Read Lamkang Битие 23 Bible Online

Битие 23 - Lamkang bible

Битие 23

¹Сáра поживе сто и дваесет и седум години; тоа се годините на Са'риниот живот.

²И умре Сáра во градот Киријат — Арби, а тоа е Хеврон, во земјата Хананска. И дојде Авраам да ја изжали и да ја исплаче.

³А кога стана Авраам пред покојницата своја, им рече на синовите Хетеови, велејќи:

⁴»Странец сум и придојден при вас; дајте ми да имам гроб кај вас, сам да ја погребам покојницата своја.«

⁵А синовите Хетеови му одговорија на Авраама, велејќи:

⁶»Чуј нѐ, господару наш; ти си кнез Божји меѓу нас; во најдобриот гроб наш погреби ја покојницата своја; никој меѓу нас нема да ти го одбие гробот свој за да можеш да ја погребеш покојницата своја таму!«

⁷Тогаш стана Авраам и му се поклони на народот од земјата на синовите Хетеови,

⁸и им рече Авраам, велејќи: »Ако сакате да ја погребам покојницата своја пред очите мои, послушајте ме — речете му за мене на Ефрона, синот Саров.

⁹Нека ми ја даде пештерата во Макпела, која е на крајот од нивата негова; за пари нека ми ја даде, колку што чини, за да имам гробница меѓу вас!«

¹⁰А Ефрон седеше меѓу синовите Хетеови. И му одговори Ефрон Хетеецот на Авраама, пред синовите Хетеови, и тоа гласно, да чујат сите, кои беа во советот од тој град, велејќи:

¹¹»Не, господару; послушај ме — нивата, и пештерата во неа, ти ја давам; пред синовите на народот мој ти ја подарувам, погреби ја покојницата твоја.«

¹²А Авраам му се поклони на народот од таа земја,

¹³и му рече на Ефрона гласно, пред сиот народ, велејќи: »Ако сакаш, почуј ме: ќе ти дадам колку што чини нивата, земи од мене, па тогаш ќе ја погребам покојницата своја таму.«

¹⁴А Ефрон му одговори на Авраама и рече:

¹⁵»Господару мој, чуј ме; земјата чини четиристотини сикли сребро; што е тоа за мене и за тебе? Затоа погреби ја покојницата твоја!«

¹⁶И Авраам, откако го ислуша Ефрона, му го измери среброто, што го кажа тој пред синовите Хетеови, четиристотини сикли сребро, како што врвеше тогаш меѓу трговците.

¹⁷И нивата Ефронова во Макпела спроти Мамре, нивата и во пределите наоколу,

¹⁸станаа сопственост на Авраама пред синовите Хетеови, пред сите кои влегуваа во тој град.

¹⁹Потоа ја погреба Авраам Сáра, жената своја, во пештерата на нивата Макпела спроти Мамре, а тоа е Хеврон, во земјата Хананска.

²⁰Така Авраам ја придоби од синовите Хетеови нивата и пештерата во неа, за да има сопствена гробница.