Read Lamkang 2 Летописи 4 Bible Online

2 Летописи 4 - Lamkang bible

2 Летописи 4

¹А направи и бакарен жртвеник: дваесет лакти долг, дваесет лакти широк и десет лакти висок.

²И направи излеано море — од едниот крај негов до другиот десет лакти — целиот круг, висок пет лакти, а наоколу при врвот — триесет лакти;

³наоколу под него од сите страни имаше излеано образи воловски; на десет лакти наоколу морето го опколуваа два реда волови, излеани заедно со него.

⁴Тоа стоеше врз дванаесет вола: три гледаа кон север, три гледаа кон запад, три гледаа кон југ и три гледаа кон исток, а морето врз нив одозгора: заднините пак им беа свртени навнатре под морето.

⁵Дебелината му беше колку една дланка, а краиштата негови, направени како краишта на чаша; прилегаа на расцутен крин. Тоа собираше три илјади бата.

⁶Направи и десет мијалници и постави пет десно и пет лево, за да мијат во нив — го миеја во нив приготвеното за сепалениците; а морето — за свештениците, за да се мијат во него.

⁷Направи и десет златни светилници, какви што требаше да бидат, и ги постави во храмот — пет десно и пет лево.

⁸Направи и десет трпези и ги постави во храмот — пет десно и пет лево; направи и сто златни чаши.

⁹Направи уште и свештенички двор, и голем двор, и врати кон дворот, и стожерите им ги опкова со бакар.

¹⁰Морето го постави на десната страна, кон југоисток.

¹¹И направи Хирам котли, лопатки, чаши, кадилници и сите жртвени садови. И ја сврши Хирам работата, што ја вршеше за царот Соломон во Божјиот дом:

¹²два столба и два појаса околу врвовите врз столбовите и две мрежи, за да ги покриваат двата појаса околу капителите, што беа врз столбовите,

¹³и четиристотини нарови на двете мрежи — два реда нарови за секоја мрежа, за да ги покриваат двата појаса околу врвовите врз столбовите.

¹⁴Направи и подножја, направи и мијалници над подножјата;

¹⁵едно море и дванаесет волови под него,

¹⁶и котли и лопатки, и виљушки; целиот тој прибот Хирам му го направи на царот Соломона за домот Господов од измазнет бакар.

¹⁷Царот ги излеа во глинена земја во околината на Јордан, меѓу Сокхот и Саридата.

¹⁸Соломон ги направи сите тие предмети во големо множество, така што не се знаеше мерката на бакарот.

¹⁹Тогаш ги направи Соломон и сите други предмети за Божјиот дом: и златен жртвеник, и трпези за лебовите на предложението,

²⁰и светилници, и кандилата нивни, за да ги палат според уредбите пред Свјатаја Свјатих, — од чисто злато;

²¹и цвеќенца, и кандилца, и машички од злато, од најчисто злато,

²²и ножеви, и росилници, и чаши, и пепелници од најчисто злато; и храмовите порти — внатрешните порти за Свјатаја Свјатих, и храмовите порти за светилиштето — од злато.