Read Lamkang Битие 40 Bible Online

Битие 40 - Lamkang bible

Битие 40

¹Потоа се случи, пехарникот на царот египетски и лебарот да му згрешат на господарот свој, царот египетски.

²И Фараонот се разгневи над тие двајца дворјани, на старешината над пехарниците и на старешината над лебарите,

³па ги стави под стража во куќата на заповедникот на стражата, каде што Јосиф беше затвореник.

⁴А заповедникот на стражата ги предаде на Јосифа тој да ги пази. И останаа тие таму некое време.

⁵И обајцата сонија сон во иста ноќ, секој по значењето на својот сон за себе, и пехарникот и лебарот на царот египетски, кои беа затворени во темницата.

⁶А утредента, кога дојде Јосиф кај нив, ги виде, а тие беа невесели.

⁷Па ги запраша дворјаните Фараонови, кои беа под стража заедно со него во куќата на господарот негов, и рече: »Што ви се денес лицата толку нажалени?«

⁸А тие му одговорија: »Обајцата сонивме сон, а нема кој да ни го протолкува.« Јосиф им рече: »Што значат, не ли е тоа во Бога? Раскажете ми ги!«

⁹И старешината над пехарниците му го раскажа сонот свој на Јосифа, велејќи »Ете, пред мене лоза,

¹⁰на лозата имаше три прачки; и таа запупи и расцути, врза грозје, кое узреа;

¹¹а во раката ми беше чашата Фараонова, зедов еден грозд, го истискав во Фараоновата чаша и му ја дадов чашата на Фараонот в рака.«

¹²Јосиф му рече: »Еве го значењето: трите прачки лозови се три дена.

¹³По три дена Фараонот ќе те помилува и пак ќе те постави на поранешната служба; и одново ќе му ја подаваш чашата во раката негова како и порано, кога му беше пехарник.

¹⁴Но, кога ќе ти биде добро, сети се на мене и направи ми добро; спомни му на Фараонот за мене и изведи ме од оваа тврдина;

¹⁵оти ме украдоа од земјата Еврејска; а и овде ништо лошо не сум направил, за да бидам фрлен во затвор.«

¹⁶А кога виде старешината над лебарите колку добро му го протолкува сонот, му рече на Јосифа: »И јас сонив: и тоа — на главата моја три кошници леб;

¹⁷во најгорната кошница имаше сѐ што јаде Фараонот, што го прават пекарите; и птици небески колваа од кошницата над мојата глава.«

¹⁸А Јосиф одговори и рече: »Тоа значи — три кошници се три дена.

¹⁹По три дена Фараонот ќе ти ја земе главата и ќе те обеси на дрво, а птиците ќе колваат од телото твое.«

²⁰И кога дојде третиот ден, а тоа беше денот во кој се родил Фараонот, тој им приреди гозба на своите слуги, па се сети на старешината над пехарниците и на старешината над лебарите помеѓу слугите свои;

²¹И го врати старешината над пехарниците на поранешната служба, за да му ја подава чашата на Фараонот,

²²додека старешината над лебарите го обеси на дрво, како што беше рекол Јосиф.

²³Но старешината над пехарниците не си спомна за Јосифа, туку го заборави.