Read Lamkang 2 Царства 2 Bible Online

2 Царства 2 - Lamkang bible

2 Царства 2

¹Потоа Давид Го праша Господа, велејќи: »Да отидам ли во некој од Јудините градови?« И Господ му рече: »Оди.« Давид пак праша: »Каде да одам?« И Он му рече: »Оди во Хеврон.«

²И Давид отиде таму со двете жени свои: Израелката Ахиноама и Камелитката Авигеја, бивша Навалова жена.

³Давид ги одведе и луѓето, што беа со него, секој со челадта своја, и се населија во градот Хеврон.

⁴И дојдоа мажите Јудини и таму го помазаа Давида за цар над Јудиниот дом. Тогаш му јавија на Давида, дека жителите од Јавис Галадски го погребале Саула.

⁵И Давид испрати претеници до жителите на Јавис Галадски да им кажат: »Благословени да сте пред Господа, поради тоа што ја направивте таа милост на господарот свој Саула, помазаникот Господов, и што сте го погребале и синот негов Јонатана;

⁶и Господ нека ве награди со милост и вистина; и јас ќе ви направам добро, поради тоа што го направивте вие ова.

⁷А сега нека се зацврстат рацете ваши и бидете храбри, зашто господарот ваш Саул умре, и домот Јудин ме помаза мене за цар над себеси.«

⁸Но Авенир, Нировиот син и војвода над Сауловата војска, го зеде Јевостеја, Сауловиот син, го одведе во Маханаим,

⁹и го постави за цар над Галад, Ашур и Језраел, над Ефрема и Венијамина и над сиот Израил.

¹⁰А Јевостеј, Сауловиот син, беше на четириесет години, кога се зацари над Израилот, и царуваше две години. Само Јудиниот дом остана со Давида.

¹¹Сето време, во кое Давид царуваше во Хеврон над Јудиниот дом, беше седум години и шест месеци.

¹²Потоа отиде Авенир, Нировиот син, и слугите на Сауловиот син Јевостеј, од Маханаим во Гаваон.

¹³Излезе и Јоав, синот Саруев, со Давидовите слуги и се сретнаа при Гаваонскиот поток, и застанаа еден од едната страна на потокот, а другиот — од другата страна на потокот.

¹⁴А Авенир му рече на Јоава: »Нека станат момците и нека се борат пред нас.« И Јоав рече: »Нека станат.«

¹⁵И станаа, та отидоа дванаесет Венијаминци од страната на Јевостеја, Сауловиот син, и дванаесетте Давидови слуги.

¹⁶И тие се фатија еден со друг за главите, си забија еден на друг меч во слабините и паднаа заедно. И тоа место беше наречено Хелкат-Хасурим, кое е во Гаваон.

¹⁷И во оној ден стана многу жестока борба, а Авенир со Израилските луѓе беше победен од Давидовите слуги.

¹⁸Таму беа тројца синови Саруеви: Јоав, Авеса и Асаил. А Асаил беше со лесни нозе, како срна во полето.

¹⁹Асаил почна да го гони Авенира и го гонеше, а да не скршнува ни десно, ни лево од стапките на Авенира.

²⁰Авенир се сврте назад и рече: »Ти ли си, Асаиле?« Тој одговори: »Јас сум.«

²¹И Авенир му рече: »Скршни десно или лево, избери си еден од момците и земи го неговото оружје.« Но Асаил не сакаше да го остави.

²²И Авенир повторно му рече на Асаила: »Остави ме, да не те соборам на земја; со какво лице тогаш ќе се јавам пред братот твој Јоава?«

²³Но оној не сакаше да отстапи. Тогаш Авенир го сврти копјето и го прободе во стомахот; копјето мина низ него, и тој падна таму и умре на местото. Сите што минува низ тоа место, каде што беше паднал и умрел Асаил, застануваа.

²⁴Јоав и Авеса го гонеа Авенира. Сонцето веќе беше зајдено кога стигнаа до ридот Ама, спроти Гај, на патот за Гаваонската пустиња.

²⁵А Венијаминовите синови се собраа околу Авенира и образуваа чета и застанаа на врвот од еден рид.

²⁶И Авенир извика кон Јоава и рече: »Вечно ли меч ќе истребува? Или не знаеш, дека подоцнежните ќе бидат горчливи? И кога ќе им кажаш на луѓето да престанат да ги гонат браќата свои?«

²⁷А Јоав рече: »Жив Бог! Ако ти не говореше поинаку, уште ова утро луѓето сакаа да престанат да ги гонат браќата свои.«

²⁸И Јоав затруби со труба и сиот народ застана, и повеќе не ги гонеа Израилците; битката престана.

²⁹Авенир, пак, и луѓето негови врвеа преку полето цалата таа ноќ, го преминаа Јордан, минаа преку целиот Витрон и стигнаа во Маханаим.

³⁰Се врати и Јоав од гонењето на Авенира и го собра сиот народ, а од Давидовите слуги, освен Асаила, недостигаа деветнаесет души.

³¹А Давидовите слуги ги поразија Венијаминовите и Авенировите луѓе, од кои паднаа триста и шеесет души.

³²И го зедоа Асаила и го погребаа во Витлеем, во татковиот му гроб. А Јоав со луѓето свои одеше цела ноќ и во зорите стигна во Хеврон.