Read Lamkang 3 Царства 10 Bible Online

3 Царства 10 - Lamkang bible

3 Царства 10

¹Савската царица, откако чу за славата Соломонова и за името на Господа, дојде да го испита со гатанки.

²Таа дојде во Ерусалим со многу големо богатство: камилите беа натоварени со благопријатни мириси, со многу злато и скапоцени камења; таа дојде кај Соломона и говореше со него за сѐ, што ѝ беше на срцето.

³Соломон ѝ ги објасни сите нејзини зборови, и немаше ништо непознато за царот, што не ѝ го објасни.

⁴Савската царица ја виде сета мудрост на Соломона, и домот, што тој го беше изградил,

⁵и јадењата на трпезата негова, и живеалиштата на слугите негови, и држењето на слугите негови, облеката нивна и пехарниците негови, и сепалениците негови, што ги принесуваше во храмот Господов. И повеќе не можеше да се воздржи,

⁶па му рече на царот: »Вистина е она, што го бев слушала во земјата своја за твоите дела и за твојата мудрост;

⁷но не верував на зборови, додека не дојдов, и не видоа очите мои: и, ете, мене ни половината не ми беше речено; мудрост и богатство ти имаш повеќе отколку што сум слушала.

⁸Блажени се твоите луѓе, блажени се и тие твои слуги, што стојат пред тебе секогаш и ја слушаат мудроста твоја!

⁹Благословен да е Господ, твојот Бог, Кој благоволи да те постави на Израилевиот престол! Господ, поради вечната љубов Своја кон Израилот, те постави за цар, за да вршиш суд и правда.«

¹⁰И таа му подари на царот сто и дваесет таланти злато и големо множество благопријатни мириси и скапоцени камења; никогаш уште не беа донесувани толку многу благопријатни мириси, колку што Савската царица му подари на цар Соломона.

¹¹И Хирамовите кораби, што донесуваа злато од Офир, донесоа од Офир големо множество црвено дрво и скапоцени камења.

¹²И царот направи од тоа црвено дрво потпирки за храмот Господов и за царскиот дом, и гусли и псалтири за пеачите. Никогаш не беше донесувано толку црвено дрво и не беше видено до тој ден.

¹³Тогаш царот Соломон ѝ даде на Савската царица сѐ, што таа пожела и што посака, посебно од она, што цар Соломон ѝ го подари со рацете свои. И се врати таа во земјата своја, таа и сите слуги нејзини.

¹⁴Златото, што му доаѓаше на Соломона секоја година, тежеше шестотини шеесет и шест таланти,

¹⁵освен она, што се добиваше од разнесувачите на стока и од тргувањето на трговците и од сите арапски цареви и од обласните управници.

¹⁶Цар Соломон направи двесте големи штита од ковано злато, — по шестотини сикли злато се потрошени за секој штит;

¹⁷и триста помали штита од ковано злато, — од по три мини злато за секој штит; и царот ги постави во домот од ливанско дрво.

¹⁸Царот направи и голем престол од слонова коска и го обложи со чисто злато;

¹⁹пред престолот имаше шест степеника; одзади врвот на престолот беше кружен, и од двете страни на седиштето имаше потпирки, а до потпирките стоеја два лава;

²⁰и уште дванаесет лава стоеја таму од двете страни на шесте степеника. Слично нешто немало во ни едно царство.

²¹Сите садови за пиење кај цар Соломона беа златни, и сите садови во домот од ливанско дрво беа од чисто злато; ништо немаше од сребро, зашто во дните на Соломона среброто не се сметаше за нешто;

²²бидејќи царот имаше на морето тарсиски кораби заедно со Хирамовите кораби и во три години еднаш доаѓаа тарсиските кораби и донесуваа злато и сребро, слонова коска, мајмуни и пауни.

²³Цар Соломон ги надминуваше сите земни цареви по богатството и мудроста.

²⁴И сите земни цареви сакаа да го видат Соломона, за да ја послушаат мудроста негова, кој Бог ја беше ставил во срцето негово.

²⁵И тие му принесуваа, секој од себеси, дар: сребрени садови, облека, оружје и благопријатни мириси, коњи и маски секоја година.

²⁶Соломон така насобра коњи и коњаници; тој имаше четириесет илјади коли и дванаесет илјади коњаници, кои ги размести по колските градови и при царот во Ерусалим. Тој владееше над сите мориња — од реката до Филистејската земја и до пределите на Египет.

²⁷Царот го направи среброто во Ерусалим рамноцено со обичните камења, а кедрите поради нивното множесто ги направи рамноцени со дивите смокви, што растеа по низините.

²⁸Коњи, пак, донесуваа за царот Соломона од Египет; царските трговци ги купуваа до Кува со пари.

²⁹Купена и донесена до Египет една кола чинеше шестотини сикли сребро, а коњ, — сто и педесет. На ист начин тие со свои раце им ги доставуваа сето тоа на хетејските и арамејските цареви.