Read Lamkang Битие 9 Bible Online

Битие 9 - Lamkang bible

Битие 9

¹Тогаш Бог го благослови Ноја и синовите негови, и им рече: »Плодете се и множете се, и полнете ја земјата и владејте ја!

²А сите ѕверови земни и сите птици небески, и сиот земен добиток, и сѐ што се движи по земјата, и сите морски риби да се плашат од вас: во ваши раце се предадени.

³Сѐ што се движи и живее, ќе ви биде храна; сето тоа ви го дадов, како што ви го дадов зеленото растение.

⁴Само да не јадете месо во кое има уште душа, односно крвта негова.

⁵А и вашата крв, односно вашиот живот, ќе го барам; од секој ѕвер ќе го барам, ќе ја барам, исто така, душата човечка од раката на човек, од раката на братот негов;

⁶кој ќе пролее крв човечка, и неговата крв ќе се пролее од човечка рака; зашто човекот го создадов според образот Божји.

⁷Вие, пак, плодете се и множете се; ширете се на земјата и наполнете ја и владејте ја!«

⁸И му рече Господ на Ноја и синовите негови со него, велејќи:

⁹»А Јас, еве, го поставувам заветот Мој со вас и со вашето потомство по вас,

¹⁰и со секоја жива душа, која е со вас, со птиците, и со добитокот, и со сите ѕверови земни, што се со вас, со сѐ она што излегло од ковчегот, со сите земни животни;

¹¹го поставувам заветот Мој со вас дека отсега нема веќе ниедна плот да загине од потоп и дека повеќе не ќе има потоп да ја запустува земјата!«

¹²И рече Бог: »Еве го знакот на заветот, што го поставувам меѓу Мене и вас и меѓу секоја жива душа, која е со вас, за идните поколенија:

¹³божилак Свој поставувам во облакот, за да биде знак на заветот меѓу Мене и земјата.

¹⁴Па кога облак ќе навеам на земјата, ќе се види божилакот во облакот,

¹⁵и ќе си спомнам за заветот Мој, кој е меѓу Мене и вас и меѓу секоја душа, што живее во плот; и нема веќе да има потоп за да ја уништи секоја плот.

¹⁶Божилакот ќе биде во облакот, и Јас ќе го видам и ќе си спомнам за вечниот завет меѓу Бога и меѓу секоја душа, што живее во секоја плот, која е на земјата.«

¹⁷И му рече Бог на Ноја: »Тоа нека е знакот на заветот, што го поставив меѓу Мене и меѓу секоја плот, која е на земјата!«

¹⁸Синовите Ноеви, кои излегоа од ковчегот, беа: Сим, Хам и Јафет. Хам е татко на Хананејците.

¹⁹Тоа се трите сина Ноеви, и од нив се насели целата земја.

²⁰А Ное почна да ја обработува земјата, и насади лозје.

²¹И се напи од виното, па се опи, и легна гол среде шаторот свој.

²²А Хам, таткото на Хананејците, ја виде голотијата на таткото свој, и излезе, та им го кажа тоа на обајцата браќа свои.

²³Но Сим и Јафет зедоа облека, и, наметнуваќи ја на рамената свои, појдоа назадешкум и ја покрија со неа голотијата на таткото свој; лицата им беа свртени наназад, и тие не ја видоа голотијата на таткото свој.

²⁴А кога се истрезни Ное од виното, дозна што му беше направил помладиот син,

²⁵па рече, »Проклет да е Ханан; на браќата свои ќе им биде најдолен слуга!«

²⁶И уште рече: »Благословен да е Господ Бог Симов; а Ханан ќе му биде слуга!

²⁷Нека го рашири Бог Јафета, и тој нека живее во шаторите на Сим; а Ханан да им биде слуга!«

²⁸И поживе Ное по потопот триста и педесет години.

²⁹А сѐ на сѐ поживе Ное деветстоитни и педесет години; потоа умре.