Read Lamkang 2. Ездра 7 Bible Online

2. Ездра 7 - Lamkang bible

2. Ездра 7

¹Тогаш Сисиниј војводата на Кили-Сирија и на Феникија, и Ситравузан и другарите нивни, следејќи го заповеданото од царот Дарија,

²го зедоа при срце светото дело, помагајќи им на старешините и на свештеноначалниците јудејски.

³И светото дело напредуваше успешно, при пророштвата на пророците Агеј и Захарија.

⁴И завршија сѐ по заповедта на Господа, Бога Израилев, и по волјата на Кира, Дарија и Артаксрекса, цареви персиски.

⁵Сѐ заврши светиот дом на дваесет и третиот ден на месецот Адар, во шестата година на царот Дариј.

⁶И синовите Израилеви, свештениците, левитите, и другите, кои се вратија од пленство, што беа поставени при храмот, извршија сѐ според напишаното во Мојсеевата книга.

⁷И принесоа жртва за обновување на храмот Господов сто вола, двесте овни, четиристотини јагниња,

⁸дванаесет козли за гревовите на сиот Израил, според бројот на дванаесетте колена Израилеви.

⁹А свештениците и левитите стоеја по родовите во одежди при службата на Господа, Бога Израилев, согласно со Мојсеевата книга, и вратарите при секоја врата.

¹⁰И вратените од пленство синови Израилеви правеа Пасха во четиринаесеттиот ден на првиот месец, откако се очистија свештениците и левитите заедно.

¹¹А исто така и сите синови од пленството, бидејќи се очистија: сите Левити се очистија заедно.

¹²Па заклаа пасхални јагниња за сите синови од пленството, за браќата свои, свештеници, и за себеси.

¹³па пајдеа синовите Израилеви, вратени од пленство, сите што се отклонија од гнасотиите на народите од онаа земја и го побараа Господа.

¹⁴И Го празнуваа празникот Бесквасници седум дена, радувајќи се пред Господа,

¹⁵затоа што Он го сврте кон нив срцето на асирскиот цар, за да ги поткрепи рацете нивни за службите на Господа, Бога Израилев.