Read Lamkang 2 Летописи 21 Bible Online

2 Летописи 21 - Lamkang bible

2 Летописи 21

¹И почина Јосафат при татковците свои и беше погребан со татковците свои во Давидовиот град. Место него цар стана синот негов Јорам.

²Неговите браќа, синови Јосафатови беа: Азарија, Јехиил, Захарија, Михаил и Сафатија; сите тие беа синови на Израилевиот цар Јосафат.

³Нивниот татко им даде големи подароци во сребро, злато и скапоцености, заедно со утврдените градови во Јудеја, а царството му го предаде на Јорама, бидејќи тој беше првороден.

⁴Јорам стапи на татковиот престол, се утврди и ги уби со меч сите свои браќа, а исто така и некои Израилеви кнезови;

⁵Јорам беше на триесет и две години, кога стана цар, и царуваше во Ерусалим осум години;

⁶тој одеше по патот на израилските цареви, како што постапуваше домот Ахавов, зашто Ахавовата ќерка му беше жена, — и го вршеше, она што беше неугодно пред очите Господови.

⁷Но Господ, пак, не сакаше да го погуби домот Давидов поради заветот, што го беше склучил со Давида, и поради тоа што беше ветил да му даде светилник нему и на синовите негови за сите времиња.

⁸Во неговите дни Едом се одметна од власта Јудина и си постави цар.

⁹Затоа Јорам тргна со своите војводи, и со сите коли свои; и станувајќи ноќе, го порази Едома, кого го беа опколиле, и началниците на колите и народот избега во живеалиштата свои.

¹⁰Но сепак Едом се одвои од власта на Јуда и до денес. Во исто време се одметна и Ливна од власта негова, зашто го беше оставил Господа Бога на татковците свои.

¹¹Исто така и идолски светилишта направи по горите јудејски, ги воведе во блудство ерусалимските жители и ја соблазни Јудеја.

¹²И му дојде писмо од пророкот Илија, во кое се велеше: »Вака говори Господ, Бог на татка ти Давида: ‚затоа што не тргна по патиштата на татка си Јосафата и по патиштата на Аса, царот јудејски,

¹³туку појде по патот на израилските цареви и ги воведе во блудство Јудеја и ерусалимските жители, како што го воведуваше во блудство домот Ахавов, па уште и браќата свои, домот на татка си, кои беа подобри од тебе, ти ги умртви.

¹⁴Затоа, еве, Господ ќе го порази со голем пораз твојот народ и синовите твои, и жените твои, и целиот имот твој,

¹⁵а, пак, тебе, со лута болест, со болеста на цревата, така што од болеста ќе паѓаат делови од утробата од ден на ден.‘«

¹⁶И го подигна Господ против Јорама духот на Филистејците и Арапите, соседи на Етиопјаните;

¹⁷и тие се кренаа против Јудеја, навлегоа во неа и го ограбија сиот имот, што беше во домот на царот, а исто така и синовите негови, и жените негови, та не му остана друг син, освен Охозија, најмалиот од синовите негови.

¹⁸По сето тоа Господ ги порази цревата негови со болест неизлечива.

¹⁹Така одеше одден наден, а кон крајот на втората година му паднаа цревата од болеста негова и тој умре во страшни маки; и народот не запали за него благопријатни мириси како што правеше за татковците негови;

²⁰тој беше на триесет и две години, кога стана цар, царуваше во Ерусалим осум години, и отиде неоплакан; го погребаа во Давидовиот град, но не во царските гробници.