Read Lamkang 3 Царства 12 Bible Online

3 Царства 12 - Lamkang bible

3 Царства 12

¹Ровоам отиде во Сихем, бидејќи во Сихенм беа дошле сите Израилци, за да го зацарат.

²Чу за тоа Наватовиот син Јеровоам, кога се наоѓаше уште во Египет, каде што беше избегал од царот Соломона, и се врати од Египет;

³испратија по него и го повикаа. Тогаш Јеровоам и целото израилско собрание дојдоа и му говореа на царот Ровоам, велејќи:

⁴»Твојот татко ни наложи тежок товар, ти, пак, олесни ни го жестокото ропство од татка ти и тешкиот товар, што тој ни го наложи, па тогаш ќе ти служиме.«

⁵Тој им одговори: »Одете си, по три дена дојдете пак при мене.« И народот се разотиде.

⁶Царот Ровоам се советуваше со старците, кои беа при татка му Соломона, додека беше жив, и рече: »Како ќе ме посоветувате да му одговорам на овој народ?«

⁷Тие му одговорија, и рекоа: »Ако ти денес им бидеш слуга на овие луѓе и им услужиш, ако ги задоволиш и им говориш добри зборови, тие ќе ти бидат слуги во сите дни.«

⁸Но тој не го послуша советот, што му го беа дале старците, и се советуваше со младите, кои беа пораснале заедно со него и кои беа при него,

⁹и им рече: »Што ќе ме посоветувате да им одговорам на оние луѓе, што ми рекоа и кажаа: ‚олесни ни го игото, што ни го наложи татко ти?‘«

¹⁰Младите, пораснати заедно со него, му одговорија и рекоа: »Вака кажи им на тие луѓе, што ти рекле: ‚твојот татко ни наложи тешко иго, ти, пак, олесни ни‘ кажи им: малиот прст ми е подебел од бедрата на татка ми;

¹¹и така, ако татко ми ви наложувал тешко иго, јас ќе го зголемам вашето иго; татко ми ве казнуваше со камшици, јас, пак, ќе ве казнувам со скорпии.«

¹²Јеровоам, и сите луѓе, дојдоа при Ровоама на третиот ден, како што им беше заповедал царот, велејќи: »дојдете при мене на третиот ден.«

¹³И царот грубо му одговори на народот и не го послуша советот, што му го беа дале старците.

¹⁴И говореше според советот на младите и рече: »Татко ми ви наложил тежок товар, јас, пак, ќе го зголемам вашиот товар; татко ми ве казнуваше со камшици, јас, пак, ќе ве казнувам со скорпии.«

¹⁵И царот не го послуша народот, зашто така беше судено од Господа, за да се исполни зборот Негов, што го беше изрекол Господ преку Ахија Силомецот на Наватовиот син Јеровоама.

¹⁶И сите Израилци видоа, дека царот не ги послуша. Тогаш луѓето му одговорија на царот и рекоа: »Каков дел имаме кај Давида? За нас нема дел кај синот Јесеев; по шаторите свои, Израиле! Гледај си го својот дом, Давиде!« И Израил се разотиде по шаторите свои.

¹⁷Ровоам царуваше само над Израилевите синови, што живееја во Јудините градови.

¹⁸И царот Ровоам го испрати Адонирама, управникот над даноците; но сите Израилци го затрупаа со камења, и тој умре, а царот Ровоам брзо се качи во кола, за да избега во Ерусалим.

¹⁹И така Израилот се одметна од Давидовиот дом и до денес.

²⁰Кога сите Израилци слушнаа, дека Јеровоам се вратил од Египет, испратија и го повикаа во собранието и го зацарија над сите Израилци. Со Давидовиот дом не остана никој, освен племето Јудино и Венијаминово.

²¹Ровоам, откако пристигна во Ерусалим, собра од целиот Јудин дом и од коленото Венијаминово сто и осумдесет илјади избрани војници, за да војуваат против Израилевиот дом и да му го возвратат царството на Соломоновиот син Ровоам.

²²И би слово Божјо кон Семеја, човек Божји, и беше речено:

²³»Кажи му на Соломоновиот син Ровоама, царот јудејски, и на целиот Јудин и Венијаминов дом и на другиот народ:

²⁴вака вели Господ: ‚Не одете и не почнувајте војна против вашите браќа, Израилевите синови; вратете се секој во домот свој, бидејќи тоа беше од Мене.‘« И тие ги послушаа Господовите зборови и се вратија дома според словото Господово.

²⁵Јеровоам го изгради Сихем на Ефремовата гора и се насели во него; оттаму тргна и го изгради Фануил.

²⁶И Јеровоам си говореше во срцето свое: »Царството може пак да премине кон Давидовиот дом,

²⁷ако овој народ оди во Ерусалим да принесува жртви во домот Господов, тогаш срцето на тој народ ќе се сврти кон својот господар Ровоама, царот јудјски, ќе ме убијат и ќе се вратат при Ровоама, царот јудејски.«

²⁸И царот, откако се посоветува, направи две златни телиња, и му рече на народот: »Не ви треба да одете во Ерусалим; еве ги твоите богови, Израиле, кои те изведоа од Египетската земја.«

²⁹И едниот го остави во Ветил, а другиот — во Дан.

³⁰Тоа предизвика грев, зашто народот почна да оди при едниот од нив, дури во Дан и го оставија храмот Господов.

³¹И изгради идолско светилиште и постави од народот свештеници, кои не беа од Левиевите синови.

³²Јеровоам установи празник во осмиот месец на петнаесеттиот ден, сличен на оној празник, каков што имаше во Јудеја, и принесуваше жртви на жртвеникот; тоа го направи и во Ветил, за да им се принесуваат жртви на телињата, што ги направи. И постави во Ветил свештеници во идолските светилишта, што ги беше изградил,

³³и принесе жртви во жртвеникот, што беше го изградил во Ветил, во петнаесеттиот ден од осмиот месец, месец што произволно го определи; и установи празник за синовите Израилеви и пристапи кон жртвеникот, за да прекади.