Read Lamkang 4 Царства 10 Bible Online

4 Царства 10 - Lamkang bible

4 Царства 10

¹Ахав имаше седумдесет синови во Самарија. Јуј напиша и испрати во Самарија до израилските војводи, старешини и воспитувачи на Ахавовите деца писма со ваква содржина:

²»Кога ќе стигне до вас ова писмо, бидејќи се при вас синовите на господарот ваш, а исто така кај вас се и колите и коњите, и утврдениот град и оружјето, —

³изберете го најдобриот и најдостојниот од синовите на господарот свој, поставете го на татковиот му престол и војувајте за домот на господарот свој.«

⁴Тие се уплашија многу и рекоа: »Ете, двајца цареви не устоија пред него, а како ќе устоиме ние?«

⁵Тогаш војводата на царскиот дом и градоначалникот, и старешините, и воспитувачите испратија да му кажат на Јуја: »Ние сме твои слуги и, што ќе ни кажеш, ќе направиме; никого нема да поставиме за цар; прави што ти е волја.«

⁶Тој повторно им напишта вакво писмо: »Ако сте мои и ако се покорувате на зборот мој, земете ги главите на синовите на вашиот господар и дојдете утре во ова време при мене во Језраел.« И царските синови беа седумдесет души; ги воспитуваа највидните во градот.

⁷Кога стигна до нив писмото, тие ги зедоа царските синови и ги заклаа — седумдесет души, ги ставија главите нивни во кошница и му ги испратија во Језраел.

⁸Дојде пратеникот, го извести и рече: »Ги донесовме главите на царските синови.« И тој рече: »Поставете ги во два купа при влезот на портите до утре.«

⁹Изутрината тој излезе, застана и му рече на сиот народ: »Вие не сте виновни. Еве, јас востанав против господарот свој и го убив, но сите овие кој ги уби?

¹⁰А сега знајте, дека нема да изостане на земјата ниедно слово Господово, што Он го изрекол за Ахавовиот дом; Господ го направи тоа, што го изрече преку Својот слуга Илија.«

¹¹И Јуј ги уби сите други од домот на Ахава во Језраел, и сите големци негови, и блиски негови, и свештениците негови, така што од него не остана ниту еден.

¹²Потоа стана, тргна и дојде во Самарија. По патот, кога се наоѓаше близу до овчарскиот Ветакад,

¹³Јуј ги сретна браќата на јудејскиот цар Охозија и ги праша: »Кои сте вие?« Тие одговорија: »Ние сме браќата на Охозија, одиме да видиме, здрави ли се синовите на царот и синовите на царицата.«

¹⁴То тој рече: »Фатете ги живи.« Ги фатија живи и ги заклаа четириесет и две души, при кладенецот на Ветакад, и од нив не остана ниту еден.

¹⁵Оттаму тргна и се сретна со Рихавовиот син Јонадав, кој му доаѓаше во пресрет; го поздрави и му рече: »Расположено ли е срцето твое така, како моето срце кон твоето?« Јонадав одговори: »Да.« Тогаш му рече: »Ако е така, дај ја раката своја.« И тој ја подаде раката, и тој го качи на колата при себе.

¹⁶И рече: »Тргнувај со мене и гледај ја мојата ревност кон Господа.« И го наместија во колата.

¹⁷Кога дојде во Самарија, тој ги уби сите, што останаа од Ахава во Самарија, така што сосема го истреби, според словото на Господа, што му го беше кажал на Илија.

¹⁸Тогаш Јуј го собра сиот народ и рече: »Ахав малку му служеше на Ваала; Јуј ќе му служи повеќе.

¹⁹Затоа, свикајте ги при мене сите пророци на Ваала, сите негови служители и сите негови свештеници, — никој да не отсуствува, зашто ќе му принесам голема жртва на Ваала. А секој, што нема да дојде, нема да остана жив.« Јуј го правеше тоа со лукавство, за да ги истреби Вааловите служители.

²⁰Тогаш рече Јуј: »Свикајте празничен собор за Ваала.« И прогласија собор.

²¹Тогаш Јуј испрати по сиот Израил, и дојдоа сите Ваалови служители; не остана ниеден да не дојде; и влегоа во домот на Ваала, и Вааловиот дом се исполни открај докрај.

²²И му кажа на чуварот на одеждите: »Донеси одежди за сите Ваалови служители!« И тој им донесе одежди.

²³Јуј влезе со Рихавовиот син Јонадав во домот Ваалов и им кажа на Вааловите служители: »Испитајте и разгледајте, дали се наоѓа некој од служителите на Господа, зашто тука треба да бидат само Вааловите служители.«

²⁴И тие пристапија да принесуваат жртви сепаленици и приноси. А Јуј постави надвор од домот осумдесет души и рече: »Душата на оној, од кого што ќе се спаси некој од луѓето, што ви ги предавам во рацете, ќе биде наместо душата на оној што се спасил.«

²⁵Кога жртвите сепаленици беа принесени, Јуј им рече на брзоодците и на војводите: »Одете, убијте ги, та ниеден да не излезе.« Ги убија со сечилото на мечот и ги исфрлија брзоодците и војводите, и отидоа во градот, каде што беше Вааловото светилиште,

²⁶ги изнесоа идолите од Вааловото светилиште и ги изгореа;

²⁷потоа го разбија Вааловиот идол, го разрушија Вааловото светилиште и го претворија во место на нечистотии, дури до денес.

²⁸Така го истреби Јуј Ваала од Израилската земја.

²⁹Но од гревовите на Наватовиот син Јеровоама, што го беше навел во грев Израилот, од нив Јуј не отстапи, од златните телиња, што беа во Ветил и во Дан.

³⁰Тогаш Господ му рече на Јуја: »Поради тоа што доброволно го изврши она што беше праведно пред очите Мои — го исполни над Ахавовиот дом сѐ она, што Ми беше на срце, твоите синови ќе седат до четвртиот род на Израилевиот престол.«

³¹Но Јуј не сакаше да оди според законот на Господа, Бога Израилев, од сѐ срце. Тој не отстапуваше од гревовите на Јеровоама, што го беше навел во грев Израилот.

³²Во тие денови Господ почна да откинува делови од Израилците и Азаил ги биеше по сите израилски предели:

³³на исток од Јордан, целата земја Галад, племето Гадово, Рувимово, Манасиево, кога ќе зафатиш од Ароир, при потокот Арнон, и Галад и Васан.

³⁴Другото за Јуја и за сѐ што тој го изврши, и за јуначките подвизи негови, е опишано во летописите на израилските цареви.

³⁵И почина Јуј при татковците свои, и го погребаа во Самарија. А место него стана цар синот негов Јоахаз.

³⁶Јуј царуваше над Израилот во Самарија дваесет и осум години.