па, откако Бог го изговори тоа, се издигна Бог од Авраама.

²³Авраам, пак, го зеде Исмаила, синот свој, и сите родени во домот негов, и сите купени, и сите машки домашни, им обреза крајче од телото нивно во истиот ден, како што му рече Бог.

²⁴Авраам имаше деведесет и девет години кога му беше обрезано крајче од телото негово.

²⁵А Исмаил, синот негов, имаше тринаесет години кога му беше обрезано крајче од телото негово.

²⁶Во истиот ден беа обрезани Авраам и син му Исмаил,

²⁷и со него заедно беа обрезани и сите домашни машки, и робовите, родени во неговиот дом, а и купените од странци.