Read Lamkang 2 Царства 18 Bible Online

2 Царства 18 - Lamkang bible

2 Царства 18

¹Давид ги прегледа луѓето, што беа со него, и постави над нив илјаданачалници и стотници.

²Давид ги испрати луѓето — една третина под водство на Јоава, една третина под водство на Авеса, синот Саруев, брат Јоавов, една третина под водство на Гетецот Етеј. Тогаш царот им рече на луѓето: »И јас ќе дојдам со вас.«

³Но луѓето му одговорија: »Не доаѓај, зашто, ние и да избегаме, тоа нема да се забележи; и половината од нас да умре, тоа исто така нема да се забележи; ти, ти, бидејќи, сам чиниш, колку десет илјади од нас, затоа подобро е за нас да ни помагаш од градот.«

⁴Царот им рече: »Што ќе најдете за добро, тоа и ќе го направам.« И царот се задржа при портите, и сиот народ излегуваше по стотици и по илјади.

⁵Царот им заповеда на Јоава, Авеса и Етеја, велејќи: »Зачувајте ми го момчето Авесалома.« И сите слушаа, што им заповедаше царот на сите началници за Авесалома.

⁶Излегоа луѓето во полето против Израилците, и започна битка во Ефремовата гора.

⁷И народот Израилев беше победен од Давидовите слуги; тој ден таму стана голем пораз, — беа убиени дваесет илјади души.

⁸А битката се прошири по целата онаа земја, и гората погуби повеќе народ, отколку што се истреби со мечот во тој ден.

⁹Авесалом се сретна со Давидовите слуги; тој јаваше на маска. Кога маската навлезе под гранките на еден голем даб, косата на Авесалома му се заплетка во гранките од дабот, и тој почна да виси меѓу небото и земјата, а маската, што беше под него, избега.

¹⁰Некој го виде тоа и му јави на Јоава, велејќи: »Ете, јас го видов Авесалома како виси на дабон.«

¹¹Јоав му кажа на човекот што му го соопшти тоа: »Ете, си видел; зошто не го кутна таму на земја? Ќе ти дадев десет сикли сребро и еден појас.«

¹²И оној му одговори на Јоава: »Да ставеа во рацете мои и илјада сикли сребро, и тогаш не би кренал рака врз царскиот син; зашто ние чувме, дека царот ти заповеда тебе, на Авеса и на Етеја, велејќи: ‚зачувајте ми го момчето Авесалома‘;

¹³и да бев постапил поинаку во опасност по животот свој, тоа не би останало сокриено од царот, па и ти би станал против мене.«

¹⁴Јоав рече: »Нема зошто да се занимавам со тебе.« И зеде во рацете три стрели и ги забоде во срцето на Авесалома, кој уште беше жив на дабот.

¹⁵Тогаш го опколија Авесалома десет момци, Јоавови оруженосци, го удираа и го умртвија.

¹⁶И затруби Јоав со труба, и луѓето, што го гонеа Израилот, се вратија, бидејќи Јоав го штедеше народот.

¹⁷Го зедоа Авесалома, го фрлија во гората, во длабока јама, и натрупаа врз него голема грамада камења. И сите Израилци се разбегаа, секој во шаторот свој.

¹⁸Уште додека беше жив, Авесалом си беше изградил споменик во царската долина; зашто велеше: »Јас немам син, за да се зачува споменот за името мое«. И до денес тој се нарекува Авесаломов споменик.

¹⁹Ахимас, син Садоков, му рече на Јоава: »Ќе отрчам да му јавам на царот, дека Господ преку Својот суд го спаси од рацете на непријателите негови.«

²⁰Но Јоав му рече: »Нема да бидеш добар известувач денес; друг ден ќе јавиш, а не денес, зашто царевиот син умре.«

²¹Јоав му рече потоа на Хусија: »Оди, јави му на царот што си видел.« И Хусиј му се поклони на Јоава и отрча.

²²Но Ахимас, Садоковиот син, настојуваше и му велеше на Јоава: »Што и да биде, и јас ќе трчам по Хусија.« а Јоав му одговори: »Што ти треба да трчаш, синко? Добра вест нема да однесеш.«

²³Ахимас рече: »Така нека биде, но јас ќе отрчам.« Тогаш Јоав му рече: »Трчај.« И Ахимас потрча по напречен пот и го испревари Хусија.

²⁴Во тоа време Давид седеше меѓу двете порти. И стражарот излезе под вратната стреа откај ѕидот, ги крена очите и виде, еден човек трча.

²⁵И стражарот извика и му соопшти на царот. А царот рече: »Ако е сам, вест носи во устата своја.« А оној сѐ повеќе и повеќе се приближуваше.

²⁶Стражарот виде друг човек дека трча; и стражарот му викна на вратарот: »Ете, уште еден човек трча.« Царот рече: »И тој е известувач.«

²⁷Стражарот рече: »Го гледам одењето на привиот, тоа прилега на одењето на Ахимаса, Садоковиот син.« А царот рече: »Тој е добар човек и доаѓа со добра вест.«

²⁸Ахимас извика и му рече на царот: »Мир!« И му се поклони на царот со лицето до земја и рече: »Благословен Господ, Бог твој, Кој ги предаде луѓето, што беа кренале рака против мојот господар, царот!«

²⁹А царот праша: »Здраво ли е момчето Авесалом?« Ахимас одговори: »Видов голема мешаница, кога царскиот служител Јоав го испраќаше својот слуга; не не знам, што стануваше таму.«

³⁰Царот рече: »Помести се и застани тука.« И тој се помести и застана.

³¹Ете, пристигна и Хусиј по него. И Хусиј му рече на царот: »Добра вест за господарот мој, царот! Господ ти направи денес правда, спасувајќи те од раката на сите, што беа станале против тебе.«

³²А царот го праша Хусија: »Здраво ли е момчето Авесалом?« Хусиј одговори: »Да даде Бог со непријателите на мојот господар, царот, и со сите зломислиници против тебе да се случи истото, што го снајде момчето!«

³³Се збрка царот и отиде во собата над портите и плачеше и, кога си одеше, велеше вака: »Сине Авесаломе! Сине, сине Авесаломе! О, да бев умрел јас наместо тебе, Авесаломе, сине мој, сине!«