Read Lamkang 3 Царства 15 Bible Online

3 Царства 15 - Lamkang bible

3 Царства 15

¹Не осумнаесеттата година од царувањето на Наватовиот син Јервоам, над Јудејците стана цар Авија.

²Тој царуваше во Ерусалим три години; името на мајка му беше Мааха, Авесаломова ќерка.

³Тој одеше во сите гревови на таткото свој, што тој ги вршеше пред него, и срцето негово не беше предадено на неговиот Господ Бог, како срцето на татка му Давида.

⁴Но заради Давида, неговиот Господ Бог му беше дал светило во Ерусалим, воздигнувајќи го по него синот негов и го закрепи Ерусалим,

⁵зашто Давид вршеше, она што беше угодно пред очите на Господа, и во сите дни на животот свој во ништо не отстапуваше од она, што Он му беше заповедал, освен постапката со Хетеецот Урија.

⁶Меѓу Ровоама и Јеровоама имаше војна во сите дни на животот нивни.

⁷Другите дела на Авија, и сѐ што вршел, е опишано во летописите на јудејските цареви. И имаше војна меѓу Авија и Јеровоама.

⁸Авија почина при татковците свои и го погребаа во Давидовиот град. И наместо него стана цар синот негов Аса.

⁹Аса стана цар над Јудејците во дваесеттата година од царувањето на израилскиот цар Јеровоам,

¹⁰и царуваше во Ерусалим четириесет и една година; името на мајка му беше Ана, Авесаломова ќерка.

¹¹Аса го вршеше она што беше угодно пред очите на Господа, како неговиот татко Давид.

¹²Тој ги изгони блудниците од земјата и ги отфрли сите идоли, што ги беа направиле татковците негови,

¹³и дури мајката своја Ана ја лиши од звањето царица, поради тоа што беше направила идол на Астарта; и го скрши Аса и нејзиниот идол и го изгори при потокот Кедрон.

¹⁴Идолските светилишта, навистина, не беа урнати. Но срцето на Аса му беше предадено на Господа во сите дни негови.

¹⁵И тој ги внесе во домот на Господа предметите, посветени на татко му негов, и предметите посветени од него: сребро, злато и садови.

¹⁶Меѓу Аса и израилскиот цар Васа имаше војна во сите нивни дни.

¹⁷Израилскиот цар Васа излезе против Јудеја и почна да ја гради Рама, та никој да не излегува, ниту да оди при јудејскиот цар Аса.

¹⁸Тогаш Аса го зеде сето сребро и злато, што беше останало во ризницата на домот Господов и во ризницата на царскиот дом, и го даде во рацете на слугите свои; и царот Аса ги испрати при Таверема, синот на Адера, син Хезионов, цар сириски, кој живееше во Дамаск, велејќи:

¹⁹»Нека има сојуз меѓу мене и тебе, како што имаше меѓу мојот татко и твојот татко; ете, ти испраќам на дар сребро и злато; раскини го сојузот свој со израилскиот цар Васа, та да се оттргне од мене.«

²⁰И синот на Адера го послуша царот Аса, и ги испрати своите војводи против израилските градови и ги порази Аин, Дан, Авел-Вет-Мах и целиот Кинерот, по целата Нефталимова земја.

²¹Кога го чу тоа, Васа престана да ја гради Рама и се врати во Сарир.

²²А царот Аса ги собра сите Јудејци без исклучок, и тие ги изнесоа од Рама камењата и дрвјата, кои Васа ги употребуваше за градење. Со нив царот Аса ги изгради Гива Венијаминова и Миспа.

²³Сите други дела на Аса сите негови подвизи и сѐ што изврши, и градовите што ги изгради, се опишани во летописите на јудејските цареви, освен тоа, дека на стари години го заболеа нозете.

²⁴Аса почина при татковците свои и беше погребан при нив во градот на татка си Давида. А место него стана цар синот негов Јосафат.

²⁵А Јеровоамовиот син Нават стана цар над Израилот во втората година на јудејскиот цар Аса и царуваше над Израилот две години.

²⁶Тој го вршеше, она што беше неугодно пред очите на Господа, одеше по патот на татка си и во гревовите негови, со кои тој го наведе во грев Израилот.

²⁷Против него се крена Ахиевиот син Васа, од Исахаровиот дом, и Васа го уби при Гаватон филистејски, кога Нават и сите Израилци го опседнуваа Гаватон;

²⁸Васа го уби во третата година јудејскиот цар Аса и стана цар место него.

²⁹Кога стана цар, тој го порази целиот Јеровоамов дом и не остана ниедна душа кај Јеровоама, додека не го истреби, според словото на Господа, што го беше изрекол преку својот слуга Ахија Силомецот,

³⁰поради гревовите на Јеровоама, кои тој сам ги напрви и со кои го наведе во грев Израилот, поради гревовите со кои тој го разгневи Господа, Бога Израилев.

³¹Другите дела на Навата, сѐ што тој извршил, се опишани во летописите на израилските цареви.

³²Меѓу Аса и израилскиот цар Васа имаше војна во текот на сите нивни денови.

³³Во третата година на јудејскиот цар Аса стана цар во Терс над сите Израилци Ахиевиот син Васа и царуваше дваесет и четири години.

³⁴Тој го вршеше она, што не беше угодно пред очите на Господа, и одеше по патот на Јеровоама и во гревовите негови, со кои тој го наведе во грев Израилот.