Read Lamkang Битие 20 Bible Online

Битие 20 - Lamkang bible

Битие 20

¹Авраам оттаму тргна на југ, и се настани меѓу Кадес и Сур; и живееше некое време во Герар како придојден.

²Тогаш велеше Авраам за жената своја Сáра, дека му е сестра, оти се плашеше да рече дека му е жена, за да не го убијат жителите градски заради неа. А царот герарски Авимелех испрати, и ја зеде Сáра.

³Но Бог дојде при Авимелех ноќе во сон, и му рече: »Ете, ќе умреш заради жената, која си ја зел, зашто таа има маж.«

⁴А Авимелех не беше се допрел до неа, па рече: »Господи, зар ќе погубиш народ праведен?

⁵Нели самиот ми рече — ‚Сестра ми е‘ — а и таа самата рече ‚Брат ми е‘ — а јас тоа го направив простосрдечно и со чисти раце.«

⁶Тогаш му рече Бог во сонот: »Затоа те задржав да не грешиш пред Мене и не ти допуштив да се допреш до неа.

⁷А сега врати му ја на човекот жената негова, зашто е пророк, и ќе се помоли за тебе, и ќе останеш жив. Ако не ја вратиш, знај дека ќе умреш и ти и сите твои.«

⁸Утредента рано стана Авимелех, и ги повика сите слуги свои, и им го кажа сето тоа да го чујат. И тие многу се уплашија.

⁹Тогаш Авимелех го повика Авраама и му рече: »Што направи ти со нас? Што ти згрешив, па сакаше да навлечеш на мене и на царството мое голем грев? Ми го направи она, што никој не го прави.«

¹⁰И уште му рече Авимелех на Авраама: »Што имаше на ум, кога го направи тоа?«

¹¹А Авраам одговори: »Си помислив дека во ова место нема страв Божји, па ќе ме убијат поради жената моја.

¹²А всушност и ми е сестра: по татко, но не и по мајка: и се омажи за мене.

¹³А кога ме изведе Господ од домот на мојот татко, јас ѝ реков: направи ми добро и кажи за мене, и во секое место каде што ќе дојдеме: ‚Брат ми е.‘«

¹⁴Тогаш Авимелех зеде овци, и говеда, и слуги, и слугинки, и му ги даде на Авраама, и му ја врати Сáра, жената негова.

¹⁵И му рече Авимелех на Авраама: »Еве, земјата моја е пред тебе; и каде што ти е угодно, насели се!«

¹⁶А на Сáра ѝ рече: »Еве, му дадов на твојот брат илјада сикли сребро: тоа нека ти биде во чест на твоето лице, превез пред очите на сите, кои се со тебе, и пред сите си оправдана.«

¹⁷Авраам, пак, Му се помоли на Бога, и Бог ги исцели Авимелеха, и жената негова, и слугинките негови, и тие почнаа да раѓаат;

¹⁸зашто Господ ги беше затворил сите утроби во домот на Авимелеха поради Сáра, жената Авраамова.