Read Lamkang 1 Летописи 15 Bible Online

1 Летописи 15 - Lamkang bible

1 Летописи 15

¹Тогаш си изгради тој палата во Давидовиот град, подготви место за Ковчегот Божји и направи скинија за него.

²И рече Давид: »Никој не смее да го носи Ковчегот Божји, освен левитите, бидејќи нив ги избра Господ, за да го носат Ковчегот на Бога и да му служат засекогаш.«

³И ги собра Давид сите Израилци во Ерусалим, за да го внесат Ковчегот Господов на местото негово, што беше го поставил за него.

⁴Па ги свика Давид синовите Аронови и левитите:

⁵од синовите Каатови, началникот Урил и браќата негови — сто и дваесет души;

⁶од синовите Марариеви, началникот Асаија и браќата негови — двесте и дваесет души;

⁷од синовите Гирсонови, началникот Јоила и браќата негови — сто и триесет души;

⁸од синовите Елисафанови, начланикот Семеја и браќата негови — двесте;

⁹од синовите Хевронови, началникот Елиила и браќата негови — осумдесет;

¹⁰од синовите Озиилови, начланикот Аминадава и браќата негови — сто и дванаесет.

¹¹И ги повика Давид свештениците: Садока и Авијатара, и левитите: Урила, Асаија, Јоила, Семеја, Елиила и Аминадава,

¹²и им рече: »Вие, началници на левитските родови, осветете се, вие и браќата ваши, и однесете го Ковчегот на Господа, Бога Израилев, на местото, што сум му го подготвил;

¹³и поради тоа што порано не го вршевте вие тоа, Господ, Бог наш, нѐ раздели, затоа што не Го баравме, како што требаше.«

¹⁴И се осветија свштениците и левитите, за да го носат ковчегот на Господа, Бога Израилев.

¹⁵И синовите левитски го понесоа ковчегот Божји, како што беше заповедал Мојсеј според словото Господово, на раменици, со лостови.

¹⁶Тогаш Давид им заповеда на левитските началници да ги постават браќата свои певци со свирки — псалтири, гусли и кимвали, да разгласат со висок радосен глас.

¹⁷Левитите го поставија Јоиловиот син Етана, и од браќате негови — Варахиевиот син Асаф, а од синовите Мерариеви, нивни браќа — Кисеовиот син Етан;

¹⁸и со нив браќата нивни, второстепени: Захарија, Озила, Семирамота, Јеила, Ананија, Елијава, Ванеја, Масија, Мататаија, Елифала, Макенија и Авдеда, Јеила и Озија вратари.

¹⁹Еман, Асаф и Етан свиреа високо на бакарни кимвали,

²⁰а Захарија, Озиил, Семирамот, Јехил, Ананиј, Елиав, Масија и Ванеја — на псалтири, со тенок глас.

²¹А Мататија, Елифала, Макенеј, Авдедом, Јеил и Озија — на гусли, за да преземаат.

²²Хоненија, пак, началник левитски, беше учител по пеење, зашто беше вешт во пеењето.

²³Варахија и Елкана беа вратари при Ковчегот.

²⁴Совенија, Јосафат, Натанаил, Амасија, Захарија, Ванаја и Елиезер, свештеници, трубеа со труби пред Ковчегот Божји. Авдедом и Јехија беа вратари при Ковчегот.

²⁵И така Давид и старешините Израилеви и илјадниците отидоа да го пренесат Ковчегот на заветот Господов од домот на Авдедома со веселба.

²⁶И кога Бог им помогна на левитите, што го носеа Ковчегот на заветот Господов, заклаа како жртва седум телиња и седум овни.

²⁷Давид беше огрнат со наметка од тенко платно, а исто така и сите левити, како и певците што го носеа Ковчегот, Хоненија, кој раководеше со свирачите и со певците. Давид носеше и ленен ефод.

²⁸И така сиот Израил го внесуваше Ковчегот на заветот со извици, при звуци од рог, труби и кимвали, свирејќи на псалтири и гусли.

²⁹Кога Ковчегот на заветот Господов влегуваше во Давидовиот град, Мелхола, Сауловата ќерка, гледаше од прозорецот и, откако го виде царот Давид како игра и се весели, го презре во срцето свое.