Read Lamkang 4 Царства 8 Bible Online

4 Царства 8 - Lamkang bible

4 Царства 8

¹И ѝ рече Јелисеј на жената, чиј син беше воскреснал: »Стани и оди, ти и твојот дом и склони се таму, каде што можеш да поживееш, зашто Господ повика глад, и тој ќе трае во оваа земја седум години.«

²Стана таа жена, и постапи според зборот на Божјиот човек: отиде таа и нејзиниот дом, и живееше во филистејската земја седум години.

³Откако изминаа седум години, се врати таа жена од Филистејската земја и дојде да го моли царот за куќата своја и нивата своја.

⁴Царот тогаш разговараше со Гиезиј, слугата на Божјиот човек, и му рече: »Раскажи ми сѐ што е позабележливо, што го извршил Јелисеј.«

⁵А во тоа време, кога тој му раскажуваше на царот, дека Јелисеј оживеал еден умрен, — жената, чиј син беше воскреснат, го молеше царот за куќата своја, и нивата своја. Тогаш Гиезиј рече: »Господару мој, цару, таа е истата жена и овој е истиот син нејзин, кого Јелисеј го оживе.«

⁶Царот ја праша жената, и таа му раскажа. И ѝ даде царот еден од царедворците и рече: »Да ѝ се врати сѐ што е нејзино и сите приходи од нивата, од оној ден, кога ја напуштила земјата, до сега.«

⁷И дојде Јелисеј во Дамаск, кога сирискиот цар Адад беше болен. Му јавија на Адада и рекоа: »Тука дојде Божјиот човек.«

⁸Тогаш царот му рече на Азаила: »Земи в рака дар и оди, пречекај го Божјиот човек и прашај го преку него Господа, велејќи: ‚ќе оздравам ли од оваа болест?‘«

⁹Азаил отиде да го пречека и заде в рака дар и сѐ што е најдобро во Дамаск, колку што можат да носат четириесет камили, па отиде и застана пред лицето негово и му рече: »Твојот син Адад, сирискиот цар, ме испрати при тебе да прашам: ‚ќе оздравам ли од оваа болест?‘«

¹⁰Јалисеј му одговори: »Оди и кажи му: ќе оздравиш. Меѓутоа, Господ му јави, дека тој ќе умре.«

¹¹И го управи Јелисеј врз него погледот свој, а тој стоеше, додека оној се занесе; и заплака Божјиот човек.

¹²И Азаил праша: »Зошто плаче господарот мој?« А тој одговори: »Затоа што знам, какво зло ќе им направиш на Израилевите синови: тврдините нивни на оган ќе ги предадеш, момците нивни со меч ќе ги погубиш, цицалчињата нивни ќе ги избиеш и непразните жени нивни ќе ги расечеш.«

¹³И му рече Азаил: »Што е твојот слуга? Дали е куче та да може да направи така страшни работи?« Јелисеј му одговори: »Господ ми го покажа во тебе царот на Сирија.«

¹⁴Тој си отиде од Јелисеја и дојде при господарот свој. И тој го праша: »Што ти зборуваше Јелисеј?« Тој одговори: »Ми кажа дека ќе оздравиш.«

¹⁵На другиот ден, меѓутоа, Азаил ја зеде завивката, ја натопи во вода и ја стави врз лицето негово, и царот умре. И наместо него стана цар Азаил.

¹⁶По јудејскиот цар Јосафат, стана цар Јосафатиовиот син Јорам, цар јудејски — во петтата година на Ахавовиот син Јорам, цар израилски.

¹⁷Тој беше на триесет и две години, кога стана цар, и царуваше осум години во Ерусалим;

¹⁸и одеше по патот на израилските цареви, како што постапуваше Ахавовиот дом, бидејќи Ахавовата ќерка му беше жена и го правеше она што не беше угодно пред очите на Господа.

¹⁹Но, Господ не сакаше да го погуби Јуда, заради својот слуга Давида, зашто Он беше ветил да му даде светило меѓу децата негови за сите времиња.

²⁰Во неговите дни Едом се измолкна од раката на Јуда и си постави цар.

²¹И отиде Јорам во Саир, и сите коли со него; стана тој во една ноќ и ги порази Идумејците, што го опколуваа, и заповедниците на колите, но народот избега во шаторите свои.

²²И се спаси Едом од раката на Јуда до ден денес. Во исто време се измолкна и Ливна.

²³Другото за Јорама и сѐ што извршил, е опишано во летописите на јудејските цареви.

²⁴И почина Јорам при татковците свои, и беше погребан при татковците свои во Давидовиот град. А место него стана цар синот негов Охозиј.

²⁵Охозиј, син на јудејскиот цар Јорама, стана цар во данаесеттата година на Ахавовиот син Јорама, израилски цар.

²⁶Охозиј беше на дваесет и две години, кога стана цар, и царуваше една година во Ерусалим. А мајка му се викаше Готолија, ќерка на израилскиот цар Амвриј.

²⁷Тој одеше по патот на Ахавовиот дом и го правеше она што не беше угодно пред очите на Господа, како Ахавовиот дом, зашто беше во роднинство со Ахавовиот дом.

²⁸Тој отиде со Ахавовиот син Јорама во војна против сирискиот цар Азаил во Рамот Галадски, и Сиријците го ранија Јорама.

²⁹И царот Јорам се врати да се лекува во Језраел од раните, што му ги нанесоа Сиријците во Рамот, кога војуваше против сирискиот цар Азаил. И Охозија, Јорамовиот син, јудјски цар, дојде да го посети Ахавовиот син Јорама во Језраел, бидејќи беше болен.