Read Lamkang 1 Летописи 21 Bible Online

1 Летописи 21 - Lamkang bible

1 Летописи 21

¹Се крена сатаната против Израилот и го поттикна Давида да ги преброи Израилците.

²И Давид му рече на Јоава и на началниците народни: »Одете, пребројте ги Израилците од Вирсавија до Дан, и соопштете ми за да го знам бројот нивни.«

³Јоав рече: »Да го намножи Господ народот Свој стопати повеќе, отколку што е! Сите тие, господаре мој, царе, нели се слуги на мојот господар? Зошто го сака тоа мојот господар? Зошто тоа да се запише како грев на Израилот?«

⁴Но царскиот збор надвладеа над Јоава. И отиде Јоав, та го обиколи сиот Израил, и дојде во Ерусалим.

⁵И му даде Јоав на Давида список на преборениот народ. Сите Израилци беа илјада илјади, и сто илјади мажи мечоносци, и Јудејци четиристотини и седумдесет илјади мечоносци.

⁶А левитите и Венијаминовите не ги преброи со нив, зашто царскиот збор му беше одвратен на Јоава.

⁷Тоа нешто не беше угодно во очите на Бога, и Он го порази Израилот.

⁸И Давид Му рече на Бога: »Многу згрешив, што го направив тоа. Сега прости му ја вината на Твојот слуга, зашто постапив многу неразумно.«

⁹И му рече Господ на Гада, јасновидецот Давидов:

¹⁰»Оди и кажи му на Давида: вака вели Господ: Тие казни ти предлагам; избери си една од нив, и Јас ќе ја испратам врз тебе.«

¹¹Дојде Гад при Давида и му рече: »Така вели Господ избери си:

¹²‚или три години глад, или три месеци да бидеш прогонуван од твоите непријатели, и мечот на твоите непријатели да се допира до тебе; или три дена мечот Господов и помор по земјата и Ангел Господов да убива по сите предели на Израилот.‘ И така, види што да Му одговорам на Оној, Кој ме испрати со овие зборови.«

¹³Давид му одговори на Гада: »Многу ми е тешко, но подобро да паднам во рацете на Господа, зашто милосрдието Негово е многу големо; само да не паднам во рацете човечки.«

¹⁴И испрати Господ помор на Израилот, и умреа седумдесет илјади души Израилци.

¹⁵Па го испрати Господ Ангелот во Ерусалим, за да го истребува. И кога почна да го истребува, Господ виде и се покаја порати тоа зло, и му рече на Ангелот истребител: »Доста! Сега спушти ја раката своја!« А Ангелот тогаш стоеше над гумното на Јевусеецот Орна.

¹⁶Давид ги крена очите и го виде Ангелот Господов како стои меѓу небото и земјата со гол меч во раката негова, протегнат над Ерусалим; и падна Давид ничкум и старешините, покриени со вреќишта.

¹⁷И Му рече Давид на Господа: »Нели јас наредив да го пребројат народот? Јас згрешив, јас направив зло, а овие овци што направиле? Господи, Боже мој! Нека биде Твојата рака врз мене и врз мојот татков дом, а не врз Твојот народ, за да го погубиш.«

¹⁸И Ангелот Господов му рече на Гада, за да му каже на Давида: »Нека дојде Давид и нека постави жртвеник на Господа врз гумното на Јевусеецот Орна.«

¹⁹Давид отиде, според зборовите на Гада, кој му говореше од името Господово.

²⁰Орна се сврти, го вида Ангелот, и четворицата синови негови се сокрија со него. Орна тогаш вршеше пченица.

²¹Дојде Давид при Орна. Орна, откако погледа и го вида Давида, излезе од гумното и му се поклони на Давида ничкум до земја.

²²Давид му рече на Орна: »Дај ми го местото на гумново, јас ќе изградам на него жртвеник на Господа; дај ми го за онолку колку што чини, за да се прекине истребувањето на народот.«

²³Орна му одговори на Давида: »Земи го: нека мојот цар-господар прави што му е волја; еве, ги давам и воловите за сепаленици, и плуговите дрвени, и пченицата — за принос; сето тоа го давам како дар.«

²⁴Царот Давид му рече на Орна: »Не, јас сакам да го купам тоа од тебе за онолку колку што чини, зашто нема да Му принесувам на Господа твој имот и нема да принесувам сепаленици од нешто, земено како подарок.«

²⁵И Давид му даде на Орна за она место шестотини сикли злато.

²⁶Па изгради Давид таму жртвеник на Господа и Му принесе сепаленици и мирни жртви; и Го призва Господа, и Он го послуша, испраќајќи оган од небото врз жртвеникот за сепаленици.

²⁷Тогаш Господ му рече на Ангелот: »Врати го мечот свој во ножницата негова!«

²⁸Во тоа време Давид, откако виде дека Господ го послуша на гумното на Јевусеецот Орна, таму принесе жртва.

²⁹А Господовата скинија, што беше ја направил Мојсеј во пустињата, и жртвеникот за сепаленици во тоа време се најдоа на Гаваонската висина.

³⁰И Давид не можеше да оди таму, за да Го побара Бога, зашто беше уплашен од мечот на Ангелот Господов.