Read Lamkang Битие 38 Bible Online

Битие 38 - Lamkang bible

Битие 38

¹А во тоа време Јуда се оддели од браќата свои, и се настани кај некој човек Одоламеец, по име Ирас.

²И таму ја виде Јуда ќерката на некој Хананеец, чие име беше Сава, и ја зеде и влезе при неа.

³Таа забремени, и роди син; и тој го нарече Ир.

⁴Одново зачна, и пак роди син, и нему му стави име Онан.

⁵И пак роди син, и го именува Силом. А Јуда беше во Хасафија, кога таа ги роди овие.

⁶И Јуда го ожени првородениот син свој Ир со девојката по име Тамара.

⁷Но Ир, првенецот Јудин, беше лош пред Господа, и Бог го погуби.

⁸Тогаш Јуда му рече на Онана: »Влези при вдовицата од братот твој, и ожени се со неа, за да го запазиш потомството на братот твој.«

⁹А Онан, знаејќи дека породот нема да биде негов, кога влегуваше при жената на братот свој, го истураше семето наземи, за да не му даде потомство на братот свој.

¹⁰Но тоа што го правеше, беше зло пред очите на Бога, па затоа и него го погуби.

¹¹Тогаш Јуда, по смртта на обата свои синови, ѝ рече на Тамара, снаата своја: »Живеј како вдовица во куќата на таткото твој додека порасне синот мој.« Оти си велеше во себе да не умре и тој како браќата негови. И отиде Тамара, и живееше во куќата на својот татко.

¹²Измина многу време и умре ќерката на Сава, жената Јудина. А кога Јуда се утеши, појде во Тамна кај луѓето што му го стрижеа стадото, тој сам и неговиот пријател Ирас, Одоламеецот.

¹³И ѝ јавија на Тамара, снаата негова: »Ете, свекорот твој оди во Тамна да ги стриже овците свои.«

¹⁴А таа ја соблече од себе вдовичката облека и се облече во летна облека, си стави превез, па седна пред портата на Енаим, на патот за Тамна. Зашто виде, дека Силом беше пораснал, а неа уште не му ја даваа за жена.

¹⁵Кога ја виде Јуда, помисли дека е блудница, зашто таа го беше покрила лицето свое, и не ја позна.

¹⁶И тој се одби при неа и ѝ рече: »Дозволи ми да влезам при тебе!« Зашто не ја позна дека му е снаа. А таа рече: »Што ќе ми дадеш, ако влезеш при мене?«

¹⁷А тој одговори: »Ќе ти испратам јаре од стадото.« А таа му рече: »Но да ми дадеш залог, додека не го испратиш.«

¹⁸А тој рече: »Каков залог да ти дадам?« А таа му одговори: »Својот прстен, крпата и стапот што ти е во раката.« И тој ѝ ги даде, па влезе при неа; и таа зачна од него.

¹⁹Потоа таа стана и си отиде; ја сметна летната облека од себе и ја облече вдовичката облека.

²⁰А Јуда испрати јаре по овчарот свој, Одоламеецот, за да си го поврати залогот од жената и тој не ја најде.

²¹Па ги праша луѓето од она место, велејќи: »Каде е блудницата што беше на распаќето во Енаим?« А тие одговорија: »Овде немаше блудница.«

²²И тој се врати кај Јуда и рече: »Не ја најдов. Дури мештаните ми рекоа дека таму немало блудница.«

²³А Јуда рече: »Нека си ги задржи, само да не ми се смеат; јас ѝ го испратив и јарето, но ти не ја најде.«

²⁴А кога изминаа околу три месеци, му јавија на Јуда, велејќи: »Тамара, снаата твоја се оддала на блуд и, ете, бремена е од блуд.« А Јуда рече: »Изведете ја за да се запали!«

²⁵А кога ја поведоа, таа прати на свекорот нејзин да му кажат: »Од човек, чие е она — сум зачнала.« Уште додаде: »Од оној, чиј е прстенов, крпава и стапов!«

²⁶А Јуда ги препозна, па рече: »Таа е поправедна од мене, бидејќи не ја дадов на синот свој Силом.« И повеќе не влезе при неа.

²⁷И кога дојде времето да роди, а тоа — близнаци во утробата нејзина.

²⁸И кога се породуваше, едното дете ја покажа раката, а бабицата зеде и му врза црвен конец околу раката, велејќи: »Овој е првенец.«

²⁹Но тоа ја повлече раката, и ете излезе неговото братче, а таа рече — како ја пресече обвивката, па пресек нека ти биде. И му ставија име Фарес.

³⁰А потоа излезе неговото братче со црвен конец на раката. Нему му ставија име Зара.