Read Lamkang 2 Летописи 25 Bible Online

2 Летописи 25 - Lamkang bible

2 Летописи 25

¹Амасија стана цар на дваесет и пет години и царуваше во Ерусалим дваесет и девет години; мајка му се викаше Јехоадан, од Ерусалим.

²Тој вршеше она што беше угодно пред очите на Господа, но не со полно срце.

³Кога се зацврсти на царството, тој ги уби слугите свои, што го беа убиле царот, таткото негов.

⁴Но децата нивни не ги погуби, бидејќи е напишано во законот, во книгата Мојсеева, каде што Господ заповедал, велејќи: да не биваат убивани татковците заради децата, и децата да не бидат убивани заради татковците, туку секој треба да умре заради својот престап.

⁵Амасија ги собра Јудејците, ги нареди според племињата нивни под власта на илјадници и стотници — сите Јудејци и Венијаминовци; ги преброи од дваесет години и нагоре, и ги најде триста илјади души одбрани, кои што одат во војна и држат копје и штит.

⁶Тој најми од Израилците уште сто илјади храбри војници за сто таланти сребро.

⁷Но дојде при него човек Божји и рече: »Царе, нека не оди со тебе израилска војска, зашто Господ не е со Израилците, не е со никого од Ефремовите синови,

⁸туку оди сам, врши работа, бори се храбро во војната. Инаку, ќе те фрли Бог пред непријателот, зашто во Бога има сила да поткрепи и собори.«

⁹Амасија му одговори на Божјиот човек: »А што да се прави со стоте таланти, што ѝ ги дадов на израилската војска?« Божјиот човек рече: »Господ може да ти даде повеќе од тоа.«

¹⁰Амасија ги оддели, — војската, која беше дошла при него од земјата Ефремова, — да си одат во своето место. И тие се разгневија силно против Јудеја и се вратија во своето место многу налутени.

¹¹Амасија пак се осмели и го поведе народот свој, та отиде во Солената Долина и изби десет илјади синови Сеирови;

¹²и десет илјади заробија живи синовите Јудини и ги одведоа на врвот од карпата, и ги турнаа оттаму и тие сите сосема се разбија.

¹³А војската, што ја врати Амасија, за да не оди со него во војна, се растури по јудејските градови од Самарија до Ветерон, во кои уби три илјади души и собра многу плен.

¹⁴Кога си дојде Амасија по поразот на Идумејците, ги пренесе боговите на Сеировите синови, ги постави кај себеси за богови и пред нив се клањаше и им кадеше.

¹⁵Поради тоа се разгори гневот Господов против Амасија, и Он му испрати пророк, кој што му рече: »Зошто прибегнуваш кон боговите на тој народ, кои што не го избавија својот народ од раката твоја?«

¹⁶Додека тој говореше, царот одговори: »Зар те поставив за царски советник? Престани, за да не те убијат.« И пророкот престана, велејќи: »Знам, дека Господ решил да те погуби, бидејќи ти го направи тоа и не го слушаше мојот совет.«

¹⁷Се посоветува Амасија, царот јудејски, и испрати да му кажат на израилскиот цар Јоас, син на Јоахаза, Јуевов син: »Излези да се видиме лице во лице.«

¹⁸Тогаш израилскиот цар Јоас изпрати до јудејскиот цар Амасија да му кажат: »Трнот ливански испратил да му кажат на кедарот ливански: дај ја ќерката си на синот мој за жена. Но минале диви ѕверови ливански и го изгазиле тој трн.

¹⁹Ти велиш: ете, ги избив Идумејците, — и срцето твое се возгордеа до пустославие. Седи подобро во домот свој. Зошто да се зафаќаш со опасна работа? Ќе паднеш ти, и Јудеја со тебе.«

²⁰Но Амасија не послуша, бидјеќи тоа беше од Бога, — за да ги предаде во раката на Јоаса, заради тоа што прибегна кон идумејските богови.

²¹Излезе Јоас, царот израилски, и се видоа лице со лице, тој и Амасија, цар јудејски, во Ветсамис Јудејски.

²²И беа разбиени Јудејците од Израилците, и се разбегаа секој во шаторот свој.

²³И го улови Јоас, цар израилски, Амасија, царот јудејски, син на Јоаса, го доведе во Ерусалим и го собори ерусалимскиот ѕид во должина од четиристотини лакти — од Ефремовите порти до аголните порти;

²⁴го зеде сето злато и сребро и сите садови, што беа во домот Божји во Овед-Едом, и ризницата на царскиот дом, и заложниците, и се врати во Самарија.

²⁵Амасија, син Јоасов, цар јудејски, живееше по смртта на израилскиот цар Јоас, Јоахавов син, петнаесет години.

²⁶Другите Амасиеви дела, прво и последно, се опишани во книгата на царевите јудејски и израилски.

²⁷Потоа, откако Амасија отстапи од Господа, направија заговор против него во Ерусалим, и тој избега во Лахис. Испратија по него во Лахис, и го убија таму.

²⁸И го донесоа на коњи, та го погребаа кај татковците негови во Јудиниот град.