Read Lamkang 1 Летописи 13 Bible Online

1 Летописи 13 - Lamkang bible

1 Летописи 13

¹Давид се советуваше со илјадниците, стотниците и со сите војводи,

²и му кажаа на целото собрание израилско: »ако ви е угодно, и ако благослови Господ, Бог наш, да испратиме до другите наши браќа насекаде по целата Израилска земја, а исто така и до свештениците и левитите во градовите и селата нивни, за да се соберат при нас,

³и да го пренесеме Ковчегот на нашиот Бог при нас, зашто во Сауловите дни не се обрнувавме кон него.«

⁴И целото собрание рече: »Така нека биде!« зашто тоа му се виде праведно на целиот народ.

⁵Така Давид ги собра сите Израилци, од Сихор Египетски до влезот во Емат, за да го пренесат Ковчетот Божји од Киријат-Јарим.

⁶И отиде Давид и сиот Израил во Кириат-Јарим, што е во Јудеја, за да го пренесат оттаму Ковчегот на Бога, Господа, Кој седи на херувими, врз кого се повикува Неговото име.

⁷И го повезоа Ковчегот на нова кола од домот Аминадавов, а Оз и браќата негови ја водеа колата.

⁸Давид, пак, и сите Израилци свиреа со сета сила пред Бога, со пеење на гусли, псалтири, тимпани и труби.

⁹Кога стигнаа до Хидоновото гумно, Оз посегна со раката да го придржи Ковчегот, бидејќи воловите го беа настраниле.

¹⁰Но Господ се разгневи на Оза и го порази поради тоа што посегна со рака кон Ковчегот, и тој умре на самото место пред Божјото лице.

¹¹Давид се нажали затоа што Господ го порази Оза. И го нарече тоа место Озов пораз; така се нарекува и до ден денешен.

¹²И во тој ден Давид се уплаши од Бога и рече: »Како ќе го внесам при себеси Ковчегот Божји?«

¹³И не го пренесе Давид Ковчегот при себеси во Давидовиот град, туку го сврте кон куќата на Гетецот Аведар.

¹⁴И стоеше Ковчегот Божји кај Аведара во куќата негова три месеци, и Господ го благослови Аведаровиот дом и сѐ што имаше.