Read Lamkang 1 Летописи 18 Bible Online

1 Летописи 18 - Lamkang bible

1 Летописи 18

¹Потоа Давид ги порази Филистејците и ги покори, па го презеде Гет и нему потчинетите градови од рацете на Филистејците.

²Тој ги порази и Моавците, и Моавците станаа робови на Давида и му даваа данок.

³Давид го порази и сувскиот цар Адраазар во Емат, кога тој одеше да ја утврди власта своја при реката Еуфрат.

⁴И зеде Давид од него илјада коли, седум илјади коњаници и дваесет илјади пешаци; и ги уништи Давид сите коли, оставајќи од нив само сто.

⁵Дамаските Сиријци сакаа да му дојдат на помош на сувскиот цар Адраазара, но Давид порази двесте и две илјади Сиријци.

⁶Давид постави стража во Сирија Дамаска, и Сиријците му станаа на Давида робови и му плаќаа данок. Така му помагаше Господ на Давида секогаш, каде и да одеше.

⁷Давид ги одзеде златните штитови, што ги носеа Адраазаровите слуги, и ги донесе во Ерусалим.

⁸А од Метавет и од избраните Адраазарови градови, Давид однесе мошне многу бакар. Од него Соломон ги направи бакарното море и столбовите, и бакарните садови.

⁹Кога чу за тоа ематскиот цар Тоа, дека Давид ја поразил целата војска на сувскиот цар Адраазар,

¹⁰го испрати синот свој Адурама при царот Давида, да го поздрави и да му благодари, поради тоа што војувал со Адраазара и го поразил — зашто Тоа беше во војна со Адраазара, — и по него испрати секакви садови златни, сребрени и бакарни.

¹¹Царот Давид му ги посвети на Господа, заедно со среброто и златото, што го беше одзел од сите народи: Идумејците, Моавците, Амонитите, Филистејците и Амаликијците.

¹²И Саруевиот син Авеса во Солената Долина порази осумнаесет илјади Идумејци;

¹³и постави во Идумеја стража, и сите Идумејци му станаа робови на Давида. Господ му помагаше на Давида секогаш, каде и да одеше.

¹⁴И царуваше Давид на сиот Израил и делеше суд и правда на сиот народ свој.

¹⁵Јоав, Саруевиот син, беше војвода над војската, а Јосафат, Ахилудовиот син — летописец,

¹⁶Садок, синот Ахитов, и Авимелех, синот Авијатаров, беа свештеници, а Суса — писар,

¹⁷Ванеја, синот Јодаев, беше над Хетејците и Фелетејците, додека синовите Давидови беа први при царот.