Read Lamkang 2 Летописи 27 Bible Online

2 Летописи 27 - Lamkang bible

2 Летописи 27

¹Јоатам беше на дваесет и пет години, кога стана цар, и царуваше во Ерусалим шеснаесет години; мајка му се викаше Јеруса, Садакова ќерка.

²Тој вршеше она што Му беше угодно пред очите на Господа, токму онака како што правеше Озија, таткото негов, само што не влегуваше во Господовиот храм, а народот сѐ уште грешеше.

³Тој ја изгради и горната врата на домот Господов и изгради многу нешто на ѕидот Офел;

⁴изгради и градови во Јудејската планина, а во горите изгради дворци и кули.

⁵Тој војуваше со царот на Амонитите и ги победи, и Амонитите му дадоа во таа година сто талатни сребро и десет илјади мери пченица и десет илјади мери јачмен. Тоа му го даваа Амонитите и во втората и третата година.

⁶Затоа Јоатам беше толку силен, бидејќи ги управуваше патиштата свои пред Господа, својот Бог.

⁷Другите дела на Јоатама и сите негови војни и однесување се опишани во книгата на царевите израилски и јудејски.

⁸Тој беше на дваесет и пет години кога стана цар, а царуваше шеснаесет години во Ерусалим.

⁹И почина Јоатам при татковците свои, и го погребаа во Давидовиот град. И наместо него стана цар синот негов Ахаз.