Read Lamkang 3 Царства 9 Bible Online

3 Царства 9 - Lamkang bible

3 Царства 9

¹Откако Соломон заврши градбата на Господовиот храм, на царскиот дом и сѐ, што беше посакал да направи,

²Господ повторно му се јави на Соломона, како што му се беше јавил во Гаваон.

³И Господ му рече: »Јас ја чув твојата молитва и твојата молба, за која Ме молеше и направив сѐ според твојата молитва, го осветив тој храм, што го изгради ти, за да биде засекогаш името Мое таму довека, и очите Мои, и срцето Мое ќе бидат таму во сите дни.

⁴А ти, ако одиш пред Моето лице, како што одеше татко ти Давид, со чисто срце и со правина, исполнувајќи сѐ, што сум ти заповедал, и ако ги пазиш Моите уредби и Моите закони,

⁵Јас ќе го поставам твојот царски трон над Израилот засекогаш, како што му реков на татка ти Давида, велејќи: ‚Нема да престане да излегува од тебе маж, кој седи на престолот Израилев.‘

⁶Ако вие и синовите ваши отстапите од Мене и не ги пазите Моите заповеди и Моите уредби, што сум ви ги дал, и ако тргнете и почнете да служите на други богови и да им се поклонувате,

⁷Јас ќе го истребам Израилот од лицето на замјата, што сум му ја дал, и храмот, што сум го посветил на Мое име, ќе го отфрлам од лицето Свое, и Израилот ќе стане за приказ и за подбивање кај сите народи.

⁸И за тој висок храм, секој, што ќе мине покрај него, ќе се вжаси, ќе потсвирне и ќе рече: ‚зошто ли постапил Господ така со оваа земја и со овој храм?‘

⁹И ќе речат: ‚затоа, што тие го оставија Господа, својот Бог, Кој ги изведе татковците нивни од Египетската земја, и се приврзаа кон други богови, им се поклонуваа и им служеа, — затоа Господ им го испрати ова зло!‘«

¹⁰Откако изминаа дваесет години, во текот на кои Соломон изгради два дома, — домот Господов и царскиот дом, —

¹¹за кои тирскиот цар Хриам му набавуваше на Соломона кедрово дрво и кипарисово дрво и злато според желбата негова, — цар Соломон му даде на Хирама дваесет градови во Галилејската земја.

¹²И Хирам излезе од Тир да ги прегледа градовите, што му ги даде Соломон, и тие не му се допаднаа.

¹³Затоа тој рече: »Какви се тие градови, што ти, брате мој, ми ги даде?« И ги нарече замја Кавул, како што се нарекуваат и денес.

¹⁴А Хирам му беше испратил на царот сто и дваесет таланти злато.

¹⁵Оттука и распределбата за данокот, што го наложи Соломон, за да го изгради храмот Господов и својот дом, Мелон и ѕидовите ерусалимски, Асор и Мегидон и Газер.

¹⁶Фараонот, египетскиот цар, беше дошол и го презел Газер, и со оган го беше изгорел, а Хананејците, што живееја во градот, ги беше испотепал, и го беше дал како мираз на ќерка си, Соломоновата жена.

¹⁷И тогаш Соломон го изгради Газер и Долни Веторон,

¹⁸Валат, Тамор во пустињата,

¹⁹и сите градови житници, што ги имаше Соломон, и градовите за колите, градовите за коњицата и сѐ она, што Соломон сакаше да изгради во Ерусалим, на Ливан и по целата земја на своето владение.

²⁰Сите луѓе, останати од Аморејците, Хетејците, Ферезејците, Хананејците, Евејците, Јевусејците и Герпесејците, кои не беа од Израилевите синови,

²¹децата нивни, останати по нив во земјата, кои Израилевите синови не можеа да ги истребат, — Соломон ги направи поданички работници, какви што се и денес.

²²А синовите Израилеви Соломон ги правеше работници; тие беа негови војници, служители, великодостојници, полководци и заповедници на неговите коли и на неговите коњаници.

²³Главните, пак, распоредници над Соломоновите работи, односно управниците на народот, што ја извршуваа работата, беа петстотини и педесет.

²⁴Фараоновата ќерка премина од Давидовиот град во својот дом, што го изгради Соломон за неа. Потоа тој го изгради Мелон.

²⁵Соломон принесуваше трипати годишно сепаленици и мирни жртви на жртвеникот, што Му го беше изградил на Господа, и кадеше врз него пред Господа. Така заврши градбата на домот.

²⁶Цар Соломон направи исто така и кораби во Гасион-Гавер, кој е при Елат, на брегот на Црвеното Море, во Идумејската земја.

²⁷И Хирам испрати на тие кораби свои поданици — корабари, што го знаат морето, заедно со Соломоновите поданици;

²⁸тие отидоа во Офир и зедоа оттаму злато четиристотини и дваесет таланти и му го донесоа на цар Соломона.