Read Lamkang Битие 46 Bible Online

Битие 46 - Lamkang bible

Битие 46

¹И тргна Израил со сѐ што имаше, па, откако дојде во Вирсавија, Му принесе жртва на Бога од таткото свој Исака.

²И му рече Бог на Израила ноќе во видение; »Јакове! Јакове!« А тој одговори: »Еве ме!«

³Тогаш Бог му рече: »Јас сум Бог, Бог на таткото твој. Не плаши се да слезеш во Египет, оти таму ќе направам од тебе голем народ.

⁴Јас ќе слезам со тебе во Египет, и Јас пак ќе те вратам ваму; и Јосиф ќе ги заклопи очите твои.«

⁵И тргна Јаков од Вирсавија; и синовите Израилеви го сместија Јакова, таткото свој, и децата свои, и жените свои и имотот свој во колите, што беше им ги пратил Јосиф, за да го доведат.

⁶И го зедоа доботокот свој и имотот свој, што го беа спечалиле во земјата Хананска, и дојдоа во Египет — Јаков и сиот негов род заедно со него.

⁷Тој ги доведе со себе во Египет синовите свои и внуците свои, и ќерките свои и внуките свои, и целото свое потомство.

⁸А ова се имињата на децата Израилеви, кои дојдоа во Египет: Јаков и синовите негови. Првенецот на Јакова Рувим.

⁹Синовите Рувимови: Енох и Фалос, Асрон и Харми.

¹⁰Синовите Симеонови: Јемуил, Јамин, Аод, Јахим, Соар, и Саул, син на Хананејката.

¹¹Синовите Левиеви: Гирсон, Кат и Мерариј.

¹²Синовите Јудини: Ир, Авнан, Силом, Фарес и Зара; но Ир и Авнан умреа во земјата Хананска. Синови Фаресови беа Есрон и Хамуил.

¹³Синови Исахарови: Тула, Фува, Јов и Симрон.

¹⁴Синови Завулонови: Серед, Алон и Ахоил.

¹⁵Тоа се синовите Лиини, што му ги роди на Јакова во Месопотамија Сириска, заедно со Дина, ќерката негова. Сите синови и ќерки негови беа триесет и три души.

¹⁶Синови Гадови: Сифон, Агиј, Суниј, Есвон, Ириј, Ародиј и Арилиј.

¹⁷Синови Асирови: Емна, Есва, Усвиј и Вериј — и сестрата нивна Сара. А синови на Вериј беа: Хевор и Мелхил.

¹⁸Тоа се синовите на Зелфа, која ѝ ја даде Лаван на Лија, ќерката своја; таа му роди на Јакова шеснаесет души.

¹⁹Синови, пак, на Рахил, жената на Јакова, беа: Јосиф и Венијамин.

²⁰А на Јосифа во Египет му се родија од Асенета, ќерката на Петефриј, жрецот илиополски: Манасија и Ефрем.

²¹А синови Венијаминови беа: Вела, Вехер и Асвил; синови Велови: Гира, Наман, Ихиј, Рос, Упим, а Гира го роди Арад.

²²Тоа се синовите на Јакова, што му го роди Рахил, — вкупно четиринаесет души.

²³А син Данов: Асом.

²⁴Синови Нефралимови: Асил, Гуниј, Есер и Силим.

²⁵Тоа беа синови на Вала, која ѝ ја даде Лаван на ќеката своја Рахил; таа му роди на Јакова вкупно седум души.

²⁶Сите, кои дојдоа со Јакова во Египет и кои беа излегле од бедрата негови, освен жените на синовите Јаковови, беа вкупно шеесет и шест души.

²⁷И двајцата синови Јосифови, што му се родија во Египет; сите души, значи, во домот на Јакова, кои дојдоа во Египет, беа седумдесет.

²⁸Израил го прати Јуда кај Јосифа пред себе, за да го сретне во сирискиот град — Гесем, во земјата Гесемска.

²⁹Тогаш Јосиф ја впрегна колата своја, и му излезе во пресрет на Израила, таткото свој, во сирискиот град Гесем; и кога го виде Јаков, му се обеси околу вратот, и плачеше долго на вратот негов.

³⁰Потоа Израил му рече на Јосифа; »Сега, бидејќи со свои очи видов, оти си жив, можам да умрам.«

³¹А Јосиф им рече на браќата свои — »Одам да му соопштам на Фараонот и ќе му речам: ‚Браќата мои и семејството на таткото мој, кои беа во земјата хананска, дојдоа кај мене.

³²Тие се луѓе овчари; од секогаш се занимавале со сточарство; и ги доведоа со себе овците и говедата свои и сѐ што имаа.‘

³³А кога Фараонот ќе ве повика и ќе ве праша: ‚Каква работа работите,‘

³⁴вие кажете: ‚Овчари се слугите твои уште од младини па досега, и ние и татковците наши‘ — за да останете во земјата Гесем Арабиски. Оти Египтјаните сите овчари ги сметаат за нечисти.«