Read Lamkang 1 Летописи 17 Bible Online

1 Летописи 17 - Lamkang bible

1 Летописи 17

¹Кога Давид живееше во својот дом, му рече на пророкот Натана »Еве, јас живеам во кедров дом, а ковчегот на заветот Господов е под шатор.«

²А Натан му одговори на Давида: »Врши сѐ што ти е на срце, зашто Господ е со тебе.«

³Но во истата ноќ му дојде словото Божјо на Натана:

⁴»Оди и кажи му на слугата Мој Давида: вака вели Господ: ‚Ти нема да ми изградиш дом, каде што ќе живеам,

⁵зашто Јас не сум живеел во дом од денот кога ги изведов синовите Израилеви, и до денес, а одев од шатор во шатор и од живеалиште во живеалиште.

⁶Каде и да одев со сиот Израил, му реков ли, макар и збор, на некого од судиите Израилски, на кои им бев заповедал да му бидат пастири на Мојот народ: »зошто не ми изградите кедров дом?«‘

⁷И сега вака кажи му на Мојот слуга Давид: вака вели Господ Саваот: Те зедов од овчото стадо, за да те направам водач на Мојот народ Израилот;

⁸бев со тебе секогаш, каде и да одеше, ги поразив сите твои непријатели пред лицето твое и го направив името твое како името на големите по земјата;

⁹подготвив место за Мојот народ Израилот, го зацврстив, и тој ќе живее спокојно на своето место, и нема повеќе да го вознемируваат, нечестивите нема повеќе да го притискаат, како порано,

¹⁰во оние дни, кога Јас бев поставил судии над Мојот народ Израилот, и Јас бев ги смирил сите твои непријатели, и те известив, дека Господ ќе ти изгради дом.

¹¹Кога ќе се исполнат твоите дни, и ти ќе се прибереш кај татковците свои, тогаш ќе го подигнам твоето семе по тебе, што ќе биде од синовите твои, и ќе го зацврстам царстово негово.

¹²Тој ќе Ми изгради дом, и ќе го утврдам престолот негов засекогаш.

¹³Јас ќе му бидам татко, и тој ќе Ми биде син, и милоста Своја нема да ја кренам од него, како што ја кренав од оној што беше пред тебе.

¹⁴ќе го поставам во Мојот дом и во Моето царство засекогаш, престолот негов ќе биде вечно цврст.«

¹⁵Сите тие зборови и целото видение Натан точно му ги раскажа на Давида.

¹⁶Цар Давид дојде, застана пред лицето Господово и рече: »Кој сум јас, Господе Боже, и што е мојот дом, та толку ме подигна?

¹⁷Но и тоа се покажа малку во Твоите очи, Боже; ти навестуваш за домот на Твојот слуга далечна иднина и гледаш на мене како на голем човек, Господи Боже!

¹⁸Што уште може да прибави пред Тебе Давид, за да се возвеличи Твојот слуга? Ти го знаеш Својот слуга!

¹⁹Господи, за Твојот слуга, според срцето Свое, Ти ги вршиш сите тие големи дела, објавувајќи го ова сето величие.

²⁰Господи, по сѐ она што го чув со ушите свои, сличен на Тебе нема и нема Бог освен Тебе.

²¹И кој е сличен на Твојот народ Израилот, единствен народ на земјата, кај кој доаѓал Бог, да го искупи за својот народ, за да се здобие со име на големи и страшни дела, — преку прогонување на народите од лицето на Својот народ, кој го спаси од Египет Ти.

²²Ти го направи Твојот народ Израилот Свој сопствен народ засекогаш и Ти, Господи, стана негов Бог.

²³И така, сега, о Господи, утврди го засекогаш словото, што си му го кажал на Твојот слуга и за неговиот дом, и направи, според она како што си кажал.

²⁴Нека се зацврсти и нека се возвеличи Твоето име засекогаш, за да велат: ‚Господ Саваот, Бог Израилев, е Бог на Израилот‘, и домот на Твојот слуга Давида да биде цврст пред Твоето лице.

²⁵Зашто Ти, Боже мој, му јави на Твојот слуга, дека ќе му изградиш дом, та затоа и Твојот слуга се осмели да се моли пред Тебе.

²⁶И сега, Господи, Ти си Бог, и Ти го вети за Твојот слуга тоа добро.

²⁷Почни, пак, да го благословуваш домот на Твојот слуга, за да биде вечен пред Твоето лице; зашто, ако Ти, Господи, ги благословиш, ќе биде благословен засекогаш.«