Read Lamkang 2 Летописи 9 Bible Online

2 Летописи 9 - Lamkang bible

2 Летописи 9

¹Савската царица, кога чу за славата Соломонова, дојде во Ерусалим да го искуша Соломона со гатанки; дојде со многу големо богатство и камили, натоварени со благопријатни мириси, многу злато и скапоцени камења. Дојде при Соломона и говореше со него сѐ, што ѝ беше на срце.

²Соломон ѝ ги објасни сите нејзини зборови, и не се најде ништо непознато за Соломона, кое да не ѝ го објасни.

³Савската царица, откако ја виде мудроста на Соломона и домот, што тој го беше изградил,

⁴и јадењата на трпезата негова, и живелиштата на слугите негови, состојбата на прислужниците негови и облеката нивна, пехарниците и облеката нивна, и одот, со кој тој влегуваше во домот Господов, — беше надвор од себе си.

⁵Тогаш таа му рече на царот: »Вистина е она што го бев слушала за твоите дела и за твојата мудрост;

⁶но јас не верував на нивните зборови сѐ, додека не дојдов и не видов со очите свои. И еве, ни половината не ми е кажано за твојата голема мудрост: ти ја надминуваш приказната, што сум ја чула.

⁷Блажени се твоите луѓе, блажени се тие твои слуги, кои секогаш стојат пред тебе и ја слушаат мудроста твоја!

⁸Нека е благословен Господ, твојот Бог, Кој благоволи да те постави на Својот престол за цар пред Господа, твојот Бог. Поради љубовта на твојот Бог кон Израилот, за да го зацврсти засекогаш, Он те постави за цар над него, — да делиш суд и правда.«

⁹Потоа таа му подари на царот сто и дваесет таланти злато и големо множество благопријатни мириси и скапоцени камења: немаше нигде такви мириси, какви што Савската царица му подари на Соломона.

¹⁰Но и слугите Хирамови и слугите Соломонови, кои го донесоа златото од Офир, донесоа и црвено дрво и скапоцени камења.

¹¹Царот од тоа црвено дрво направи скали за домот Господов и за царскиот дом, и гусли и псалтири за певците. Такво нешто не беше видено пред тоа во земјата Јудејска.

¹²А царот Соломон ѝ даде на Савската царица, сѐ што посака и пожела, освен такви работи, какви што таа му беше донела. Пота таа се врати во својата земја со слугите свои.

¹³Мерката на златото, што му доаѓаше на Соломона во текот на една година, беше шестотини и шеесет таланти.

¹⁴Освен тоа, донесуваа уште и поданици и трговци, и сите цареви арапски и обласни началници му донесуваа злато и сребро на Соломона.

¹⁵И направи царот Соломон двесте големи штита од ковано злато — по шестотини сикли злато за секој штит, —

¹⁶и триста помали штита од ковано злато — по триста сикли злато за секој штит; и царот ги постави во домот од ливанско дрво.

¹⁷Царот направи и голем престол од слонова коска, и го обложи со чисто злато,

¹⁸и шест степеника до престолот и златно подножје, изградено заедно со престолот, и потпирки од двете страни на седиштето, и два лава, што стојат до потпирките.

¹⁹И уште дванаесет лава што стојат таму од двете страни на шесте степеника. Таков престол немаше во ниедно царство.

²⁰Сите садови од кои пиеше царот Соломон беа од злато, и сите садови во домот од ливанско дрво беа од чисто злато; од сребро немаше ништо, зашто среброто во Соломоновото време не се ценеше многу.

²¹Бидејќи царски кораби одеа во Тарсис со слугите Хирамови и секои три години корабите се враќаа од Тарсис, па донесуваа злато и сребро, слонова коска, мајмуни и пауни.

²²Така царот Соломон ги надмина сите земни цареви по богатството и по мудроста.

²³Сиет земни цареви сакаа да го видат Соломона, за да ја послушаат мудроста негова, која Бог ја беше внел во срцето негово.

²⁴И секој од нив донесуваше со себеси дар: сребрени садови и златни садови, облека, оружја, благопријатни мириси, коњи и маски — секоја година.

²⁵Соломон имаше четири илјади стаи за коњи и коли и дванаесет илјади коњаници; ги беше населил по колските градови и при царот — во Ерусалим.

²⁶Владееше над сите цареви — од реката Еуфрат до Филистејската земја и до Египетските предели.

²⁷Царот направи и златото и среброто во Ерусалим да бидат рамноценети со обичните камења, а кедрите, поради нивното множество, ги направи рамноценети со смоквите во низините.

²⁸Коњи му дотеруваа на Соломона од Египет и од сите земји.

²⁹Другите дела Соломонови, први и последни, опишани се во записите на пророкот Натана и во пророштвото на Силомаецот Ахија и во виденијата на јасновидецот Јоила за Јеровоама, Наватовиот син.

³⁰Соломон царуваше во Ерусалим над сиот Израил четириесет години.

³¹Почина Соломон при татковците свои, и го погребаа во градот на татка му Давида. А место него стана цар синот негов Ровоам.