Read Lamkang 4 Царства 20 Bible Online

4 Царства 20 - Lamkang bible

4 Царства 20

¹Во тие дни се разболе Језекиј на смрт; и дојде при него Амосовиот син, пророкот Исаија и му рече: »Вака вели Господ: ‚среди ги работите за домот свој, зашто ќе умреш, нема да оздравиш.‘«

²Се сврти Језекиј со лицето кон ѕидот и Му се помоли на Господа, велејќи:

³»О Господи, спомни си, дека јас одев пред лицето Твое верно и со предано на Тебе срце, и го вршев она, што беше угодно пред очите Твои.« И заплака Језекиј силно.

⁴Исаија уште не беше излегол од средниот двор, и би словото Господово кон него:

⁵»Врати се и кажи му на Језекија, владетелот на Мојот народ: вака вели Господ, Бог на твојот татко Давида — Ја чув молитвата твоја, ги видов солзите твои. Јас ќе те излекувам; на третиот ден ќе отидеш во домот Господов;

⁶и ќе додадам кон деновите твои петнаесет години, и ќе те спасам од рацете на асирскиот цар тебе и твојот град, и ќе го заштитам тој град заради Себеси и заради Мојот слуга Давида.«

⁷Тогаш рече Исаија: »Земете суви смокви.« И зедоа, и ги наложија на чирот; и тој оздраве.

⁸Језекиј му рече на Исаија: »Каков е знакот, дека Господ ќе ме излекува и дека на третиот ден ќе одам во домот Господов?«

⁹Исаија одговори: »Еве ти знак од Господа, дека Господ ќе го исполни словото, што го кажал — сакаш ли напред да оди сенката десет степени или десет степени назад?«

¹⁰И рече Језекиј: »Лесно е да се помести сенката десет степени напред; не, нека се врати сенката десет степени назад.«

¹¹Повика пророкот Исаија кон Господа, и Он ја врати сенката назад десет степени според Ахазовите степени, по кои се спушташе.

¹²Во тоа време вавилонскиот цар Мародах Валадан, син на Валадана, му испрати писмо и подароци на Језекија, зашто беше чул, дека Јазекиј бил болен.

¹³Језекиј, откако ги слушна пратениците, им ги покажа ризниците свои, среброто и златото, и ароматите, и скапоцените масла, и целата своја оружарница и сѐ што се наоѓаше во скровиштата негови; и не остана ништо, што да не им го покажа Језекиј во домот свој и во целото свое владение.

¹⁴Пророкот Исаија дојде при царот Језекија и го праша: »Што кажаа тие луѓе, и од каде дојдоа при тебе?« Језекиј одговори: »Од далечна земја дојдоа тие, од Вавилон.«

¹⁵Исаија пак праша: »Што видоа тие во домот твој?« Језекиј одговори: »Видоа сѐ што е во мојот дом; не остана ништо, што да ни им го покажав во ризниците свои.«

¹⁶Тогаш Исаија му рече на Језекија: »Чуј го словото Господово:

¹⁷,Еве, ќе дојдат дни, и си што е во твојот дом, и што го собрале татковците твои до денес, ќе биде однесено во Вавилон; ништо нема да остане — вели Господ.

¹⁸Ќе земат од синовите твои, што ќе произлезе од тебе, што ќе ги родиш, и тие ќе ти бидат слуги во дворецот на вавилонскиот цар.«

¹⁹А Језекиј му рече на Исаија: »Добро е словото Господово, што ти го изрече.« И продолжи: »Да биде мир и доброчестивост во моите дни!«

²⁰Другата работа за Језекија, за сите негови подвизи, дека направи езера и водовод и спроведе вода во градот, опишано е во летописите на јудејските цареви.

²¹И почина Језекиј при татковците свои, а место него стана цар синот негов Манасиј.