Read Lamkang 2 Царства 22 Bible Online

2 Царства 22 - Lamkang bible

2 Царства 22

¹И Давид испеа песна за Господа во денот, кога Господ го спаси од раката на сите непријатели негови и од раката на Саула, велејќи:

²»Господ е мојата тврдина, моја крепост и мој спасител.

³Мојот Бог е моја карпа; на Него се надевам; мој штит, рог на моето спасение, моја заштита и мое прибежиште; Спасителе мој, Ти ме спаси од непријатели.

⁴Ќе го призовам сефалениот Господ и од непријателите мои ќе се спасам.

⁵Бранови на смртта ме прегрнаа, и потоци од беззаконија ме исплашија;

⁶веригите на пеколот ме обвиткаа, и стапици на смртта ме обмотаа.

⁷Но во притеснувањето свое го призвав Господа и повикав кон мојот Бог, и Он го чу од Својот свет дворец гласот мој, и повикот мој стигна до ушите Негови.

⁸Се затресе, се разниша земјата, затреперија и се поместија основите небески, зашто се разгневи Господ на нив.

⁹Се крена дим од гневот Негов, и уривачки оган од устата Негова; жив јаглен се сипеше од Него.

¹⁰Он ги наведна небесата и слезе; и мрак беше под нозете Негови;

¹¹седна на херувимите, летна и се понесе на ветрови крила;

¹²и со мрак се покри како со шатор, згуснувајќи ги водите на облаците небески;

¹³од болскотот пред Него се усвитуваа огнени јаглени.

¹⁴Загрме Господ од небесата, и Севишниот го пушти Својот глас;

¹⁵пушти стрели свои и ги распрсна; болсна со секавица и ги истреби.

¹⁶Се открија изворите морски, се покажаа основите на вселената од страшниот глас на Господа, од дувањето на духот на Неговиот гнев.

¹⁷Он подаде рака од височините, ме фати и ме извлече од големите води;

¹⁸Ме спаси од силниот непријател мој, од оние, што ме мразеа, што беа посилни од мене.

¹⁹Тие станаа против мене во денот на мојата неволја; но Господ ми беше потслон,

²⁰и ме изведе на широко место, ме спаси, зашто Он благоволи кон мене.

²¹Ми воздаде Господ според мојата правда, ме награди според чистотата на рацете мои.

²²Зашто јас ги пазев патиштата Господови и не бев нечестив пред мојот Бог,

²³бидејќи сите заповеди Негови се пред мене, и од заповедите Негови не отстапував,

²⁴бев непорочен пред Него и внимавав да не згрешам.

²⁵И Господ ми воздаде според мојата правда, според чистотата моја пред Неговите очи.

²⁶Со милостивиот Ти постапуваш милостиво, со искрениот маж, — искрено,

²⁷со чистиот — чисто, а со лукавиот — според лукавството негово.

²⁸Ти ги спасуваш угнетените и со погледот Свој ги уништуваш горделивите.

²⁹Ти си Господ, светило мое; Господ ја просветлува мојата темнина.

³⁰Со Тебе победувам војска; со мојот Бог прескокнувам ѕид.

³¹Бог! непорочен е Неговиот пат, чисто е словото Негово; Он е штит за сите, што се надеваат на Него,

³²зашто, кој е Бог, освен Господа, и кој е сила, освен нашиот Бог?

³³Бог ме препаша со сила, ми подготвува чист пат.

³⁴Ми ги прави нозете како на елен, и ме поставува на висини;

³⁵ги учи рацете мои на борба, и ги напрегнува мускулите мои како бакарен лак.

³⁶Ти ми го даваш штитот на Твоето спасение, и Твојата милост ме возвеличува.

³⁷Ти ги зголемуваш чекорите мои под мене, и моите нозе не се нишаат.

³⁸Јас ги гонам непријателите мои и ги истребувам, и не се враќам додека не ги уништам;

³⁹ги истребувам и ги поразувам, и тие не стануваат, а паѓаат под нозете мои.

⁴⁰Ти ме препашуваш со сила за бој и ги кутнуваш пред мене оние што станале против мене;

⁴¹Ти го свртуваш кон мене грбот на моите непријатели, и јас ги истребувам оние, што ме мразат.

⁴²Тие викаат, но нема кој да ги спаси, — кон Господа, но Он не ги слуша.

⁴³Ги тријам како прав земен, како улична кал ги размачкувам и ги газам.

⁴⁴Ти ме спаси од побуната на мојот народ; Ти ме зачува, за да бидам глава над другородците; народ, што не го познавав, ми слугува.

⁴⁵Другородците ми ласкаат; штом ќе чујат за мене, ми се покоруваат.

⁴⁶Другородците бледнеат и треперат во своите тврдини.

⁴⁷Жив е Господ и благословен е мојот заштитник! Нека се превознесува Бог, прибежиштето на моето спасение,

⁴⁸Бог, Кој одмаздува за мене, Кој ми ги покорува народите

⁴⁹и Кој ме спасува од непријателите мои! Над оние, што стануваа против мене, Ти ме воздигна; Ти ме избави од жестокиот човек.

⁵⁰Затоа ќе Те прославувам Тебе, Господи, меѓу незнабошците и ќе го воспевам името Твое. —

⁵¹Тебе, Кој славно го спасуваш Својот цар и му правиш милост на помазаникот Свој Давида и на потомството негово засекогаш.«