Read Lamkang 4 Царства 21 Bible Online

4 Царства 21 - Lamkang bible

4 Царства 21

¹Манасиј беше на дванаесет години, кога стана цар, и царуваше во Ерусалим педесет години; мајка му се викаше Офовија.

²Но тој го вршеше она, што не беше угодно пред очите на Господа, подражавајќи ги лошите работи на оние народи, кои Господ ги беше изгонил од пред лицето на Израилевите синови.

³Тој одново ги подигна идолските светилишта, кои татко му Језекиј ги беше уништил, му подигна жртвеници на Ваала и направи дубрава, како што направи израилскиот цар Ахав; и се клањаше на сета небесна војска и ѝ служеше;

⁴а изгради жртвеници и во домот Господов, за кого Господ беше рекол: »Во Ерусалим ќе го поставам името Свое.«

⁵Тој изгради и жртвеници за сета небеска војска во двата двора на домот Господов;

⁶го пренесе преку оган синот свој, гаташе и врачаше; си набави извикувачи на мртви и маѓесници и изврши многу неугодни работи пред очите на Господа, за да Го разгневи.

⁷Направи и статуа на Астарта и ја постави во домот, за кој Господ му беше говорел на Давида и на синот негов Соломона; во овој дом и во Ерусалим, што Јас го избрав меѓу синовите Израилеви племиња, го ставам името Свое за секогаш:

⁸и во иднина нема да ја оставам ногата на Израилот да излезе од земјата, што сум им ја дал на татковците нивни, само ако тие се потрудат да постапуваат според сѐ она, што сум заповедал, и според целиот закон, што им го даде Мојот слуга Мојсеј.

⁹Но тие не послушаа; и Манасиј ги разврати дотаму, што тие постапуваа полошо и од оние народи, кои Господ ги беше истребил пред лицето на Израилевите синови.

¹⁰И говореше Господ преку Своите слуги — пророците, и рече:

¹¹»Поради тоа што јудејскиот цар Манасиј ги изврши тие лоши дела, полоши од сѐ она, што го вршеа Аморејците, кои беа пред него, и го наведе Јуда во грев со своите идоли,

¹²затоа Господ вели вака: Еве, врз Ерусалим и врз Јуда ќе испратам такво зло, што, кој ќе чуе за него, ќе му писнат и двете уши;

¹³и ќе го оптегнам над Ерусалим јажето мерник на Самарија и мерката на Ахавовиот дом, и ќе го избришам Ерусалим така, како што се брише сад, — го бришат и го затвораат;

¹⁴ќе го оставам остатокот од Моето населедство и ќе ги предадам во рацете на непријателите нивни, и тие ќе бидат разграбгени и пленети од сите свои напријатели,

¹⁵поради тоа што го вршеа она, што беше неугодно пред очите Мои и Ме разгневуваа од оној ден, во кој татковиците нивни излегоа од Египет, дури до денес.«

¹⁶А при тоа Манасиј пролеа мошне многу невина крв, та го наполни со неа Ерусалим открај докрај, освен својот грев со што го вовлече Јуда во грев, да не врши угодни дела пред очите на Господа.

¹⁷Другото за Манасија и за сѐ што тој го извршил, и за гревовите негови, со кои згрешил, е опишано во летописите на јудејските цареви.

¹⁸И почина Манасиј при татковиците свои, и беше погребан во градината при домот негов, во градината на Ози. А место него стана цар синот негов Амон.

¹⁹Амон беше на дваесет и две години, кога стана цар, и царуваше во Ерусалим две години; мајка му се викаше Месолемет, ќерка Арусова, од Јетва.

²⁰И тој го вршеше, она што не беше угодно пред очите на Господа, така, како што го правеше тоа татко му Манасиј;

²¹одеше токму по истиот пат, по кој одеше татко му; им служеше на идолите, на кои им служеше татко му, и им се клањаше.

²²Тој Го остави Господа, Бога на татковците свои, и не одеше по патот Господов.

²³Амоновите слуги се побунија против него и го убија царот во домот негов.

²⁴Но народот на земјата ги уби сите заговореници против царот Амона; и народот на земјата го постави за цар место него синот негов Јосиј.

²⁵Другите дела на Амона што ги извршил тој, е опишано во летописите на јудејските цареви.

²⁶И го погребаа во гробницата негова, во градината на Ози. А место него стана цар син му Јосиј.