Read Lamkang 2 Летописи 17 Bible Online

2 Летописи 17 - Lamkang bible

2 Летописи 17

¹Наместо него стана цар синот негов Јосафат, којшто се зацврсти против Израилците.

²Тој распореди војски по сите утврдени градови на Јудеја и постави стражи по земјата Јудејска и по градовите Ефремови, што ги беше завладеал татко му Аса.

³И Господ беше со Јосафата, зашто одеше по правите патишта на таткото свој Давид и не ги побара Вааловците,

⁴туку Го побара Бога на таткото свој и постапуваше по Неговите заповеди, а не по делата на Израилците.

⁵И Господ го зацврсти царството во рацете негови; сите Јудејци му носеа подароци на Јосафата; тој се здоби со големо богатство и слава.

⁶Срцето негово му се возвиси во Господовите патишта; притоа тој ги премавна оброчиштата и младите шуми во Јудеја.

⁷А на третата година од царувањето ги испрати кнезовите свои Бенхаил, Овадија, Захарија, Натанаила, и Михеја да го поучуваат народот по Јудините градови,

⁸и со нив левитите: Семаја, Нетанија, Зевадија, Азаила, Семирамота, Јонатана, Адонија, Товија и Тов-Адонија, а со нив уште и свештениците Елишам и Јорам.

⁹Тие ги подучуваа Јудејците, носејќи ја со себе книгата на законот Господов; ги обиколуваа сите јудејски градови и го учеа народот.

¹⁰И ги обзеде страв Господов сите земни царста околу Јудеја, и не војуваа со Јосафата.

¹¹А од Филистејците му носеа на Јосафата дарови и сребро за данок; исто така и Арапите му донесуваа ситен добиток: седум илјади и седумстотини овни и седум илјади и седумстотини јарци.

¹²Се издигаше Јосафат сѐ повеќе, и изгради во Јудеја домови градови и тврдини.

¹³Тој имаше големо богатство во јудејските градови, а во Ерусалим — храбри борци.

¹⁴Еве го нивниот список според домовите на татковците нивни: од Јуда илјаданачалници: Адна водач, којшто имаше триста илјади храбри војници;

¹⁵по него Јоанан началник, кој имаше двесте и осумдесет илјади;

¹⁶по него Амасија, Зихриев син, кој се беше посветил на Господа; тој имаше двесте илјади силни војници.

¹⁷Од Венијамина: храбриот војник Елијад, кој имаше двесте илјади вооружени со лак и штит;

¹⁸по него Јозавад, кој имаше сто и осумдесет илјади вооружени војници.

¹⁹Ете, тие му служеа на царот, освен од оние, што ги беше распоредил царот во утврдените градови по цела Јудеја.