Read Lamkang 2 Царства 5 Bible Online

2 Царства 5 - Lamkang bible

2 Царства 5

¹Тогаш сите Израилеви племиња дојдоа кај Давида во Хеврон и рекоа: »Ете, ние сме твои коски и твоја плот;

²уште вчера и завчера, додека царуваше Саул над нас, ти го изведуваше и го воведуваше Израилот; и Господ ти рече: ‚Ти ќе го пасеш Мојот народ, Израилот, и ти ќе бидеш водач на Израилот.‘«

³Тогаш сите Израилеви стерешни дојдоа кај царот во Хеврон, и царот Давид склучи со нив завет пред Господа во Хеврон; и го помазаа Давида за цар над сиот Израил.

⁴Давид беше на триесет години, кога се зацари; тој царуваше четириесет години.

⁵Во Хеврон царуваше над Јуда седум години и шест месеци, а во Ерусалим царуваше триесет и три години над целиот Израил и над Јуда.

⁶Царот тргна за Ерусалим заедно со луѓето свои против Евусејците, жители од оној крај; но тие му велеа на Давида: »Ти нема да влезеш тука; слепите и сакатите ќе те избркаат«, — тоа значеше: Давид нема да влезе тука.

⁷Но Давид ја презеде тврдината Сион: Тоа е Давидовиот град.

⁸Тој ден Давид рече: »Секој, убивајќи Евусејци, нека поразува со копје и сакати и слепи, што ја мразат душата Давидова.« Затоа и се вели: »Слеп и сакат нема да влезе во домот Господов.«

⁹И Давид се насели во тврдината, и ја нарече Давидов град, и изгради наоколу ѕид од крајот, па сѐ до внатре.

¹⁰И Давид напредуваше и се воздигаше, и Господ Бог Саваот беше со него.

¹¹Тирскиот цар Хирам испрати при Давида пратеници и кедрово дрво, дрводелци и каменоделци, и тие му изградина на Давида дом.

¹²Давид разбра, дека Господ го одредил за цар над Израилот и го воздигнал царството негово заради Својот народ, Израилот.

¹³Давид си зеде уште наложници и жени од Ерусалим, откако дојде од Хеврон.

¹⁴И му се родија на Давида уште синови и ќерки. Еве ги имињата на оние, што му се родија во Ерусалим: Самус, Совав, Натан и Соломон,

¹⁵Евеар, Елисуа, Нафек, и Јафија,

¹⁶Елисама, Елидае, и Елифалет, Самае, Јосиват, Натан, Галиман, Еваар, Теисус, Елифалат, Нагев, Нафек, Јонатан, Леасамис, Валимат и Елифат.

¹⁷Кога Филистејците слушнаа, дека Давид е помазан за цар на Израилот, сите Филистејци се кренаа да го бараат Давида. Давид чу и отиде во тврдината.

¹⁸А Филистејците дојдоа и се сместија во Рефаимската долина.

¹⁹И Давид го запраша Господа, велејќи: »Да одам ли против Филистејците? Ќе ги предадеш ли во рацете мои?« А Господ му одговори на Давида: »Оди, зашто Јас ќе ги предадам Филистејците во рацете твои.«

²⁰Тогаш Давид отиде во Ваал — Перасим и таму ги порази, и рече Давид: »Господ ги однесе пред мене непријателите мои, како вода што однесува.« Поради тоа и она место се нарече Ваал — Перасим.

²¹Таму Филистејците ги оставија идолите свои, а Давид со луѓето свои ги зеде и заповеда да ги изгорат на оган.

²²Филистејците, пак, дојдоа и се улогорија во Рефаимската долина.

²³А Давид Го праша Господа: »Да одам ли против Филистејците, и ќе ги предадеш ли во рацете мои?« Господ му одговори: »Немој да им излегуваш во пресрет, туку заобиколи ги одзади и нападни ги откај горичката на црници.

²⁴Кога ќе чуеш шум како да минува некој по врвовите на црниците, тогаш појди, зашто тогаш Господ тргнал пред тебе, за да ја порази филистејската војска.«