Read Lamkang 2 Летописи 2 Bible Online

2 Летописи 2 - Lamkang bible

2 Летописи 2

¹Соломон потоа науми да изгради дом на името Господово и царски дом за себе си.

²И собра Соломон седумдесет илјади носачи и осумдесет илјади каменоделци во горите и надгледници над нив — три илјади и шестотини.

³Па испрати Соломон да му кажат на тирскиот цар Хирама: »Како што правеше со татка ми Давида и му испраќаше кедар, за да си изгради дом за живеење, така направи и со мене.

⁴Еве, јас градам дом на името Господово, мојот Бог, да го посветам Нему, за да се кади пред Него миризливо кадиво, да се поставуваат постојано лебови на предложението и да се принесува таму сепалненици наутро и навечер, и во саботите, новомесечијата и празниците на Господа, нашиот Бог, што му е заповедано засекогаш на Израилот.

⁵Домот, што го градам, е голем, зашто голем е нашиот Бог, погоре е од сите богови.

⁶Та кој може Нему да Му изгради дом, кога небото и небесата на небесата не можат да ја соберат Неговата слава? И кој сум јас, па да можам да Му изградам дом, освен за кадење пред лицето Негово?

⁷Па така, испрати ми сега човек, што знае да прави изработки од злато, од сребро, од бакар и од железо и од пурпурна, црвена и сина преѓа, и кој знае да реже за да работи заедно со уметниците, какви што има во Јудеја и во Ерусалим, а коишто ги приготви татко ми Давид.

⁸И испрати ми кедрови дрва и кипарис и невгово дрво од Ливан, зашто знам, дека твоите слуги умеат да сечат ливански дрвја. И ете, моите слуги ќе одат со твоите слуги,

⁹за да ми подготват многу дрва, зашто домот, што го градам, е голем и величествен.

¹⁰А на дрводелците, твоите слуги, што ќе ги сечат дрвјата, ќе им дадам за храна: дваесет илјади мери пченица и дваесет илјади мери јачмен, дваесет илјади мери вино и дваесет илјади мери елеј.«

¹¹И Хирам, царот тирски, одговори со писмо, кое му го испрати на Соломона: »Затоа што го засака Својот народ, Господ те постави за цар над него.«

¹²И уште рече Хирам: »Благословен Господ, Бог Израилев, Кој го создал небото и земјата и му дал на Давида син мудар, учен и разумен, кој се готви да Му гради дом на Господа и дом царски за себеси.

¹³Па така, ти испраќам човек умен, надарен со знаења, слугата мој Хирама,

¹⁴син на жена од Давидовите ќерки, а татко му е Тирец; тој знае да прави изработки од злато и од сребро, од бакар и од железо, од камен и од дрво, од пурпурна и сина преѓа, од висон и од багреница и да реже секаква резба и да прави сѐ, што ќе му биде порачано, заедно со твоите уметници и со уметници на мојот господар Давида, твојот татко.

¹⁵А пченицата и јачменот, елејот и виното, што ги ветуваш, испрати ги, господаре мој, на своите слуги.

¹⁶Ние, пак, ќе насечеме дрва од Ливан колку што ти треба, и ќе ги донесеме на скели по морето во Јафа, а ти ќе ги пренесеш во Ерусалим.«

¹⁷И ги собра Соломон сите придојдени, што беа тогаш во Израилската земја, според пописот што го беше направил татко му Давид, — и излегоа сто и педесет и три илјади и шестотини.

¹⁸Од нив Соломон определи седумдесет илјади за носачи, осумдесет илјади за каменоделци во горите и три илјади и шестотини за надгледници, за да настојуваат народот да работи.