Read Lamkang 4 Царства 14 Bible Online

4 Царства 14 - Lamkang bible

4 Царства 14

¹Во втората година на Јоаса, синот на израилскиот цар Јоахаз, стана цар Амасиј, син на јудејскиот цар Јоас:

²тој беше на дваесет и пет години, кога стана цар, и царуваше дваесет и девет години во Ерусалим. Мајка му се викаше Јоадина, од Ерусалим.

³И го вршеше тој она, што беше угодно пред очите на Господа, но не така, како неговиот татко Давид; тој во сѐ постапуваше како татка си Јоаса.

⁴Само идолските светилишта не беа урнати: народот уште принесуваше жртви и кадеше по тие светилишта.

⁵Кога се зацврсти царството во рацете негови, тој ги уби слугите свои, што беа го убиле царот, татко му негов.

⁶Но децата на убијците не ги уби, зашто е напишано во книгана на Мојсеевиот закон, во која Господ заповеда, велејќи: »Татковците да не бидат казнувани со смрт поради децата, и децата не треба да бидат казнувани со смрт заради татковците, туку секој треба да се казнува со смрт за својот престап.«

⁷Тој порази десет илјади Идумејци во Солениот Дол, и го зеде градот Села со војна, и му даде име Јоктеил, кое си остана и до денес.

⁸Тогаш Амасиј испрати пратеници до Јоаса, израилскиот цар, син на Јоахаза, Јујев син, да кажат: »Излези да се видиме лице в лице!«

⁹Тогаш израилскиот цар Јоас испрати до Амасија, јудејскиот цар, да кажат: »Трнот ливански испратил при кедарот ливански да каже: ‚дај ја ќерката своја за жена на синот мој. Но минале диви ѕверови ливански и го изгазиле тој трн.‘

¹⁰Ти ги порази Идумејците, и срцето твое се возгордеа. Превознесувај се и остани во домот свој. Што ти треба да предизвикуваш расправија за зло? Ќе паднеш ти и Јуда со тебе.«

¹¹Но Амасиј не послуша. Тогаш Јоас, царот израилски, излезе, и се видоа лице в лице, тој и Амасиј, царот јудејски, во Ветсамис, што е во Јудеја.

¹²Јудејците беа разбиени од Израилците, и се разбегаа по шаторите свои.

¹³Израилскиот цар Јоас го фати во Ветсамис јудејскиот цар Амасија, синот на Јоаса, Охозиев син, дојде во Ерусалим и урна четиристотини лакти од ерусалимскиот ѕид — од Ефремовите порти до Агловите порти.

¹⁴И го зеде сето злато и сребро и сите садови, какви што се најдоа во домот Господов и во сокровиштата на царскиот дом, и заложниците, и се врати во Самарија.

¹⁵Другите дела на Јоаса, што тој ги изврши, и за неговите јуначки подвизи, и како тој војуваше против јудејскиот цар Амасија, се опишани во летописите на израилските цареви.

¹⁶И почина Јоас при татковците свои, и беше погребан во Самарија, при израилските цареви. Место него стана цар синот негов Јеровоам.

¹⁷Амасиј, синот Јоасов, цар јудејски, по смртта на Јоахазовиот син Јоас, цар израилски, живееше петнаесет години.

¹⁸Другите дела на Амасија се запишани во летописите на јудејските цареви.

¹⁹И направија заговор против него во Ерусалим, и тој избега во Лахис. Испратија по него во Лахис, и таму го убија.

²⁰Го донесоа на коњи, и го погребаа во Ерусалим при татковците свои, во Давидовиот град.

²¹Сиот народ јудејски го зеде Азарија, кој беше на шеснаесет години, и го поставија за цар место неговиот татко Амасиј.

²²Тој го изгради Елат и му го врати на Јуда, откако царот, татко му, почина при татковците свои.

²³Израилскиот цар Јеровоам, син Јоасов, стана цар во Самарија во петнаесеттата година на јудејскиот цар Амасиј, Јоасов син, и царуваше четириесет и една година.

²⁴И го правеше она, што не беше угодно пред очите на Господа: не отстапуваше од ниеден грев на Наватовиот син Јеровоама, кој го беше навел во грев Израилот.

²⁵Тој ги установи границите на Израилот од влезот во Емат до пустињското море, според словото на Господа, Бог Израилев, што Он го беше изрекол преку слугата Свој Аматиевиот син Јона, пророк од Гетаховер,

²⁶зашто Господ ја виде неволјата на Израилот, толку горчлива, што немаше ни затворен, ни слободен, што би му бил помошник на Израилот.

²⁷И не сакаше Господ да го искорени името на Израилците под небото, па ги спаси преку раката на Јоасовиот син Јеровоама.

²⁸Другото за Јеровоама и за сѐ, што извршил, и за неговите јуначки подвизи, како војувал и како му го вратил на Израилот Дамаск и Емат, кои беа на Јуда, е опишано во летописите на израилските цареви.

²⁹И почина Јеровоам, при татковците свои, при израилските цареви. А место него стана цар синот негов Захариј.