Read Lamkang Битие 7 Bible Online

Битие 7 - Lamkang bible

Битие 7

¹И му рече Господ Бог на Ноја: »Влези во ковчегот ти и целиот дом твој, бидејќи те видов праведен пред Себе во овој род,

²и земи со себе од секое чисто животно по седум од машки и женски пол, а од животните нечисти по две, машки пол и женски пол;

³исто така и од птиците небески по седум, машки пол и женски, и од сите нечисти птици по две, за да им се зачува родот нивни по целата земја.

⁴Оти по седум дена ќе пуштам дожд на земјата, што ќе се излива четириесет дена и четириесет ноќи и ќе го истребам од земјата секое суштество, што сум го создал Јас.«

⁵И Ное направи сѐ што му заповеда Господ Бог.

⁶А Ное имаше шестотини години кога дојде потопот на земјата.

⁷И влезе Ное во ковчегот, и синовите негови, и жената негова, и жените на синовите негови со него, заради потопот од вода.

⁸И од животните чисти и од животните нечисти, и од птиците и од сѐ што се влечеше по земјата;

⁹влегоа при Ноја во ковчегот по две, машко и женско, како што му заповеда на Ноја Бог.

¹⁰А по седмиот ден дојдоа водите од потопот на земјата.

¹¹Кога имаше Ное шестотини години, во вториот месец во таа година, дваесет и седмиот ден од тој месец, во тој ден бликнаа сите извори на големата бездна и се отворија окната небески;

¹²и се лиеше дожд на земјата четириесет дена и четириесет ноќи.

¹³Во истиот ден влезе во ковчегот Ное, и Сим, и Хам и Јафет, синовите негови, и жената Ноева, и трите жени на синовите негови со нив.

¹⁴Тие, и сите ѕверови според родот нивни, и добитокот според неговиот род, и сите гадови, што се влечеа по земјата, според нивниот род, и сѐ што лета, според родот негов, птиците сите и сѐ што има крилја,

¹⁵влегоа во ковчегот при Ноја по две единки од машки и женски пол од секоја плот, во која имаше животен дух;

¹⁶и тие што влегоа, машки и женски пол влегоа од секоја плот, како што му беше заповедал Бог. И Господ Бог потоа го затвори ковчегот однадвор.

¹⁷Натопувањето на земјата потраја четириесет дена и четириесет ноќи; водата надојде и го подзеде ковчегот; и тој се крена од земјата;

¹⁸водата се засилуваше многу и се умножуваше на земјата, и ковчегот пливаше врз водата.

¹⁹И се засили водата на земјата толку многу, што ги покри сите високи планини, какви што има под целото небо;

²⁰петнаесет лакти се издигаше водата над планините, откако ги покри.

²¹Тогаш го изгуби животот секоја плот, што се движеше по земјата: и птиците, и добитокот, и ѕверовите, и сите лазачи, што се влечат по земјата, и сите луѓе;

²²сѐ, што на суво имаше здив во ноздрите свои, изумре.

²³И се истреби секое живо суштество, што се движеше на земјата: од човекот до ѕверот, лазачите и птиците небески — сѐ беше истребено од земјата; само Ное остана, и оние, кои беа со него во ковчегот.

²⁴А водата се издигаше над земјата сто и педесет дена.