Read Lamkang Товит 11 Bible Online

Товит 11 - Lamkang bible

Товит 11

¹Тогаш Рафаил му рече на Товија: »Не знаеш ли, брате, во каква состојба го оставивме твојот татко?

²Ајде да побрзаме напред, пред твојата жена, за да го понаредиме живеалиштето.

³а ти земи ја в рака коската од рибата.« И така тргнаа, а и кучето потрча по нив.

⁴А тогаш и Ана седна покрај патот и чекаше да го здогледа своето чедо.

⁵И кога го препозна и виде дека се враќа, му рече на Товита: »Еве, се враќа синот твој и човекот што тргна со него.«

⁶Рафаил му рече на Товија: »Знај дека на татка ти ќе му се отворат очите;

⁷ти само намажи му ги очите со жолчката, а тој, откако ќе почувствува јадеж, ќе почне да ги трла и така ќе паднат белите пердиња, и тој ќе прогледа.«

⁸Ана потрча, го гушна сина си и му рече: »Чедо мое, те видов; сега можам и да умрам.« Тогаш обајцата се расплакаа.

⁹Товит излезе од вратата и се сопна, но син му притрча и го придржа татка си.

¹⁰Му намажа од жолчката преку очите и му рече: »Татко мој, биди силен!«

¹¹Тогаш почувствува лутина и јадеж во очите и почна да ги трла,

¹²па белите перденца паднаа од краиштата на неговите очи. Кога го виде сина си, го гушна,

¹³заплака и проговори: »Благословен си, Боже, и благословено е Твоето име во сите векови, благословени се сите Твои ангели!

¹⁴Зашто, Ти ме накажа, но пак се смилува на мене. Еве, го гледам мојот син Товија!« — А синот негов Товија со радост влезе во домот и му раскажа на татка си за сите големи дела што му станаа во Мидија.

¹⁵Товит, преполн со радост и благословувајќи го Бога, појде да ја пречека својата снаа кај портите на Ниневија. Оние, што го видоа како оди, се чудеа дека прогледал.

¹⁶А Товит се исповеда пред нив оти Бог го помилувал. Кога се проближи до својата снаа Сара, тој ја благослови и рече: »Добре дошла, ќерко моја! Нека е благословен Бог, Кој те доведе при нас! Нека бидат благословени и татко ти и мајка ти!« Се зарадуваа и сите негови браќа во Ниневија.

¹⁷И дојде Ахијахар и неговиот братанец Насвас,

¹⁸па сите со веселба ја празнуваа свадбата на Товија седум дена.