Read Lamkang 2 Летописи 10 Bible Online

2 Летописи 10 - Lamkang bible

2 Летописи 10

¹Ровоам отиде во Сихем, зашто во Сихем се беа собрале сите Израилци, за да го изберат за цар.

²Кога чу за тоа Јеровоам, синот Наватов, — кој се наоѓаше во Египет, каде што беше избегал од царот Соломон, — тој се врати од Египет.

³Испратија да го повикаат. Дојде Јеровоам и сиот Израил, и му говореа на Ровоама вака:

⁴»Твојот татко ни наложи тешко иго; ти пак олесни ни го тешкото ропство од татка ти и тешкото иго, што ни го наложи тој, и ние ќе ти служиме.«

⁵Ровоам им одговори: »По три дена дојдете пак при мене.« И народот се разотиде.

⁶Се посоветува царот Ровоам со старешините, што стоеја пред татка му Соломона, додека беше жив, и им рече: »Што ќе ме посоветувате да му одговорам на овој народ?«

⁷Тие му одговорија: »Ако бидеш добар спрема овој народ и му угодиш, ако му говориш благи зборови, тој ќе ти служи во сите дни.«

⁸Но тој го отфрли советот, што му го дадоа старешините, па почна да се советува со младите, што беа израснале заедно со него и служеа при него;

⁹па им рече: »Што ќе ми советувате да им одговорам на оние луѓе, што ми рекоа вака: ‚Олесни ни го игото, што ни го наложи татко ти‘?«

¹⁰Младите, што беа израснале со него, му одговорија и рекоа: »Вака кажи им на тие луѓе, што ти рекле: ‚твојот татко ни наложи тешко иго, ти, пак олесни ни го,‘ — вака кажи им: ‚малиот прст ми е подебел од бедрата на татка ми.

¹¹Татко ми ви наложи тешко иго, јас, пак, ќе го зголемам вашето иго; татко ми ве казнуваше до камшици, јас, пак, ќе ве бијам со скорпии.‘«

¹²Дојде Јеровоам и сите луѓе при Роваоама на третиот ден, како што им беше заповедал царот, велејќи: »Дојдете при мене пак по три дена.«

¹³Тогаш царот им одговори грубо, бидејќи царот Ровоам го отфрли советот на старешините, и им говореше според советот на младите вака:

¹⁴»Татко ми ви наложи тешко иго, јас пак ќе го зголемам; татко ми ве казнуваше со камшици, јас, пак, ќе ве бијам со скорпии.«

¹⁵И царот не го послуша народот, зашто така беше определено од Бога, за да го исполни Господ зборот Свој, што го беше изрекол преку Силоамецот Ахија на Наватовиот син Јеровоама.

¹⁶Кога сиот Израил виде, дека царот не го слуша, народот му одговори на царот, велејќи: »Каков дел имаме во Давида? За нас нема дел во синот Јесеев; по шаторите свои, Израиле! Сега знај го својот дом, Давиде!« И се разотидоа сите Израилци по шаторите свои.

¹⁷А Ровоам остана цар само на синовите Израилеви, што живееја во Јудините градови.

¹⁸Царот Ровоам го испрати Адонирама, кој беше над даноците, но синовите Израилеви го затрупаа со камења, и тој умре. А царот Ровоам побрза да седни в кола, за да избега во Ерусалим.

¹⁹Така се одметнаа Израилците од домот Давидов и до денес.