Read Lamkang Битие 33 Bible Online

Битие 33 - Lamkang bible

Битие 33

¹И погледа Јаков со очите свои, па виде, ете Исав, братот негов доаѓа, и со него четиристотини луѓе. И ги раздели децата на Лија, и на Рахил и на двете слугинки.

²И ги постави слугинките со нивните деца напред, а Лија и нејзините деца зад нив; додека Рахил со Јосифа беа последни.

³А самиот тој излезе прв пред нив и седумпати се поклони доземи, додека не дојде до братот свој.

⁴Исав истрча пред него и го прегрна, па му се обеси околу вратот и го бакна, и обајцата заплакаа.

⁵Исав, пак, кревајќи ги очите, ги виде жените и децата, па рече: »Кои ти се овие?« А Јаков одговори: »Деца, со кои Бог го помилува слугата твој.«

⁶Тогаш пристапија слугинките со децата свои, и се поклонија.

⁷Потоа пристапи Лија и децата нејзини, и се поклонија; а најпосле пристапија Јосиф и Рахил, и се поклонија.

⁸А Исав рече: »Зошто ти е сите оние луѓе, што ги сретнав?« Јаков одговори: »Да најдам милост пред очите на господарот мој.«

⁹Исав, пак, рече: »Има, брате, при мене доста; нека ти остане табе она што е твое.«

¹⁰Но Јаков рече: »Ако најдов милост пред очите твои, прими го дарот од мојата рака, зашто кога го видов лицето твое дека убаво ме пречекува, како да бев го видел лицето Божјо.

¹¹Прими го дарот мој, што го донесов; бидејќи изобилно ме обдари Бог, и имам сѐ.« И навали на него и тој го прими.

¹²Потоа рече Исав: »Ајде да одиме, ќе појдам и јас со тебе.«

¹³Но Јаков му рече: »Знае господарот мој дека овие деца се мали, а имам овци и крави доилки, па, ако ги подгонам само еден ден побрзо, ќе ми изгине сето стадо.

¹⁴Туку нека тргне господарот мој пред слугата негов, а јас ќе одам полека, колку што можат децата и добитокот пред мене, и ќе дојдам кај господарот мој во Сеир.«

¹⁵Исав рече: »Ќе ти оставам неколку луѓе, што се со мене.« Јаков одговори: »Зошто? Доволно е само да најдам милост пред господарот мој.«

¹⁶И така Исав се врати истиот ден по својот пат во Сеир.

¹⁷А Јаков отиде и таму си направи дом, а за добитокот свој направи трла. Затоа тоа место го нарече Сокот.

¹⁸Потоа Јаков дојде во Сихем, град во земјата Хананска, откако се врати од Месопотамија, и се насели спроти градот.

¹⁹И купи парче земја, каде што го распна шаторот свој, од Емор, таткото Сихемов, за сто ковани пари.

²⁰И таму подигна жртвеник, и го призва Бога Израилев.